ဒုတိယကမ္ဘာစစ်ပုံရိပ်များ နှင့် ယနေ့မြင်ကွင်း

Posted on

ဒီဓာတ်ပုံကတော့ ဒုတိယကမ္ဘာစစ်အတွင်းက ရုရှားနိုင်ငံတောင်ပိုင်း စတာလင်ဂရက်မြို့မှာ ရိုက်ကူးခဲ့တဲ့ပုံဖြစ်ပါတယ်။ စတာလင်ဂရက်တိုက်ပွဲအတွင်းက ပုံဖြစ်ပါတယ်။ စတာလင်ဂရက်တိုက်ပွဲဟာ သြဂုတ် ၂၃ရက် ၁၉၄၂ခုနှစ်ကနေ ဖေဖော်ဝါရီလ ၂ရက်နေ့ ၁၉၄၃ခုနှစ်အထိ ဖြစ်ပွားခဲ့တဲ့ တိုက်ပွဲပါ။ ဒီတိုက်ပွဲမှာ ဆိုက်ဗီယက်ယူနီယံဟာ ဂျာမနီ ၊ ရိုမေးနီးယား ၊ အီတလီ ၊ ဟန်ဂေရီ ၊ ခရိုအေးရှား တပ်ပေါင်းစုနဲ့ တိုက်ခိုက်ခဲ့ရပါတယ်။ လူပေါင်း ၁သန်းကျော် သေကြေပျက်စီးခဲ့ရတဲ့ ဒီတိုက်ပွဲမှာ နောက်ဆုံးတော့ ဆိုဗီယက်က အနိုင်ရရှိခဲ့ပါတယ်။

ဒီပုံကတော့ ယနေ့မြင်ရတဲ့ စတာလင်ဂရက်မြို့ဖြစ်ပါတယ်။ စတာလင်ဂရက်လို့မခေါ်တော့ပဲ ဗော်လ်ဗိုဂရက်လို့ပြောင်းလဲခေါ်ဝေါ်ခဲ့ပြီး စစ်ရဲ့အထိမ်းအမှတ်အဖြစ် အမိမြေမှခေါ်သံ ရုပ်တုကြီးကို အထင်အရှားတွေ့နိုင်ပါတယ်။

ဒီပုံကတော့ ဘယ်လ်ဂျီယံ နဲ့ လူဇင်ဘတ်နိုင်ငံ ၂ခုလုံးမှာပါဝင်နေတဲ့ အာဒန်စ် ဒေသအတွင်းမှာ ရိုက်ကူးခဲ့တဲ့ပုံဖြစ်ပါတယ်။ Bulge တိုက်ပွဲအတွင်းက ပုံဖြစ်ပြီး ဒီတိုက်ပွဲဟာ ၁၉၄၄ခုနှစ် ဒီဇင်ဘာ ၁၆ရက်ကနေ ၁၉၄၅ဇန်နီဝါရီ ၂၅ရက်နေ့ အထိ ဖြစ်ပွားခဲ့ပါတယ်။ အမေရိကန် ၊ ဗြိတိန် ၊ ပြင်သစ်တို့ဦးဆောင်တဲ့ မဟာမိတ်တပ်ပေါင်းစု နဲ့ နာဇီဂျာမနီတို့ တိုက်ခိုက်ခဲ့ကြပြီး နောက်ဆုံးမှာတော့ မဟာမိတ်တပ်တွေ အနိုင်ရရှိခဲ့ပါတယ်။

စစ်ရဲ့အထိမ်းအမှတ်အဖြစ်မြင်နိုင်တဲ့ ယနေ့မြင်ကွင်းပါ။

ဟာဝိုင်ယီကျွန်းစုရဲ့ ပုလဲဆိပ်ကမ်းပါ။ ပုလဲဆိပ်ကမ်းတိုက်ပွဲအတွင်း ရိုက်ကူးခဲ့တာဖြစ်ပြီး ဒီပုံကိုတော့ ၁၉၄၁ခုနှစ် ဒီဇင်ဘာ ၇ ရက်နေ့က ရိုက်ကူးခဲ့ပါတယ်။ ပုလဲဆိပ်ကမ်းမှာ စခန်းချနေတဲ့ အမေရိကန်တပ်ကို ဂျပန်တပ်က အမှတ်မထင်ဝင်ရောက်တိုက်ခိုက်ခဲ့မှုကြောင့် အမေရိကန်ရေတပ်ရဲ့ စစ်သင်္ဘောကြီးများနစ်မြုပ်ပျက်စီးခဲ့ပါတယ်။ ဒီတိုက်ခိုက်မှုရဲ့အကျိုးဆက်ကနေ ဟီရိုရှီးမား နဲ့ နာဂါစကီ လို အနိဌာရုံဖြစ်ရပ်တွေ ဖြစ်ပွားခဲ့ရပါတယ်။

