ကမ္ဘာ့အပူဆုံးနေရာ ၁၀ ခု

Posted on

ဒီနေ့တွေမှာ ရာသီဥတုဟာ တစ်နေ့တခြားပိုမိုပူပြင်းလာတာကို အားလုံးခံစားမိကြမှာပါ။ ကျွန်တော်တို့နိုင်ငံရဲ့ အပူချိန်ဟာလည်း အလွန်ပူပြင်းလှပါတယ်ဆိုတဲ့ ကန္တာရဒေသတချို့နဲ့ နင်လားငါလား ဖြစ်နေပါပြီ။ ကျွန်တော်တို့ဆီမှာ ဒီလောက်ပူလောင်နေပေမယ့်လို့ ဒီမှာထက်အဆပေါင်းများစွာ အပူချိန်ပိုမြင့်တဲ့နေရာတွေ ကမ္ဘာမှာ ရှိနေပြန်ပါတယ်။ ဒီတစ်ခါတော့ ကမ္ဘာ့အပူဆုံး ဒေသ ၁၀ ခုအကြောင်းကို ဗဟုသုတ အနေနဲ့မျှဝေလိုက်ပါတယ်။

၁၀။  Dallol ၊ အီသီယိုးပီးယား

အီသီယိုးပီးယားနိုင်ငံ မြောက်ပိုင်းက Dallol ဟာ တချိန်က သတ္တုတူးဖော်ရေး မိုင်းတွင်းမြို့အဖြစ် စည်ကားခဲ့ဖူးပါတယ်။ ဒါပေမယ့် ယခုအချိန်မှာတော့ လူသူနေထိုင်မှု မရှိတော့တဲ့ စွန့်ပစ်နေရာတစ်ခု ဖြစ်နေပါပြီ။ အီသီယိုးပီးယားမှာတော့ ဒီနေရာတ၀ိုက်ဟ အပူဆုံးနေရာဖြစ်ပါတယ်။ ပုံမှန်အားဖြင့် ဒီနေရာတ၀ိုက်ရဲ့ အပူချိန်ဟာ 35°C အထက်လို့ဆိုပေမယ့် အမြင့်ဆုံးအပူချိန်အဖြစ် မေလ နဲ့ ဇူလိုင်လတွေမှာ 49°C အထိပူခဲ့ဖူးပါတယ်။

၉။ Aziziya ၊ လစ်ဗျား

လစ်ဗျားနိုင်ငံ အနောက်မြောက်ပိုင်းက မြို့ငယ်လေးတစ်မြို့ဖြစ်ပြီး လစ်ဗျားမြို့တော် ထရီပိုလီနဲ့ ၂၅မိုင် အကွာအဝေးမှာ တည်ရှိနေပါတယ်။ လူပေါင်း ၂၃၀၀၀ ကျော်နေထိုင်တဲ့ ဒီမြို့ဟာ လစ်ဗျားရဲ့ အပူဆုံးမြို့တစ်မြို့ဖြစ်ပါတယ်။ပုံမှန်အားဖြင့် အပူဆုံးလတွေမှာ 39°C အထိ ပူလေ့ရှိပါတယ်။ အပူချိန်အပြောင်းအလဲ များတဲ့နေရာတစ်ခုဖြစ်ပြီး အအေးလွန်ကဲတဲ့လတွေမှာတော့ – 2°C အထိကျဆင်းဖူးပါတယ်။ ၁၉၂၂ခုနှစ် စက်တင်ဘာလဟာ ဒီနေရာရဲ့ သမိုင်းတလျှောက် အပူဆုံး စံချိန်တင်ခဲ့ပြီး အဲဒီအချိန်က အပူချိန်ဟာ 58°C တောင် ရှိပါသတဲ့။

၈။ Wadi Halfa ၊ ဆူဒန်

ဆူဒန်နိုင်ငံရဲ့ မြောက်ပိုင်းပြည်နယ်မြို့ဖြစ်ပြီး အီဂျစ်နဲ့နယ်နိမိတ်ခြင်း ထိစပ်နေတဲ့မြို့ဖြစ်ပါတယ်။ ဒုတိယကမ္ဘာစစ်အတွင်းကတော့ ဒီနေရာဟာ အာဖရိကမှာ မဟာမိတ်တပ်တွေအဓိက စခန်းချရာ နေရာတစ်ခုဖြစ်ခဲ့ပါတယ်။ တချိန်က အလွန်စည်ကားခဲ့တဲ့နေရာဖြစ်ပေမယ့် ၁၉၆၀ ၀န်းကျင် အာဆွမ်ဆည်တည်ဆောက်မှုမှာ ဒေသခံပေါင်း ၅၂၀၀၀ ခန့်ဟာ ဒီနေရာကနေ ဖိအားပေးနှင်ထုတ်ခံခဲ့ရတာကြောင့် လက်ရှိအချိန်မှာတော့ လူဦးရေ ၁၅၀၀၀ လောက်ပဲ နေထိုင်ပါတော့တယ်။ နှစ်တစ်နှစ်ရဲ့ အပူဆုံးလတွေမှာ 49°C အထိပူလေ့ရှိပြီး စံချိန်တင်အပူချိန်ကတော့ ၁၉၆၇ခုနှစ်မှာ 52°C အထိပူပြင်းခဲ့ပါတယ်။

