ကမ္ဘာ့အလှဆုံး ဗင်းနစ်မြို့အကြောင်း

ရေးသားသူ – ပြည့်ဖြိုးဟိန်း

ဗင်းနစ်သည် တူးမြောင်းများဖြင့်ပိုင်းခြားထားပြီး တံတားများဖြင့်ဆက်သွယ်ထားသည့် ကျွန်းငယ်(၁၁၈)ခုကိုစုပေါင်း ပြီးတည်ဆောက်ထားသည့် အီတလီနိုင်ငံအရှေ့မြောက်ဘက်တွင်တည်ရှိနေသော မြို့တစ်ခုပင်ဖြစ်သည်။ ဗင်းနစ်မြို့ သည် Po မြစ်ဝနှင့်Piave မြစ်ဝနှစ်ခုအကြားရှိ ကမ်းခြေနှင့်ရေထိတွေ့နေသည့်နေရာတစ်လျှောက်တွင် ဆန့်တန်းလျက် ရှိနေသည့် စိမ့်မြေတောမှ ပင်လယ်ပြင်နှင့်သဲသောင်အားခြားထားသော Venetian ရေငံအိုင်၌ တည်ရှိနေခြင်းဖြစ်သည်။

ဗင်းနစ်မြို့သည် ၎င်း၏တည်နေရာအနေအထား၊ ဗိသုကာလက်ရာဟန်ပန်အနေအထားနှင့် အနုပညာဆိုင်ရာဖန်တီးပြု လုပ်ထားမှုများတို့ကြောင့် နာမည်ကြီးပြီးကမ္ဘာကျော်ရခြင်းပင်ဖြစ်သည်။ Venetianရေငံအိုင်နှင့်တကွ မြို့တစ်ခုလုံး အပါအဝင်အားလုံးကို ကမ္ဘာ့ယဉ်ကျေးမှု အမွေအနှစ်စာရင်း၌ ထည့်သွင်းထား၏။ ဗင်းနစ်မြို့သည် Veneto ဒေသ၏မြို့တော်ဖြစ်ပြီး ၂၀၁၈ခုနှစ်တွင် နေထိုင်သူလူဦးရေစုစုပေါင်း (၂၆၀၈၉၇)ယောက်ရှိခဲ့သည်။ ဗင်းနစ်မြို့၏အကျယ်အဝန်း မှာ စတုရန်းမိုင်ပေါင်း (၁၆၀.၀၇)ရှိပြီး ပင်လယ်ရေမျက်နှာပြင်အထက် ၃ပေအမြင့်တွင်တည်ရှိနေခြင်းဖြစ်သည်။

သမိုင်း

ဗင်းနစ်ဆိုသောအမည်သည် ဘီစီ(၁၀)ရာစုတွင် ထိုဒေသ၌မှီတင်းနေထိုင်ခဲ့ကြသည့် ရှေးခေတ် Veneti လူမျိုးများထံမှ ဆင်းသက်လာခဲ့ခြင်းဖြစ်သည်။ သမိုင်းကြောင်းအရပြောရလျှင် ဗင်းနစ်မြို့သည် Venetianပြည်ထောင်စုနိုင်ငံ၏ မြို့ တော်ဖြစ်ခဲ့ပြီး ရေမြို့တော်၊ မျက်နှာဖုံးမြို့တော်၊ တံတားမြို့တော်၊ ပေါလောပေါ်နေသည့်မြို့တော်နှင့် တူးမြောင်းမြို့ တော်များအဖြစ်လူသိများခဲ့သည်။ Luigi Barzini ဆိုသူက နယူးယောက်တိုင်း(မ်)သတင်းစာတွင် သံသယဖြစ်ဖွယ်ရာမ ရှိသောလူသားများတည်ဆောက်ခဲ့သည့်အလှပဆုံးမြို့အဖြစ် တင်စားဖော်ပြခဲ့သည်။ ဗင်းနစ်မြို့ကို ဥရောပတိုက်၏စိတ်ကူးယဉ်ဆန်ဖွယ်ကောင်းသည့်မြို့များထဲမှတစ်မြို့အဖြစ် Times Onlineတွင်ဖော်ပြခံခဲ့ရ၏။

