အာသောကမင်းကြီးရဲ့ ကောင်းမှုတော် ဆန်ချီစေတီတော်

Posted on

ဆန်ချီသည် အိန္ဒိယနိုင်ငံအလယ်ပိုင်း ဗိုပါးစီရင်စု၊ ဗိုပါး မြို့၏ အရှေ့မြောက် ၂၃ မိုင်အကွာတွင်တည်ရှိသော ရွာကလေး တစ်ရွာဖြစ်သည်။ ယင်းဆန်ချီရွာကလေးသည် ရှေးခေတ် အိန္ဒိယယဉ်ကျေးမှုနှင့် ဆက်စပ်လျက်ရှိပေသည်။ သီရိဓမ္မာသောကမင်း (ဘီစီ ၂၇၃-၂၃၂) သည် ကလိင်္ဂ တိုင်းကို အောင်မြင်ပြီးနောက်၊ အသက်အိုးအိမ် စည်းစိမ်ဥစ္စာ အမြောက်အမြား ဆုံးရှုံးပျက်စီးကြရသည်ကို မြင်၍၊ တရား သံဝေဂရယူကာ စစ်ဖြင့်အောင်နိုင်ခြင်းကိုစွန့်လွှတ်လျက်၊ တရား ဓမ္မဖြင့် အောင်နိုင်ခြင်းသို့ ရှေးရှုခဲ့လေသည်။

ထိုမှစ၍ အိန္ဒိယ နိုင်ငံတော်အဝှမ်း၌ ရေတွင်းရေကန် တူးခြင်း၊ ဘုရားပုထိုးစေတီ ဂူကျောင်းတည်ဆောက်ခြင်းအစရှိသော ဗုဒ္ဓဘာသာနှင့် စပ်လျဉ်း သည့်အမှုများကိုပြုလုပ်ခဲ့၏။ ဗုဒ္ဓသာသနာသည်လည်း မင်းကြီး ၏လက်ထက်၌ တိုးတက်ထွန်းကား၍ လာခဲ့လေသည်။ ယင်း သို့ ဗုဒ္ဓဘာသာထွန်းကား တိုးတက်ခဲ့သည်နှင့်အမျှ၊ ဗုဒ္ဓမြတ်စွာ နှင့် ဗုဒ္ဓသာသနာကို ကြည်ညိုစိတ်ထက်သန်သော သူတို့သည် အိန္ဒိယနိုင်ငံအဝှမ်း၌ များစွာပေါ်ပေါက်ခဲ့လေသည်။

မြတ်စွာဘုရား ပရိနိဗ္ဗာန်ပြုပြီးသည့်နောက်တွင်ကား၊ ဗုဒ္ဓဘာသာဝင်တို့သည် ဘုရား၏ဓာတ်တော် မွေတော်များကို ခိုင်ခံ့ လုံခြုံသော ထူပါရုံစေတီတော်ကြီးများ၌ ဌာပနာကြ၏။ ယင်း ထူပါရုံ စေတီတော်ကြီးများကို လည်း ကြည်ညိုဖွယ်ဖြစ်အောင် အဆန်းတကြယ် တည်ထားဆောက်လုပ်ခဲ့ကြလေသည်။

ဤသို့ ဖြင့် သီရိဓမ္မာသောကမင်း၏ ခေတ်လောက်မှစ၍ ထူပါရုံစေတီ တော်ကြီးများသည် ဆန်ချီရွာတစ်ဝှန်း၌ ပေါ်ထွန်းခဲ့ကြရာ ထို အကြောင်းကိုမှီ၍ ဆန်ချီရွာသည် ရာဇဝင်တွင် ထင်ရှားကျော် စော၍လာခဲ့ပေသည်။ထူပါရုံစေတီတော်ကြီးများကို ဗီတွာမြစ်၏ လက်ဝဲဖက် ကမ်း၊ ပေ ၃ဝဝ အမြင့်ရှိသော သဲကျောက်တောင်ကုန်းငယ် တစ်ခုတွင် တည်ထားဆောက်လုပ်ခဲ့ကြသည်။ ဆန်ချီတောင်ကုန်း ပေါ်၌ကား ထူပါရုံစေတီတော်ကြီးပေါင်း ၁ဝ ဆူမျှ ရှိခဲ့လေ သည်။

ဆန်ချီအရပ်သည် နှစ်ပေါင်း ၁၃၀၀ကျော် ဗုဒ္ဓဘာသာထွန်းကားခဲ့ရာနေရာဖြစ်ပြီး ရဟန်းတော်များ၏ ကျောင်းဆောင်အများအပြား တည်ရှိခဲ့ရာ သာသနာနယ်မြေဖြစ်ခဲ့သည်။ သို့သော်လည်း နောက်ပိုင်းတွင် တဖြည်းဖြည်းတိမ်ကောခဲ့ပြီး သစ်ပင်ကြီးများ ခြုံနွယ်များဖုံးလွှမ်းနေသည့် လူသူကင်းမဲ့သောနေရာတစ်ခု ဖြစ်ခဲ့သည်။ ထိုနေရာကို ဗိုလ်ချုပ် Taylor က သူ့စစ်တပ်နှင့်အတူ သွားရောက်ရာမှ ပြန်လည်တွေ့ရှိခဲ့ခြင်းဖြစ်သည်။

ထူပါရုံစေတီတော်ကြီးများအနက် ထူပါရုံတစ်ခု၏ ဌာပနာတိုက်အတွင်းမှ ရှင်သာရိပုတ္တရာနှင့် ရှင်မောဂ္ဂလာန်တို့၏ ဓာတ်တော်များကို ၁၈၅၁ ခုနှစ်တွင် တူးဖေါ်ရရှိသည်။ ထိုသို့ ရရှိသောဓာတ်တော်တို့ကို ဗြိတိသျှအစိုးရတို့က လန်ဒန်မြို့သို့ ပင့်ဆောင်၍ သွားလေသည်။

အိန္ဒိယနိုင်ငံလွတ်လပ်ရေးရသော အခါ ဗြိတိသျှအစိုးရသည် ထိုဓာတ်တော်တို့ကို အိန္ဒိယနိုင်ငံသို့ ပြန်ပို့သဖြင့် အိန္ဒိယနိုင်ငံအစိုးရသည် ၁၉၅၂ ခုနှစ် နိုဝင်ဘာလ ၃ဝ ရက်နေ့တွင် မူလထူပါရုံအနီး၌ တည်ဆောက်ထားသော ကျောင်းတော်အသစ်၌ ဓာတ်တော် တို့ကို ပြန်လည်ဌာပနာလေသည်။

ဆန်ချီစေတီတော်ဟုလူသိများသည့် စေတီကြီးကိုယခုအခါ ကောင်းမွန်စွာထိန်းသိမ်းစောင့်ရှောက်ထားသည်။ ဓမ္မသောကမင်းတရားကြီး၏ ကောင်းမှုတော် ဆန်ချီစေတီတော်သည် ဘိုပါမြို့၊ ပရာဒေ့ရ်ှပြည်နယ်၊ အိန္ဒိယနိုင်ငံတွင် တည်ရှိသည်။ စေတီတော်ကြီးတည်ရှိရာ ကုန်းတော်ကို ဆန်ချီကုန်းဟု ခေါ်သည်။ ဆန်ချီ၏ အဓိပ္ပါယ်မှာ ရတနာများစုဆောင်းရာနေရာဟု အဓိပ္ပါယ်ရသည်။

စေတီတော်သည် အလွန်ထည်ဝါတဲ့ အဆောက်အဦးဖြစ်ပြီး၊ အချင်းအား ဖြင့် ၁ဝ၃ ပေခန့်ရှိ လျက်၊ ဉာဏ်တော်အားဖြင့် ၄၂ ပေခန့် ရှိ၏။ ပုံပန်းမှာ အခြေ၌ ပစ္စယာ အဆင့်ဆင့်ခံထား၏။ ပစ္စယာ ပေါ်၌ ဥသဏ္ဌာန်စေတီပုံတည်၍၊ အထက်ဆုံး၌ အချင်း ၃၄ ပေရှိသော ပလ္လင်နှင့် ထီးတို့ရှိလေသည်။ ပစ္စယာသို့ လှေကား ဖြင့်တက်ရ၏။ ပစ္စယာပတ်လည်တွင်လည်း ကျောက်လက်ရန်း ရှိလေသည်။

ထူပါရုံစေတီတော်ကြီး တစ်ခုလုံး၏ပတ်လည် ၌ကား အရံတံတိုင်းရှိ၏။ ယင်းတံတိုင်းလေးမျက်နှာတွင် ၁၈ ပေစီရှိသော မုခ်ပေါက်လေးပေါက်ရှိ၍၊ မုခ်ပေါက်တိုင်းတွင် တုရိုဏ်တစ်ခုစီရှိလေသည်။ ယင်းမုခ်ပေါက်နှင့် ကျောက်လက် ရန်းများ၌ကား၊ ဗုဒ္ဓမြတ်စွာ၏ ဖြစ်စဉ်များ၊ နိပါတ်တော်များကို ပန်းတမော့ပညာ လက်ရာမြောက်စွာဖြင့် ကျောက်ရုပ်ကျောက် ပန်းများထု၍၊ ကျောက်စာများကိုလည်း ရေးထိုးမော်ကွန်းတင် ထားရစ်ခဲ့ကြလေသည်။ ထိုမုခ်ပေါက်များအနက် တောင်ဘက်မုခ်ဦးသည် ရှေးအကျဆုံးဖြစ်ပြီး အန္ဓရမင်းဆက် အစောပိုင်းကာလမှာတည်ဆောက်ခဲ့ခြင်းဖြစ်သည်။

ထို့ကြောင့် ဆန်ချီစေတီတော်ကြီးအား မောရိယမင်းဆက်၊ သုင်္ဂမင်းဆက်နဲ့ အန္ဓရမင်းဆက်များ အုပ်စိုးစဉ်ကာလတစ်လျှောက်မှာ တစ်ရစ်ခြင်း တိုးချဲ့တည်ထားခဲ့တာဖြစ်ကြောင်း သိရသည်။ စေတီတော်၏ မုဒ်ဦးလေးခုသည် အလွန်ပြောက်မြောက်ပြီး အနုစိတ်တဲ့ရုပ်ကြွတွေနဲ့မွှမ်းမံထားတာဖြစ်သည့်အတွက် အနုပညာသမိုင်းမှာ ကျော်ကြား လှသည်။ ဆန်ချီစေတီတော်ကြီးအား ၁၉၈၉ခုနှစ် တွင် ယူနက်စကိုမှ ကမ္ဘာ့အမွေအနှစ်အဖြစ် ထည့်သွင်းသတ်မှတ်ခဲ့သည်။

VIDEO

Myanmar Wikipedia
En Wikipedia

Leave a Reply