၇။ Tirat Zvi ၊ အစ္စရေး

Tirat Zvi ကတော့ အစ္စရေးရဲ့ ဘာသာရေးဆိုင်ရာ နယ်မြေတစ်ခုဖြစ်ပြီး ဂျော်ဒန် နဲ့ အစ္စရေးနယ်စပ် ဂျော်ဒန်မြစ်ရဲ့ အနောက်ဘက်ကမ်းမှာ တည်ရှိပါတယ်။ ဂျာမနီ ၊ ပိုလန် နဲ့ ရိုမေးနီးယားဒေသကနေ ထွက်ခွာလာကြတဲ့ ဂျူးလူမျိုးတွေက ဒီနေရာကို ထူထောင်ခဲ့ခြင်းဖြစ်ပါတယ်။ ဒီဒေသမှာ လူပေါင်း ၁ထောင်အောက်သာ နေထိုင်ပြီး အများစုက လယ်ယာလုပ်ငန်းနဲ့ အသက်မွေးကြပါတယ်။ ဒီဒေသရဲ့ ပျမ်းမျှအပူချိန်ဟာ 46°C ၀န်းကျင်မှာ ရှိနေပြီး အပူဆုံးစံချိန်တင်ခဲ့တာကတော့ ၁၉၄၂ခုနှစ်မှာ ဖြစ်ပါတယ်။ အဲဒီအချိန်က အပူချိန်ကတော့ 54°C အထိရှိခဲ့ပြီး အာရှရဲ့အမြင့်ဆုံးအပူချိန် အဖြစ် စံချိန်တင်ခဲ့ခြင်းဖြစ်ပါတယ်။

၆။ Timbuktu ၊ မာလီ

တင်ဘက်တူကတော့ ရှေးဟောင်းမြို့တစ်မြို့ဖြစ်ပြီး နိုင်ဂါမြစ်ရဲ့မြောက်ပိုင်း ဆာဟာရသဲကန္တာရ အနီးမှာ တည်ရှိပါတယ်။ တချိန်က အဲဒီဒေသရဲ့ အထင်ရှားဆုံးကုန်သွယ်ရေးဇုန်ဖြစ်ခဲ့တဲ့ ဒီနေရာဟာ လက်ရှိမှာလည်း လူဦးရေ ၅သောင်းကျော် နေထိုင်လျှက်ရှိပါတယ်။ ကန္တာရ ရာသီဥတုရှိတဲ့ ဒီမြို့ဟာ အမြဲတစေ ခြောက်သွေ့ပူပြင်းနေလေ့ရှိပြီး အပူဆုံးလတွေဖြစ်တဲ့ ဧပြီ ၊ မေ နဲ့ ဇွန် လတို့မှာ 40°C  အထက်မှာ ရှိနေတတ်ပြီး တခါတရံ 49°C အထိတောင် အပူချိန်မြင့်တက် တတ်ပါသေးတယ်။

၅။ Ghadames ၊ လစ်ဗျား

Ghadames ဟာ လစ်ဗျားကန္တာရဒေသရဲ့ အိုအေစစ်မြို့ဖြစ်သလို UNESCO ရဲ့ ကမ္ဘာ့အမွေအနှစ်အဖြစ် သတ်မှတ်ထိမ်းသိမ်းခံထားရတဲ့ နေရာလည်းဖြစ်ပါတယ်။ သဲကန္တာရဒေသထဲက အိုအေစစ်နေရာတစ်ခုဖြစ်တာကြောင့် ဒီနေရာကို ကန္တာရရဲ့ပုလဲရတနာ လို့ တင်စားခေါ်ဝေါ်လေ့ရှိကြပါတယ်။ ဒီနေရာဟာလည်း ကမ္ဘာ့အပူဆုံး ဒေသတွေထဲက တစ်ခုဖြစ်ပြီး ပျမ်းမျှအမြင့်ဆုံး အပူချိန်ဟာ 41°C ခန့်ရှိနေတတ်ပါတယ်။ လူဦးရေ ၁သောင်းခန့်နေထိုင်တဲ့ ဒီမြို့ရဲ့ စံချိန်တင်အမြင့်ဆုံး အပူချိန်ကတော့ 55°C ဖြစ်ပါတယ်။

