အမေရိကန်ရဲ့ နည်းပညာအမြင့်ဆုံး သင်္ဘောတစ်စီး (သို့) ရေဒါပျောက် ပဲ့ထိန်းဒုံးကျည်တင် ဖျက်သင်္ဘော ဇမ်ဝေါ့

Posted on

USS Zumwalt (ယာဉ်အမှတ် DDG-1000) ဟာ အမေရိကန်ရဲ့ နောက်ဆုံးပေါ်နည်းပညာတွေသုံးထားတဲ့ ပဲ့ထိန်းဒုံးကျည်ပစ်လွှတ်နိုင်သော ဖျက်သင်္ဘောအမျိုးအစားဖြစ်ပါတယ်။ ဒီသင်္ဘောဟာ ဇမ်ဝေါ့အမျိုးအစားသင်္ဘောတွေထဲမှာ ပထမဆုံးသင်္ဘောလည်းဖြစ်ပါတယ်။ ရေဒါပျောက်သင်္ဘောဖြစ်ပေမယ့် လေယာဉ်တွေလို ရေဒါကနေ လုံးဝပျောက်သွားတာမဟုတ်ပဲ အရွယ်အစားကြီးမားတဲ့သင်္ဘောတစ်စီးလုံးကို သင်္ဘောငယ်လေး တစ်ခုလို ထင်သွားစေတဲ့ stealth နည်းပညာကို အသုံးပြုထားပါတယ်။

သင်္ဘောအမည် ဇမ်ဝေါ့(Zumwalt) ကတော့ အသက်အငယ်ဆုံးနဲ့ အမေရိကန်ရေတပ်ရဲ့အကြီးအကဲတာဝန်ကို ထမ်းဆောင်ခဲ့တဲ့ ရေတပ်ဗိုလ်ချုပ်ကြီး Elmo Russell Zumwalt, Jr ကို ဂုဏ်ပြုတဲ့အနေနဲ့ ပေးထားခြင်း ဖြစ်ပါတယ်။ သူဟာ အမေရိကန် စစ်ရေးသမိုင်းမှာ အဓိက ဦးဆောင်ပါဝင်ခဲ့သူဖြစ်ပြီး အထူးသဖြင့်တော့ ဗီယက်နမ်စစ်ပွဲကာလအတွင်းမှာ ထင်ရှားခဲ့ပါတယ်။ အမေရိကန်ရေတပ်ရဲ့ စည်းမျဉ်းစည်းကမ်းတွေကို ပြင်ဆင်ချမှတ်ခဲ့သူ လည်းဖြစ်ပါတယ်။

မူလဖျက်သင်္ဘောတွေထက် သာလွန်တဲ့ ဇမ်ဝေါ့ဖျက်သင်္ဘောရဲ့ စွမ်းဆောင်ရည်တွေကတော့ ရေတိမ်ကမ်းနီးဒေသတွေမှာ လျှင်မြန်စွာမောင်းနှင်နိုင်ခြင်း ၊ မြေပြင်စစ်ဆင်ရေးမှာ တိုက်ခိုက်ရေးတပ်များအား အမြောက်ကူပစ်ပေးနိုင်ခြင်း ၊ လေယာဉ် နှင့် ရေငုပ်သင်္ဘောများကို တန်ပြန်တိုက်ခိုက်ဖျက်စီးနိုင်ခြင်း ၊ ရာသီဥတု အချိန်နေ့ညမရွေး တာဝေးပစ် ဒုံးပျံများပစ်လွှတ်တိုက်ခိုက်နိုင်ခြင်း နှင့် ရန်သူ့ထောက်လှမ်းရေး ကိရိယာတွေ ဖမ်းယူဖို့မလွယ်ကူတဲ့ ကိုယ်ထည်ဒီဇိုင်းရှိခြင်း စတာတွေပဲဖြစ်ပါတယ်။

