ကမ္ဘာ့အကြီးဆုံး မိုင်းတွင်းကြီး

Posted on

လူသားတွေဟာ မြေကြီးထဲက တွင်းထွက် သတ္တု နဲ့ သယံဇာတတွေကို ထုတ်ယူနိုင်ဖို့အတွက် ဧရာမကျင်းကြီးတွေကို တူးခဲ့ကြပါတယ်။ ဒီအထဲမှာ အထင်ရှားဆုံးကတော့ ရုရှားက မာနီစိန်တွင်းကြီးဖြစ်ပါတယ်။ ဒါပေမယ့် မာနီစိန်တွင်းက လူသားတို့ တူးဖော်ခဲ့သမျှထဲမှာ ကမ္ဘာ့ဒုတိယအကြီးဆုံးမိုင်းတွင်း သာဖြစ်ပါတယ်။ ဒါဆိုရင် ပထမ အကြီးဆုံးက ဘယ်ဟာလဲ…

ပထမအကြီးဆုံးကတော့ အမေရိကန်မှာရှိတဲ့ Bingham Canyon ကြေးနီတွင်းဖြစ်ပါတယ်။ Bingham Canyon Mine ဟာ သမိုင်းတစ်လျှောက် လူတွေတူးဖော်ခဲ့သမျှ တွင်းကြီးတွေထဲမှာ အကြီးဆုံးတွင်းကြီးဖြစ်ပါတယ်။ Kennecott ကြေးနီမိုင်းလို့လည်း ခေါ်ဝေါ်ကြပြီး ကမ္ဘာပေါ်က ကြေးနီအထွက်ဆုံးမိုင်းတွင်းဖြစ်ပါတယ်။ ကြေးနီတန်ချိန်ကြောင်း ၁၉သန်းကျော်ကို ထုတ်လုပ်ခဲ့ပြီးဖြစ်ပါတယ်။ ကြေးနီအပြင် ရွှေ ၊ ငွေ နဲ့ ဆာလဖျူရစ်အက်ဆစ်တွေကိုလည်း ထုတ်လုပ်ရရှိပါတယ်။

ဒီတွင်းကြီးဟာ အမေရိကန်နိုင်ငံ Utah ပြည်နယ် Salt Lake County မှာ တည်ရှိပါတယ်။ ဗြိတိသျှ-သြစတြေးလျှ ကေ်ာပိုရေးရှင်းကြီးဖြစ်တဲ့ Rio Tinto Group က ပိုင်ဆိုင်ပါတယ်။ ဒီမိုင်းတွင်းကြီးမှ ကြေးနီတွေကို ၁၉၀၆ခုနှစ်တည်းက စတင်ထုတ်လုပ်ခဲ့တာဖြစ်ပြီး တွင်းရဲ့အတိုင်းအတာကတော့ အကျယ် ၂.၅မိုင် ၊ အနက် ၀.၆မိုင် ရှိပါတယ်။ အကျယ်အ၀န်းဧရိယာကတော့ ၁၉၀၀ တောင်ရှိပြီး ကြီးမားလွန်းတာကြောင့် အာကာသယာဉ်မှူးတွေဟာ အမေရိကန်နိုင်ငံပေါ်ကို ဖြတ်ပျံသန်းတဲ့အခါ ဒီတွင်းကြီးကို မြင်နိုင်တယ်လို့ ဆိုပါတယ်။

ဒီတွင်းကြီးနေရာမှာ ကြေးနီထွက်တဲ့အကြောင်းကို ၁၈၄၈ခုနှစ်လောက်က Sanford နဲ့Thomas Bingham ဆိုတဲ့ ညီအစ်ကိုနှစ်ယောက်က ပထမဆုံး ရှာဖွေသိရှိခဲ့ကြပါတယ်။ သူတို့ဟာ သူတို့ရဲ့အဖွဲ့ခေါင်းဆောင် Brigham Young ထံ ဒီအကြောင်းကိုပြောပြပေမယ့် စိတ်ဝင်စားခြင်းမရှိခဲ့ပါဘူး။ အဲဒီတုန်းက ခေါင်းဆောင်ရဲ့ဆုံးဖြတ်ချက်ကို မလွန်ဆန်နိုင်တာကြောင့် အဲဒီနေရာကို မှတ်သားရုံပဲမှတ်သားခဲ့ပါတယ်။ ၁၈၅၀ မှာ Bingham မိသားစုဟာ Weber နယ်မြေကိုပြောင်းရွှေ့သွားပေမယ့် သူတို့နေခဲ့တဲ့နေရာကတော့ မိသားစုနာမည်  Bingham လို့ အမည်တွင်ခဲ့ပါတယ်။