၎။ Kebili ၊ တူနီးရှား

အာဖရိကမြောက်ပိုင်း တူနီးရှားနိုင်ငံရဲ့တောင်ပိုင်းမှာ တည်ရှိတဲ့ ရှေးဟောင်း အိုအေစစ်ဒေသ တစ်ခုဖြစ်ပါတယ်။ ပြူးနစ်စစ်ပွဲတွေပြီးတဲ့နောက်မှာတော့ ဒီနေရာဟာ ရောမအင်ပါယာရဲ့ပိုင်နက်တစ်ခု ဖြစ်ခဲ့ပါတယ်။ လူဦးရေ ၃သောင်းနီးပါး နေထိုင်တဲ့ဒီမြို့ဟာ အပူဆုံးနေရာတွေ ထဲမှာ ပါဝင်နေပါတယ်။ ပျမ်းမျှအမြင့်ဆုံး အပူချိန်ကတော့ 47°C ဖြစ်ပြီး စံချိန်တင်အပူချိန်ကတော့ ၁၉၁၃ခုနှစ်မှာ 55°C အထိပူပြင်းခဲ့ဖူးပါတယ်။

၃။ Rub’al Khali သဲကန္တာရ ၊ အာရေးဗျကျွန်းဆွယ်ဒေသ

Rub’al Khali သဲကန္တာရကတော့ ဆော်ဒီအာရေဗျ ၊ အိုမန် ၊ ယူအေအီး နဲ့ ယီမင်နိုင်ငံတွေမှာ တစိတ်တပိုင်းစီပါဝင်တဲ့ သဲကန္တာရတစ်ခုဖြစ်ပါတယ်။ သဲမြေတွေ တဆက်တည်းရှိတဲ့ ကြီးမားတဲ့ သဲကန္တာရတစ်ခုလည်းဖြစ်ပြီး အာရေဗျသဲကန္တာရရဲ့ တစိတ်တပိုင်းလည်းဖြစ်ပါတယ်။ ဒီသဲကန္တာရရဲ့ အကျယ်ကတော့ စတုရန်းမိုင် ၂သိန်းခွဲခန့်ဖြစ်ပါတယ်။ အပူဆုံးလတွေဖြစ်တဲ့ ဇူလိုင် နဲ့ သြဂုတ်လတွေမှာ 47°C အထိ ပူလေ့ရှိပြီး စံချိန်တင်အပူချိန်ကတော့ 56°C ဖြစ်ပါတယ်။

၂။ Death Valley ၊ အမေရိကန်

သေမင်းတောင်ကြားလို့ အများစုသိကြတဲ့ ဒီနေရာဟာ အမေရိကန်ကယ်လီဖိုးနီးယားပြည်နယ်ထဲမှာ တည်ရှိနေပါတယ်။ ကမ္ဘာ့အပူဆုံးနေရာတစ်ခုအဖြစ်သတ်မှတ်ခံထားရပြီး လူတွေ အခြေချနေထိုင်လို့မရနိုင်လောက်အောင် ပူပြင်းတဲ့နေရာ တစ်ခုလည်းဖြစ်ပါတယ်။ စတုရန်းမိုင် ၃ထောင်ခန့်ကျယ်ဝန်းတဲ့ ဒီနေရာရဲ့ ပျမ်းမျှအပူချိန်က 47°C ဖြစ်ပေမယ့် စံချိန်တင်အပူချိန်ကတော့ ၁၉၁၃ခုနှစ်မှာ 57°C အထိ ရှိခဲ့ဖူးပါတယ်။

၁။ Dasht-e Lut Desert ၊ အီရန်

အီရန်မှာရှိတဲ့ Dasht-e Lut ကန္တာရကို အမေရိကန်အာကာသ အေဂျင်စီအဖွဲ့ကြီးဖြစ်တဲ့ နာဆာက အပူဆုံးနေရာအဖြစ် သတ်မှတ်ထားပါတယ်။ ဆားမြေသဲကန္တာရဖြစ်ပြီး မီးတောင်ကျောက်များနဲ့ ဖုံးအုပ်ထားတဲ့ ဒီနေရာဟာ စတုရန်းမိုင် ၂သောင်း ခန့်ကျယ်ဝန်းပါတယ်။ ဒီနေရာဟာ လူတွေ တိရစ္ဆာန်တွေသာမက ဘက်တီးရီးယားပိုးမွှားတွေတောင် ရှင်သန်လို့မရနိုင်အောင် အပူချိန်ပြင်းထန်လွန်းပါတယ်။ နာဆာရဲ့ တသမတ်တည်း တိုင်းတာမှုအရ ဒီနေရာရဲ့ အမြင့်ဆုံးအပူချိန်ဟာ 70.5°C တောင်ရှိပါသတဲ့။

Ref :
Value Talk
Wikipedia

Leave a Reply