ဒီ USS Zumwalt သင်္ဘောဟာ ၁၉၉၄ခုနှစ်ကတည်းက စတင်ခဲ့တဲ့ DD21 program လို့ခေါ်တဲ့ ၂၁ရာစုဖျက်သင်္ဘော (“21st Century Destroyer”) အစီအစဉ်ကို အခြေခံပြီး ဖြစ်ပေါ်လာခဲ့တာပါ။ ဒီပရိုဂရမ်အရ စစ်သင်္ဘောတွေဟာ ကမ်းဝေးသာမက ကမ်းနီးရေတိမ်ပိုင်းမှာပါ လိုက်လံတိုက်ခိုက်နိုင်ရန် ၊ ရေပေါ် ရေအောက် ရန်သူ့ယာဉ်များကို တန်ပြန်ပစ်ခတ်ဖျက်ဆီးနိုင်ရန် ၊ လျို့ဝှက်စစ်ဆင်ရေးများဆင်နွှဲနိုင်ရန် စတဲ့ စွမ်းရည်များပါဝင်လာဖို့ ဖြစ်ပါတယ်။ ဖျက်သင်္ဘော (DD-21/DD-X) နဲ့ ခရူဆာသင်္ဘော (FF-21/FF-X) ဆိုပြီး အပိုင်း ၂ပိုင်းပါဝင်ပေမယ့် ခရူဆာသင်္ဘောတွေ တည်ဆောက်မယ့် အစီအစဉ်ကတော့ ဘက်ဂျက်မလုံလောက်တာကြောင့် ရပ်ဆိုင်းခဲ့ရပါတယ်။ DD-X အစီအစဉ်ကို ဆက်လက်လုပ်ဆောင်ခဲ့ပြီး ဖျက်သင်္ဘောတွေကို တည်ဆောက်ခဲ့တာဖြစ်ပါတယ်။

၂၀၀၈ ခုနှစ်ဖေဖော်ဝါရီလမှာတော့ အမေရိကန် Maine ပြည်နယ် ၊  Bath မြို့မှာ အခြေစိုက်ထားတဲ့ သင်္ဘောတည်ဆောက်ရေးကုမ္ပဏီကြီး Bath Iron Works (BIW) နဲ့ ဒီသင်္ဘောတည်ဆောက်ရေးအတွက် ဒေါ်လာ ၁.၄ဘီလျံနဲ့ စာချုပ်ကို ချုပ်ခဲ့ပါတယ်။ သင်္ဘောတည်ဆောက်ရေးလုပ်ငန်းများကို ၂၀၀၉ခုနှစ် ဖေဖော်ဝါရီမှာ စတင်ခဲ့ပါတယ်။ ၂၀၁၃ခုနှစ် အောက်တိုဘာ ၂၉ရက်နေ့မှာတော့ သင်္ဘောတည်ဆောက်ပြီးစီးကာ ရေချနိုင်ခဲ့ပါတယ်။ ၂၀၁၆ အောက်တိုဘာလမှာ တပ်တော်ဝင်ခဲ့တဲ့ ဒီသင်္ဘောဟာ လက်ရှိအချိန်မှာ အသင့်အနေအထားနဲ့ တာဝန်ထမ်းဆောင်နေပါတယ်။ သူ့ရဲ့ ပင်မ အခြေစိုက်စခန်းကတော့ အမေရိကန်နိုင်ငံ ကာလီဖိုးနီးယားပြည်နယ် ဆန်ဒီရေဂိုစခန်း ဖြစ်ပါတယ်။

ဒီစစ်သင်္ဘောရဲ့ အလျားကတော့ ပေ ၆၀၀ ရှိပြီး ၊ အနံ ၈၀.၇ပေ ရှိကာ ရေစူးကတော့ ၂၇.၆ပေ ဖြစ်ပါတယ်။ ထုထည်အားဖြင့်တော့ ၁၄၅၆၄တန် ရှိပြီး လျှပ်စစ်ဓာတ်အားအတွက် Integrated Power System (IPS) ကို တပ်ဆင်ထားပါတယ်။ ဒီစနစ်ဟာ ပုံမှန်စစ်သင်္ဘောအများစုမှာ အသုံးပြုထားတဲ့ စနစ်ထက်သာလွန်ပါတယ်။ ပုံမှန်သင်္ဘောတွေမှာ မောင်းနှင်ဖို့အတွက် အင်ဂျင် နဲ့ သင်္ဘောကို လျှပ်စစ်ဓာတ်အားပေးဖို့အတွက် အင်ဂျင်ဆိုပြီး နှစ်မျိုးရှိပါတယ်။ သူ့ရဲ့အားနည်းချက်ကတော့ တိုက်ပွဲဝင်နေစဉ်အတွင်းမှာ လျှပ်စစ်ဓာတ်အားပိုလိုတဲ့အခါ မောင်းနှင်တဲ့အင်ဂျင်ကနေ ထုတ်မပေးနိုင်တာပါ။

ဒီသင်္ဘောမှာသုံးထားတဲ့ IPS စနစ်ကတော့ နည်းပညာအမြင့်ဆုံးလို့ဆိုရမယ့် Rolls-Royce ဂတ်စ်တာဘိုင်အင်ဂျင် ၄လုံး (  MT30 ၂ လုံး နဲ့ RR4500 ၂လုံး) နဲ့ သင်္ဘောရဲ့လျှပ်စစ်ဓာတ်အားကိုပေးထားပြီး သင်္ဘောမောင်းနှင်ရန် ပန်ကာလိုအပ်ဖို့စွမ်းအင်ကို မော်တာများက တဆင့်ပြန်ပေးထားတာဖြစ်ပါတယ်။ လျှပ်စစ်ဓာတ်အားလိုအပ်တဲ့ သင်္ဘောရဲ့အစိတ်အပိုင်းအားလုံးကို ဒီဂျစ်တယ်စနစ်နဲ့ ထိန်းချုပ်ပြီး တိုးပေးခြင်း ၊ လျှော့ပေးခြင်းတွေကို ပြုလုပ်နိုင်ပါတယ်။ သူ့ရဲ့လျှပ်စစ်ဓာတ်အားပေးစနစ်ကနေ စုစုပေါင်း လျှပ်စစ်ဓာတ်အား ၇၈MW ကို ထုတ်လုပ်ပေးပါတယ်။ ဒါကြောင့် အင်အားအကောင်းဆုံး လျှပ်စစ်ဓာတ်အားကို အသုံးပြုကာ မောင်းနှင်နေတဲ့ သင်္ဘောတစ်စင်းလို့ ဆိုနိုင်ပါတယ်။ တစ်နာရီကို ရေမိုင် ၃၃.၅မိုင် (၃၈.၆မိုင်) အမြန်နှုန်းနဲ့ ခုတ်မောင်းနိုင်တဲ့ သင်္ဘောဖြစ်ပါတယ်။

ရေဒါစနစ်အနေနဲ့ကတော့ MFR(X-band) နဲ့ VSR(S-band) တို့ကို အသုံးပြုထားပါတယ်။ လှိုင်းအလျားတိုတဲ့ AN/SPY-3 Multi-Function Radar MFR(X-band) ရေဒါကတော့ သေးငယ်တဲ့အရာဝထ္ထုတွေနဲ့ ရန်သူရဲ့ သင်္ဘောဖျက်ဒုံးတွေကို ထောက်လှမ်း နိုင်ပြီး လှိုင်းအလျားရှည်တဲ့  Volume Search Radar (VSR) (S-band) ရေဒါကတော့ အဝေးမှာရှိတဲ့ သင်္ဘော ၊ ဒုံးပျံ ၊ လေယာဉ် နဲ့ အမြှောက်တပ် စတာတွေကို ထောက်လှမ်းပေးနိုင်စွမ်းရှိပါတယ်။

တပ်ဆင်ထားတဲ့လက်နက်တွေ အနေနဲ့ကတော့ Advanced Gun System လို့ခေါ်တဲ့ 150mm ပင်မအမြောက်ကြီး ၂လက်ကို တပ်ဆင်ထားပါတယ်။ ဒီအမြှောက်ကြီးတွေဟာ ပစ်မှတ်တွေကို အမြန်ဆုံးနဲ့ တိတိကျကျ ထိမှန်အောင်အောင် ပစ်ခတ်နိုင်စွမ်းရှိပါတယ်။ ၁မိနစ်အတွင်း ၁၀ချက်ပစ်နိုင်စွမ်းရှိတဲ့ ဒီအမြောက်ကြီးတွေရဲ့ပစ်ခတ်နိုင်တဲ့အကွာအဝေးကတော့ ရေမိုင် ၈၃မိုင် ဖြစ်ပါသတဲ့။ အမြောက်တစ်ခုစီအတွက် ကျည် ၇၅၀ စီကို အော်တိုကျည်ဖြည့်တဲ့စနစ်နဲ့ တပ်ဆင်ထားပါတယ်။

တစ်ခုစီကို လောင်ချာ အခု ၂၀စီပါဝင်တဲ့ ဒုံးပျံလောင်ချာလက်နက် ၄ခု ကိုတော့ သင်္ဘောရဲ့ အရှေ့နဲ့ အနောက်မှာ ဘယ်ညာခွဲပြီး တပ်ဆင်ထားပါတယ်။ ဒီလိုတပ်ဆင်ထားရခြင်းကတော့ လက်နက်စနစ် တစ်ခုဟာ ရန်သူရဲ့ တိုက်ခိုက်မှုထိပြီး ပျက်စီးသွားတဲ့အခါ ကျန်တဲ့လက်နက်စနစ်တွေကို ဆက်လက်အသုံးပြုနိုင်စေဖို့ ဖြစ်ပါတယ်။ ဒီဒုံးပျံစနစ်မှာ လက်ရှိရှိနေတဲ့ ဒုံးပျံတွေသာမက ထပ်မံထွက်ရှိလာမယ့် နည်းပညာမြင့် သင်္ဘောဖျက်ဒုံးပျံ ၊ ရေငုပ်သင်္ဘောဖျက်ဒုံးပျံ စတာတွေကိုပါ ထည့်သွင်းပစ်ခတ်နိုင်အောင် ဖန်တီးထားတာ ဖြစ်ပါတယ်။ အနီးကပ်အတွက်ကတော့ တစ်မိနစ်ကို ကျည် ၂၂၀ ချက်ပစ်နိုင်မယ့် Mk 46 30 mm အမြောက် နှစ်လက်ကို တပ်ဆင်ထားပါတယ်။ ဒီအမြောက်နှစ်လက်ရဲ့အဝေးဆုံးပစ်နိုင်တဲ့ အကွာအဝေးကတော့ ၂.၅မိုင်ဖြစ်ပါတယ်။

သင်္ဘောတစ်စီးလုံးကို  IT နည်းပညာအသုံးပြုထားပြီးထိန်းချုပ်ထားတာကြောင့် အသုံးပြုတဲ့အခါ လျှင်မြန်လွယ်ကူစွာ အသုံးပြုနိုင်တာကတော့ Zumwalt ဖျက်သင်္ဘောတွေရဲ့ အားသာချက်ဖြစ်ပါတယ်။ ဒီလိုနည်းပညာတွေနဲ့ တည်ဆောက်ထားတာကြောင့် ပုံမှန်အားဖြင့် စစ်သင်္ဘောတစ်စီးကို ထိန်းချုပ်ဖို့အတွက် သင်္ဘောသား ၂၅၀ ကနေ ၃၀၀ခန့် လိုအပ်တဲ့အချိန်မှာ Zumwalt အတွက်ကတော့ သင်္ဘောသား ၁၄၀ ဦးပဲ လိုအပ်ပါတယ်။ ဒီဖျက်သင်္ဘောပေါ်မှာ ရဟတ်ယာဉ်တွေဆင်းသက်နိုင်ပြီး အကြီးစား ရဟတ်ယာဉ် ၁စီးကနေ အသေးစား ရဟတ်ယာဉ် ၃စီး အထိဆင်းသက်နိုင်ပါတယ်။

နောက်ဆုံးပေါ် နည်းပညာတွေသုံးထားတဲ့ ဒီသင်္ဘောရဲ့ ခန့်မှန်းခြေကုန်ကျစရိတ်ကတော့ အမေရိကန်ဒေါ်လာ ၃.၅ဘီလျံ ကနေ ၄.၄ဘီလျံ အတွင်းဖြစ်ပါတယ်။ လက်ရှိအချိန်အထိတော့ ဒီသင်္ဘောနဲ့ အမျိုးအစားတူ Zumwalt သင်္ဘော ၃စီးသာ ရှိသေးပြီး ကျန် ၂စီးကတော့ USS Michael Monsoor (DDG-1001) နဲ့ USS Lyndon B. Johnson တို့ပဲဖြစ်ပါတယ်။ Zumwalt သင်္ဘောတွေဟာ အမေရိကန်ရဲ့ တန်ဖိုးအကြီးဆုံး နည်းပညာအမြင့်ဆုံး သင်္ဘောတွေဆိုလည်း မမှားပါဘူး။ လက်ရှိအချိန်မှာတော့ USS Zumwalt နဲ့ USS Michael Monsoor တို့ဟာ တပ်တော်ဝင်နေပြီ ဖြစ်ပြီး USS Lyndon B. Johnson ကလည်း ၂၀၁၈ခုနှစ်ကတည်းက ရေချပြီးဖြစ်တာကြောင့် မကြာခင် တပ်တော်ဝင်ပြီး တာဝန်ထမ်းဆောင်တော့မှာဖြစ်ပါတယ်။

VIDEO

Leave a Reply