ဒီပုံကတော့ ယနေ့မြင်ရတဲ့ ပုလဲဆိပ်ကမ်း မြင်ကွင်းဖြစ်ပါတယ်။

ဒုတိယကမ္ဘာစစ်အတွင်း ဂျပန်ပိုင် Iwo_Jima ကျွန်းမှာ ရိုက်ကူးခဲ့တဲ့ဓာတ်ပုံပါ။ Iwo_Jima တိုက်ပွဲဟာ ဖေဖော်ဝါရီ ၁၉ရက်ကနေ မတ်လ ၂၆ရက် ၁၉၄၅ခုနှစ် အထိဖြစ်ပွားခဲ့ပြီး အမေရိကန်နဲ့ ဂျပန်တို့ရဲ့တိုက်ပွဲပါ။ နှစ်ဖက်ပေါင်း လူ ၅သောင်းနီးပါး သေကြေပျက်စီးခဲ့ရပြီး အင်အားအဆပေါင်းများစွာပိုသာတဲ့ အမေရိကန်တို့အနိုင်ရရှိခဲ့ပါတယ်။

ဒါကတော့ Iwo Jima ကျွန်းရဲ့ ယနေ့မြင်ကွင်းဖြစ်ပါတယ်။

အီဂျစ်မြို့ El Alamein မှာ ရိုက်ကူးထားတဲ့ပုံဖြစ်ပါတယ်။ El Alamein ဒုတိယတိုက်ပွဲအတွင်းက ပုံဖြစ်ပြီး ဂျာမနီ ၊ အီတလီ တပ်တွေ နဲ့ ဗြိတိန်ဦးဆောင်တဲ့ မဟာမိတ်တပ်တွေ တိုက်ခိုက်ခဲ့ကြတာပါ။ အောက်တိုဘာ ၂၃ ကနေ နိုဝင်ဘာ ၁၁ ရက်နေ့ ၁၉၄၂ခုနှစ်ထိ ဖြစ်ပွားခဲ့ပါတယ်။ ဒီစစ်ပွဲမှာ အမေရိကန်က လုံးလုံးလျားလျားပါဝင်ခြင်းမရှိပဲ လေကြောင်းအကူအဖြစ်သာ ပါဝင်ခဲ့ပါတယ်။ လူပေါင်း ၇သောင်းနီးပါး သေကြေခဲ့ရပြီး မဟာမိတ်တပ်တွေ အနိုင်ရရှိခဲ့ပါတယ်။

ယနေ့မှာတော့ ဒီနေရာမှာ စစ်ရဲ့အကျိုးဆက်အနေနဲ့ ကျဆုံးခဲ့တဲ့စစ်သားတွေရဲ့ သင်္ချိုင်းမှတ်တိုင်တွေကို အစီအရီမြင်ရမှာဖြစ်ပါတယ်။

ဒုတိယကမ္ဘာစစ်အတွင်းက ပြင်သစ်နိုင်ငံ နော်မန်ဒီကမ်းခြေမှာ ရိုက်ကူးခဲ့တဲ့ ဓာတ်ပုံပါ။ နော်မန်ဒီကမ်းတက်တိုက်ပွဲအဖြစ် ကမ္ဘာကျော်ပါတယ်။ ၁၉၄၄ခုနှစ် ဇွန်လ ၆ရက်နေ့ကနေ ဇူလိုင်လ လယ်အထိ ဖြစ်ပွားခဲ့တဲ့ တိုက်ပွဲပါ။ မဟာမိတ်တပ်တွေ နဲ့ နာဇီဂျာမနီတို့တိုက်ခိုက်ခဲ့တဲ့ ဒီတိုက်ပွဲမှာ မဟာမိတ်ဘက်က အနိုင်ရရှိခဲ့ပြီး နှစ်ဖက်ပေါင်း လူ ၂သိန်းကျော် ကျဆုံးခဲ့ရပါတယ်။

ဒါကတော့ နော်မန်ဒီကမ်းခြေရဲ့ ယနေ့မြင်ကွင်းဖြစ်ပါတယ်။

ဂျပန်နိုင်ငံ အိုကီနာဝါကျွန်းမှာ ရိုက်ကူးခဲ့တဲ့ပုံပါ။ အိုကီနာဝါတိုက်ပွဲဟာ ဒုတိယကမ္ဘာစစ်ရဲ့ နောက်ဆုံးတိုက်ပွဲကြီးဖြစ်ပြီး အမေရိကန်ဦးဆောင်တဲ့ တပ်တွေနဲ့ ဂျပန်တပ်တွေ တိုက်ခိုက်ခဲ့ကြတဲ့တိုက်ပွဲပါ။ အိုကီနာဝါတိုက်ပွဲဟာ ၁၉၄၅ခုနှစ် ဧပြီလ၁ရက်နေ့ကနေ ဇွန်လ ၂၂ရက်နေ့အထိ ဖြစ်ပွားခဲ့ပါတယ်။ အမေရိကန်ဘက်က ရေတပ်အနေနဲ့ ဗြိတိန် ၊ ကနေဒါ ၊ သြစတြေးလျ နဲ့ နယူးဇီလန်တပ်တွေပါဝင်တိုက်ခိုက်ခဲ့ကြပါတယ်။ လူပေါင်း ၁၃၀၀၀၀ ခန့်သေကြေခဲ့ရပြီး နောက်ဆုံးမှာတော့ အမေရိကန်တပ်တွေ အနိုင်ရရှိခဲ့ပါတယ်။

ယနေ့မှာတော့ ဒီနေရာဟာ စစ်ရဲ့အထိမ်းအမှတ်သင်္ချိုင်းတစ်ခုဖြစ်လာခဲ့ရပါတယ်။

သုတဇုန်

Leave a Reply