အခြား သတ္တုတူးဖော်ရေးလုပ်ငန်းရှင်တွဟာ ဒီနေရာကို အကြိမ်ကြိမ်စမ်းသပ်တူးဖော်ခဲ့ပေမယ့် ၁၉ရာစုအကုန်အထိတော့ ဒီမိုင်းတွင်းရဲ့ အရွယ်အစားဟာ အလွန်သေးငယ်တဲ့အရွယ်ပဲ ရှိပါတယ်။ ၁၉၀၆ခုနှစ်မှာတော့ Utah ကြေးနီကုမ္ပဏီက တူးဖော်ရေးလုပ်ငန်းတွေကို အကြီးအကျယ်စတင်လုပ်ဆောင်ပါတော့တယ်။ ဒီနေရာမှာ တ၀ိုက်မှာ သတ္တုတွင်းကို အပြိုင်အဆိုင်တူးဖော်ရာကနေ ၁၉၁၂မှာတော့ ဒီနေရာဟာ ကမ္ဘာ့အရှုပ်ထွေးဆုံး သတ္တုတွင်းဇုန် ဖြစ်လာခဲ့တယ်။

အဲဒီအချိန်က တူးဖော်ရေးအတွက် လူ့အရင်းအမြစ်ကို အဓိကထားသုံးရတာကြောင့် ဒီနေရာမှာ အခြေချနေထိုင်သူတွေများလာခဲ့တယ်။ လူဦးရေ ၁၅၀၀၀ အထိရှိလာပြီး မြို့တစ်မြို့လိုဖြစ်လာခဲ့တယ်။ ကြေးနီတင်မက အခြားသတ္တုတွေပါ ထွက်တာကြောင့် တူးရင်းတူးရင်း တွင်းကြီးဟာ တဖြည်းဖြည်း ပိုပိုကျယ်လာခဲ့တယ်။ ၁၉၈၀မှာတော့ နည်းပညာတွေတိုးတက်လာကြောင့် လူ့အားကို သိပ်မလိုတော့တဲ့အတွက် ဒီနေရာမှာ လူဦးရေ အဆမတန်ကျဆင်းသွားပြီး ၈၀၀ ခန့်သာ ကျန်ခဲ့ပါတော့တယ်။

လက်ရှိပိုင်ဆိုင်သူ Rio Tinto ကုမ္ပဏီဟာ မူလ Kennecott Utah Copper ကုမ္ပဏီကို ၀ယ်ယူခဲ့ပြီး ဒီတူးဖော်ရေးလုပ်ငန်းတွေအတွက် အမေရိကန်ဒေါ်လာ ၂ဘီလျံကို ရင်းနှီးမြုပ်နှံခဲ့ပါတယ်။ လက်ရှိတူးဖော်ရေး လုပ်ငန်းဟာ ၂၀၁၉မှာ သက်တမ်းကုန်ဆုံးတော့မှာဖြစ်ပေမယ့် Rio Tinto ကတော့ နောက်ထပ်ပေ ၁၀၀၀ ခန့်ထပ်ချဲ့ပြီး ၂၀၃၀ခုနှစ်လောက်အထိ တူးဖော်ဦးမယ်လို့ သိရပါတယ်။ ဒါပေမယ့် ကုမ္ပဏီရဲ့ ဒါရိုက်တာအဖွဲ့ နဲ့ ပတ်ဝန်းကျင်ထိမ်းသိမ်းရေး အဖွဲ့တွေရဲ့ ခွင့်ပြုချက်ရရှိမှ ဆက်တူးဖော်လို့ရမှာ ဖြစ်ပါတယ်။

ဒီနေရာကို သမိုင်းဝင်နယ်မြေတစ်ခုအဖြစ် ၁၉၆၆ခုနှစ်ကတည်းက သတ်မှတ်ထားခဲ့ပြီး ကမ္ဘာလှည့်ခရီးသွားများစွာ လာရောက်လည်ပတ်လျှက်ရှိပါတယ်။ လေ့လာရေးဆိုဒ်နေရာမှာတော့ ဒီနေရာရဲ့အစဉ်အဆက် သတ္တုတူးဖော်ရေး မှတ်တမ်းပုံတွေ နဲ့ သတ္တုတွေဟာ လူတွေရဲ့နေ့စဉ်ဘ၀တွေမှာ အရေးပါတဲ့အကြောင်းကို ရှင်းပြထားပါတယ်။ ဥပမာ ကျွန်တော်တို့နေစဉ်သုံးစွဲနေတဲ့ ကွန်ပျူတာ ၊ ဖုန်း ၊ သွားတိုက်ဆေး ၊ ဆပ်ပြာ စတာတွေဟာ မိုင်းတွင်းရဲ့ထုတ်ကုန်တွေဖြစ်ပါတယ်။ ၂၀၁၃ခုနှစ် ဧပြီလ နဲ့ စက်တင်ဘာလ တွေတုန်းက ဒီမိုင်းတွင်းမှာ မြေပြိုမှုတွေဖြစ်ခဲ့ပါသေးတယ်။

VIDEO

Leave a Reply