အလယ်ခေတ်(ခရစ်နှစ် ၁၀၀၀မှ၁၄၅၃ထိဥရောပသမိုင်းခေတ်ကာလ) နှင့်ရီနေးဆဲ့န်စ်(၁၄-၁၆ရာစုတွင်အနုပညာနှင့် စာပေပြန်လည်ထွန်းကားလာသည့်ကာလ)ခေတ်များအတောအတွင်း၌ ဗင်းနစ်ပြည်ထောင်စုနိုင်ငံသည် ပင်လယ်ရေ ကြောင်းသွားလာရေးတွင်အဓိကကျခဲ့ပြီးတန်ခိုးအာဏာရှိခဲ့သည်။ ကရူးဆိတ်ဘာသာရေးစစ်ပွဲများ နှင့် Lepantoစစ်ပွဲတို့၏စစ်တလင်း ဖြစ်ခဲ့ပြီး စီးပွားရေး(အထူးသဖြင့် ပိုးထည်၊ ကောက်ပဲသီးနှံနှင့်ဟင်းခတ်အမွေးအကြိုင်များ)အတွက်သာမက ၁၃ရာစုနှစ် မှ၁၇ရာစုအဆုံးပိုင်းကာလအထိ အနုပညာအတွက်လည်း အလွန်အရေးပါအချက်အချာကျသောနေရာဖြစ်ခဲ့၏။

ယင်း အချိန်အပိုင်းအခြားကာလသည် ဗင်းနစ်မြို့ကြီးအား၎င်း၏သမိုင်းတစ်လျှောက်တွင် အကြွယ်ဝအချမ်းသာဆုံးသောအ နေအထားကိုပိုင်ဆိုင်ခဲ့သည်။  အဆိုပါကာလသည်လည်း ဗင်းနစ်မြို့၏အရေးပါလှသည့်အနုပညာဆိုင်ရာလှုပ်ရှားမှု များပြုလုပ်ခဲ့သည့်အခါသမယပင်ဖြစ်၏။ ဗင်းနစ်မြို့သည်သံစုံတီးဝိုင်းကြီးများနှင့်အော်ပရာတေးဂီတတွင်လည်း အရေး ပါသောအခန်းမှပါဝင်အသုံးတော်ခံခဲ့ပြီး Antonio Vivaldi ၏မွေးရပ်မြေလည်းဖြစ်သည်။

ဗင်းနစ်၏မူလအစ

ဗင်းနစ်မြို့၏မူလတည်ဆောက်ခဲ့ခြင်းနှင့်ပတ်သက်နေသည့် သမိုင်းကြောင်းအထောက်အထားမှတ်တမ်းမှတ်ရာမျာ မရှိသော်လည်း အစဉ်အဆက်နှင့်ရရှိသည့်အထောက်အထားများအရ အချို့သောသမိုင်းပညာရှင်များမှသဘောတူခဲ့ ကြသည်မှာ ဗင်းနစ်၌ ကနဦးနေထိုင်အခြေချခဲ့သူများတွင် ဗင်းနစ်မြို့အနီးတွင်တည်ရှိနေသောရာမအင်ပါရာကြီးမှမြို့တော်များနှင့် ခုခံကာကွယ်နိုင်စွမ်းမရှိသောအစွန်အဖျားဒေသများမှ ဒုက္ခသည်များပါဝင်ခဲ့၏။ ၎င်းတို့သည်ကျူးကျော် သူများ၏ရန်မှလွတ်မြောက်အောင် ဗင်းနစ်မြို့ဖြစ်ပေါ်လာမည့်နေရာသို့ထွက်ပြေးလာခဲ့ကြခြင်းပင်ဖြစ်သည်။

အချို့ရောမရာဇဝင်များကမူ ရေငံအိုင်မှဗွက်ထနေသည့်ကျွန်းများမှတံငါများကို မူလနေထိုင်ခဲ့သူများအဖြစ်ထုတ်ဖော်ပြော ဆိုကြသည်။ အီတလီကျွန်းဆွယ်သို့ အချိန်အကြာဆုံးနှင့်တာရှည်အခံဆုံးသောအခြားဒေသမှလာရောက်အခြေချမှု မှာ ၅၆၈ခုနှစ်တွင်ဖြစ်ပြီး Lombardsလူမျိုးများသည် ရောမအင်ပါယာကြီး၏အရှေ့ဘက်ခြမ်းမှ ဗင်းနစ်သို့ရောက်ရှိလာ ခဲ့ခြင်းပင်ဖြစ်သည်။

ချဲ့ထွင်ခဲ့ခြင်း

၉ရာစုမှ၁၂ရာစုအတွင်း ဗင်းနစ်သည် မြို့ကြီးအဖြစ်ဖွံ့ဖြိုးလာခဲ့သည်။ မဟာဗျူဟာမြောက်သည့်၎င်း၏တည်နေရာအေ နအထားကြောင့် ရေကြောင်းသွားလာရေးနှင့်စီးပွားရေးတွင် အလွယ်တကူနှောက်ယှက်ဖျက်ဆီးခံခဲ့ရခြင်းလုံးဝနီးပါး မရှိခဲ့ပေ။ Dalmatianကမ်းရိုးတန်းတစ်လျှောက်မှ ပင်လယ်ဓားပြများကိုဖယ်ရှားနိုင်ခဲ့ခြင်းကြောင့် ဗင်းနစ်မြို့သည် အ နောက်ဥရောပနှင့် ကျန်သည့်ကမ္ဘာအကြားမှ အောင်မြင်သောကုန်သွယ်မှုဗဟိုဌာနအဖြစ်သို့ရောက်ရှိလာခဲ့သည်။

ဗင်းနစ်မြို့သည် စတုတ္ထမြောက်ကရူးဆိတ်စစ်ပွဲအပြီးတွင် ဧကရာဇ်နိုင်ငံသဖွယ်ဖြစ်လာခဲ့သည်။ Adriatic ပင်လယ်တွင် တည်ရှိနေခြင်းကြောင့် Byzantineအင်ပါယာနှင့် အစ္စလာမ်ကမ္ဘာတို့ဖြင့် ကျယ်ကျယ်ပြန့်ပြန့်ကုန်သွယ်မှုပြုလုပ်ခဲ့၏။ ၁၃ရာစုနှောင်းပိုင်းတွင် ဗင်းနစ်မြို့သည်ဥရောပတိုက်တွင် အကြီးပွားအချမ်းသာဆုံးမြို့ဖြစ်လာခဲ့သည်။ တန်ခိုးအထွား ဆုံးနှင့်အချမ်းသာဆုံးအချိန်တွင် သင်္ဘောပေါင်း(၃၃၀၀)ခန့်ရှိပြီး သင်္ဘောသားစုစုပေါင်း(၃၆၀၀၀)ခန့်ရှိခဲ့၏။

အဆောက်အအုံများတည်ဆောက်ပုံ

ဗင်းနစ်မြို့တစ်မြို့လုံးတွင်တည်ဆောက်ထားသည့် အဆောက်အအုံများကို တစ်ချောင်းနှင့်တစ်ချောင်းနီးကပ်စွာစိုက် ထားသည့် သစ်သားမြေသွင်းတိုင်များပေါ်တွင် အခြေခံပြီးဆောက်လုပ်ထားခြင်းဖြစ်သည်။ သစ်သားမြေသွင်းတိုင်အများစုမှာ ရာစုနှစ်ပေါင်းများစွာရေတွင်နှစ်မြုပ်နေသော်ငြားလည်း နဂိုအတိုင်းတည်ရှိနေကြသည်။ တည်ဆောက်မည့်အ ဆောက်အအုံများကို သစ်သားမြေသွင်းတိုင်များပေါ်တွင်ပန္နက်ချပြီးနောက် အုတ်(သို့)ကျောက်တုံးများဖြင့်အပေါ်ပိုင်း ကိုတည်ဆောက်ခြင်းဖြစ်သည်။

သစ်သားမြေသွင်းတိုင်များကို ပျော့ပျောင်းသည့်သဲပြင်နှင့်ရွှံပြင်အလွှာတွင်းသို့ထိုးစိုက်လိုက်ပြီးနောက် ပိုမိုပြီးမာကျောလှသည့်ဖိသိပ်ထားသည့်ရွှံစေးအလွှာထိရောက်ရှိသွားအောင် ပြုလုပ်ထားခြင်းပင် ဖြစ်သည်။ ရေထဲတွင်နှစ်မြုပ်နေသည့်အတွက် အောက်ဆီဂျင်များစွာရရှိခြင်းမရှိသည့်အခြေအနေကြောင့် သစ်သား များမှာ ရေပေါ်တွင်ကဲ့သို့လျင်မြန်စွာဆွေးမြေ့သွားခြင်းအလျဉ်မရှိပေ။ သစ်သားမြေသွင်းတိုင်အများစုကို ALDER(ဘာ့ ချ်ထင်းရှုးသစ်ပင်မျိုး)သစ်ပင်မှရရှိသည့် ပင်စည်ကိုအသုံးပြုထားခြင်းဖြစ်ပြီး ၎င်းအပင်သည်ရေစိမ်ခံနိုင်သောသတ္တိ ကောင်းစွာရှိသောအပင်တစ်မျိုးအဖြစ်သတ်မှတ်ထားကြသည်။

ဗင်းနစ်မြို့သည် မကြာခဏဆိုသလိုပင် ဆောင်းဦးရာသီနှင့်နွေဦးပေါက်ရာသီအစောပိုင်းအချိန်များတွင် ပင်လယ်ဒီလှို င်းများ၏ လွှမ်းမိုးမှုများမှခြိမ်းခြောက်ခံရလေ့ရှိသည်။ လွန်ခဲ့သောနှစ်ပေါင်းခြောက်ရာခန့်က ဗင်းနစ်မြို့သားများသည် ကာကွယ်မှုပြုလုပ်သည့်အနေဖြင့် ရေငန်အိုင်အတွင်းသို့စီးဆင်းလျက်ရှိသည့်အဓိကကျလှသော မြစ်ကြီးများအားလုံး ၏ ရေလမ်းကြောင်းများကို လွှဲပေးခဲ့၏။ ဤနည်းလမ်းဖြင့် ဗင်းနစ်မြို့ပတ်ပတ်လည်ရှိဧရိယာကို အနည်အနှစ်များပြည့် လာခြင်းမှကာကွယ်နိုင်ခဲ့၏။

၂၀ရာစုအတောအတွင်း၌ ဒေသတွင်းလုပ်ငန်းများတွင်အသုံးပြုရန်အတွက် ရေငံအိုင်၏ အစွန်အဖျားတွင် များလှစွာသောအဝီစီတွင်း(စက်ရေတွင်း)များတူးဖော်ခဲ့ခြင်းတို့ကြောင့် ဗင်းနစ်မြို့သည် နိမ့်ဝင်ကျွံကျ ခြင်းစတင်ဖြစ်ပေါ်ခဲ့သည်။ ထိုကဲ့သို့ဖြစ်ရခြင်း၏အကြောင်းအရင်းမှန်မှာ မြေအောက်ရေကိုထုတ်ယူသုံးစွဲခြင်းကြောင့် ပင်ဖြစ်သည်ဟု သဘောပေါက်လာခဲ့ကြ၏။ ၁၉၆၀ခုနှစ်များတွင် အဝီစီတွင်းများတူးဖော်ခြင်းကိုတားမြစ်ခဲ့ပြီးသည့်နော က်ပိုင်းတွင် အောက်သို့နိမ့်ဝင်လာခြင်းမှာလျော့ကျလာခဲ့သည်။ သို့သော်ငြားလည်း ဗင်းနစ်မြို့ကြီးမှာ အနိမ့်ပိုင်းရေလွှမ်းမိုးမှုများ၏ ခြိမ်းခြောက်မှုများ မကြာခဏဆိုသလိုပင်ခံနေရဆဲဖြစ်ပြီး ဒီရေတက်ပြီးသည့်နောက် စင်တီမီတာအချို့
အထိရောက်ရှိအောင်ရေလွမ်းလာလေ့ရှိ၏။

ရှေးယခင်ကဆောက်လုပ်ထားသည့် အိမ်အိုကြီးများမှပစ္စည်းအတင်အချ ပြုလုပ်သည့်လှေခါးများမှာမူ ယခုအခါ၌ရေလွှမ်းမိုးကုန်ပြီဖြစ်သည်။မကြာသေးမီကပြုလုပ်ခဲ့သည့်လေ့လာတွေ့ရှိချက် များအရ ဗင်းနစ်မြို့သည်နောက်ထပ်ရေနှစ်မြုပ်ခြင်းမရှိတော့ပေဟု ထုတ်ပြန်ထားသော်လည်းမသေချာသေးပေ။ ထို့ကြောင့်ရေလွှမ်းမိုးခြင်းအတွက်ထုတ်ပြန်ထားသည့် နှိုးဆော်သတိပေးချက်ကိုရုပ်သိမ်းခြင်းမရှိသေးပေ။

ဗင်းနစ်၏ ရာသီဥတု

Köppenရာသီဥတုခွဲခြမ်းစိတ်ဖြာရေး၏အဆိုအရမူ ဗင်းနစ်မြို့သည် ပူနွေးစိုထိုင်းသည့်ရာသီဥတုအတွင်း၌ကျရောက် တည်ရှိနေပြီး အေးမြသောဆောင်းရာသီနှင့်နွေးထွေးလှသည့်နွေရာသီများကိုဖြစ်ပေါ်စေ၏။ နှစ်တစ်နှစ်၏အဦးဆုံးလ ဖြစ်သည့် ဇန်နဝါရီလတွင် ၂.၅ဒီဂရီစင်တီဂရိတ်ရှိပြီး၊ ဇူလိုင်လတွင် ၂၂.၇ဒီဂရီစင်တီဂရိတ်ထိအောင်ပူပြင်းတတ်သည်။

စီးပွားရေးလုပ်ငန်း

ဗင်းနစ်မြို့၏စီးပွားရေးသည် သမိုင်းကြောင်းတစ်လျှောက်တွင် ပြောင်းလဲမှုများစွာကိုဖြစ်စေခဲ့သည်။ အလယ်ခေတ်နှင့် ရီနေးဆဲ့န်စ်ခေတ်များတွင် ဗင်းနစ်မြို့သည်ကုန်စည်ကူးသန်းရောင်းဝယ်ရေးအတွက်အချက်အချာကျသောနေရာတစ် ခုဖြစ်ခဲ့ပြီး ကြီးမားကျယ်ပြောလှသည့်ပင်လယ်ပြင်ရေကြောင်းသွားလာရေးကိုထိန်းချုပ်နိုင်ခဲ့သည့်အင်ပါယာကြီးတစ်ခု ဖြစ်သောကြောင့် အလွန်အမင်းချမ်းသာလာခဲ့သည့်ဥရောပမှမြို့တစ်မြို့ဖြစ်လာခဲ့သည်။ ထို့အပြင် နိုင်ငံရေးနှင့်စီးပါွးရေးနှင့် ပတ်သက်နေသည့် အရေးအရာများတွင်လည်း ဦးစီးဦးဆောင်ခဲ့သည့်မြို့ဖြစ်ခဲ့သည်။

၁၁ရာစုမှ၁၅ရာစုတိုင်အောင် မြင့်မြ တ်သောနေရာအဖြစ်သတ်မှတ်ထားသည့် ဂျော်ဒန်မြစ်နှင့် မြေထဲပင်လယ်စပ်ကြားရှိဒေသသို့ ဘုရားဖူးသွားရောက်မည့် သူများကို ဗင်းနစ်မြို့မှကောင်းစွာဧည့်ခံအလုပ်အကျွေးပြုခဲ့ကြ၏။ အခြားသောဆိပ်ကမ်းမြို့များမှာ ