နာမည်ကျော် အမျိုးသမီးပင်လယ်ဓားပြ နှစ်ယောက်

ဆရာကြီး လူထုစိန်ဝင်း၏ စာစုကို Ko Kyel Sin (ဗဟုသုတကြယ်စင်ဂရု)မှ စာရိုက်တင်ပါသည်။

အန်းဘွန်နီ (Anne Bonney)နဲ့ မေရီရိဒ် (Mary Read) တို့ကတော့ နာမည်ကျော် မိန်းမ ပင်လယ်ဓားပြကြီးတွေ ဖြစ်ကြပါတယ်။ နာမည်ကျော်ကြားသူတို့ ထုံးစံအတိုင်း သူတို့နှစ်ဦးနဲ့ ပတ်သက်တဲ့ ယုံတမ်းပုံပြင်တွေက အများကြီး ရှိခဲ့ပါတယ်။

အန်းဘွန်နီ (Anne Bonney)

အန်းဟာ အိုင်ယာလန် နိုင်ငံသား နာမည်ကြီး ရှေ့နေ ဝီလျံသောမတ်နဲ့ သူ့အစေခံမတစ်ဦးတို့ တိတ်တိတ်ပုန်းရတဲ့ ကလေး ဖြစ်ပါတယ်။ သူမကို ၁၆၉၇ခုနှစ်မှာ မွေးဖွားခဲ့တာဖြစ်ပါတယ်။ နောက်တော့ ဝီလျံက အမေရိကန်နိုင်ငံကို ပြောင်းရွှေ့နေထိုင်ပြီး စိုက်ပျိုးရေးလုပ်ငန်း၊ ကုန်သွယ်ရေးလုပ်ငန်းတွေနဲ့ အောင်မြင်ကြီးပွားသွားပါတယ်။ အန်းရဲ့မိခင် ဆုံးသွားတော့ ဝီလျံက သူ့သမီး အန်းကို သူ့လက်ထောက်နဲ့ အိမ်ထောင်ထိန်းနေရာမှာ အလုပ်ပေးထားပါတယ်။ အန်း ၁၇ နှစ်သမီး အရွယ်မှာ အိမ်ထောင်ရှိတဲ့ သင်္ဘောသားတစ်ယောက်နဲ့ ချစ်ကြိုက်မိတာကြောင့် သူ့အဖေက နှင်ထုတ်လိုက်ပါတယ်။

သင်္ဘောသား ဂျိမ်းဘွန်နီနဲ့အတူ အန်းဟာ အနောက်အိန္ဒိယကျွန်းစုဘက်ကို လိုက်ပါသွားပါတယ်။ အဲဒီ့မှာ ပင်လယ်ဓားပြကြီး ကာလီကိုဂျက် လို့ခေါ်တဲ့ ကျွန်ရက်ခမ်က အန်းကိုတွေ့ပြီး သဘောကျသွားပါတယ်။ သူက အန်းကို ဝယ်ယူဖို့ ကမ်းလှမ်းပေမယ့် ဂျိမ်းက လက်မခံဘဲ အန်းကို လူပုံအလယ်မှာ မျောက်မ,ထားမှုနဲ့ ရိုက်နှက် ထိုးကြိတ်ပါတယ်။

အန်းက စိတ်နာပြီး ကာလီကိုဂျက်နဲ့ လိုက်ပြေးပါတော့တယ်။ အဲဒီ့နောက်တော့ သူကိုယ်တိုင် ယောကျ်ားလိုဝတ်ပြီး ကာလီကိုဂျက်နဲ့အတူ ပင်လယ်ဓားပြ လုပ်နေပါတော့တယ်။ သူသဘောမကျရင် ရက်ရက်စက်စက် သတ်ဖြတ်ပစ်တတ်တဲ့အတွက် ပင်လယ်ဓားပြတွေက အန်းကို ဖိမ့်ဖိမ့်တုန်အောင် ကြောက်ရွံ့ကြရတယ်လို့ ဆိုကြပါတယ်။

မေရီရိဒ် (Mary Read)

မေရီရိဒ်အကြောင်းကတော့ သိပ်မသိရပါဘူး။ တရားမဝင် ရလာတဲ့ ကလေးလို့ပဲ ဆိုကြပါတယ်။ သူ့ကို ၁၆၈၅ခုနှစ်မှာ မွေးပြီးနောက်တော့ သူ့မိခင်ဟာ မေရီကို ယောကျ်ားလေးတစ်ယောက်လို ဝတ်ဆင်ပေးပြီး ပြင်သစ်နိုင်ငံမှာ သွားရောက်နေထိုင်ပါတယ်။ သားအမိနှစ်ယောက် ပြင်သစ်မှာ အလစ်သုတ်တဲ့ အလုပ်၊ ခိုးတဲ့အလုပ်တွေ လုပ်ပြီး အသက်မွေးကြရပါတယ်။

မေရီ ၉ နှစ်အရွယ် ရောက်တော့ သူ့မိခင်က ပြင်သစ်အမျိုးသမီးကြီး တစ်ယောက်ဆီကို လက်ပါးစေအဖြစ် ရောင်းလိုက်ပါတယ်။ မေရီက အဲဒီ့အလုပ်ကို မနှစ်မြို့ပါဘူး။ အဲဒါကြောင့် ထွက်ပြေးပြီး စစ်ထဲ ဝင်လိုက်ပါတယ်။ တပ်ထဲမှာ တွေ့ရတဲ့ စစ်သားတစ်ဦးကို မေရီက စုံမက်မိတာကြောင့် သူမိန်းမဖြစ်ကြောင်း ဖွင့်ပြောလိုက်ပါတယ်။ အဲဒီ့နောက် သူတို့ လက်ထပ်လိုက်ကြပါတယ်။ ဒါပေမယ့်လို့ လက်ထပ်ပြီး ၆ လ အကြာမှာ သူ့ခင်ပွန်း တိုက်ပွဲမှာ သေဆုံးသွားခဲ့လို့ ၁၆ နှစ် သမီးသာ ရှိသေးတဲ့ မေရီခမျာ မုဆိုးမအဖြစ် ကျန်ရစ်ပါတော့တယ်။

အဲဒီ့နောက် မေရီဟာ ယောကျ်ားလေးလို ပြန်ဝတ်ပြီး ကုန်သင်္ဘောတစ်စင်းမှာ အလုပ်ဝင်လုပ်ပါတယ်။ အဲဒီ့သင်္ဘော ပင်လယ်ထဲမှာ ပင်လယ်ဓားပြ တိုက်ခံရတဲ့အခါကျတော့ မေရီက မိန်းမဖြစ်ကြောင်းသိပြီး အစော်ကားခံရမှာ စိုးတဲ့အတွက် ပင်လယ်ဓားပြအဖွဲ့ ဝင်လုပ်ပါရစေဆိုပြီး လိုက်ပါသွားခဲ့ပါတယ်။ ပင်လယ်ဓားပြတွေနဲ့အတူ သင်္ဘောတွေ အတော်များများကို တိုက်ခိုက် လုယက်ရာမှာ ပါဝင်ခဲ့ပေမယ့် မေရီက သဘောမကျပါဘူး။

အဲဒီ့အချိန်မှာ ပင်လယ်ဓားပြတွေကို လွတ်ငြိမ်းချမ်းသာခွင့် ပေးတဲ့အခါ မေရီက ကုန်းပေါ်ပြန်တက်လာပြီး အနောက်အိန္ဒိယ ကျွန်းစုက အရက်ဆိုင် တစ်ဆိုင်မှာ အလုပ် ဝင်လုပ်ပါတယ်။ ဒါပေမယ့်လို့ စွန့်စွန့်စားစား သွားလာလှုပ်ရှား နေရတဲ့ဘဝမှာ မွေ့လျော်ခဲ့ဖူးသူက ဘားဆိုင်က အလုပ်ကို ငြီးငွေ့စရာကြီးလို့ သဘောထားမိမှာပါပဲ။ နောက်တော့ ကာလီကိုဂျက်ရဲ့ အဖွဲ့ထဲရောက်ပြီး မေရီ၊ အန်းနဲ့ ကာလီကိုဂျက်တို့ရဲ့ သုံးပွင့်ဆိုင်ဇာတ်ကို ကခဲ့ကြပါတယ်။

မေရီနဲ့ အန်းတို့နှစ်ဦးဟာ ကာလီကိုဂျက်ရဲ့အဖွဲ့မှာ ထိပ်ပိုင်းရာထူးတွေရခဲ့ကြပြီး လုယက်မှုပေါင်းများစွာကို အတွဲညီညီကျူးလွန်ခဲ့ကြပါတယ်။ အဲဒီအချိန်က ငါးဖမ်းသင်္ဘောတွေ ၊ ကုန်တင်သင်္ဘောတွေဟာ သူတို့နှစ်ဦးကို အလွန်ပဲကြောက်ရွံ့ကြပါတယ်။

၁၇၂၀ ပြည့်နှစ်မှာ သူတို့သင်္ဘော အဖမ်းခံရပြီး သေဒဏ်ချမှတ်ခြင်း ခံကြရပါတယ်။ ကာလီကိုဂျက်က ချက်ချင်း ကြိုးပေးသတ်ခံရပေမယ့် မေရီနဲ့ အန်း မိန်းမနှစ်ယောက်ကတော့ ပဋိသန္ဓေ ဆောင်ထားရကြောင်း လျှောက်လဲကြလို့ ချက်ချင်း အသတ်မခံရပါဘူး။ မေရီခမျာ အဖမ်းခံရပြီး မကြာမီမှာပဲ ထောင်ထဲမှာ ကွယ်လွန်သွားခဲ့ပါတယ်။

အန်းကိုတော့ သူ့ဖခင်က ရွေးထုတ် ကယ်တင်ခဲ့တဲ့အတွက် လွတ်မြောက်သွားခဲ့ပါတယ်။ အန်းဟာ ကယ်လီဖိုးနီးယားတောင်ပိုင်းကို ပြန်လာခဲ့ပြီး အသက် ၈၀ ဝန်းကျင်အရွယ်မှ ကွယ်လွန်သွားခဲ့ပါတယ်။

ဆရာကြီး လူထုစိန်ဝင်း၏ စာစုကို Ko Kyel Sin (ဗဟုသုတကြယ်စင်ဂရု)မှ စာရိုက်တင်ပါသည်။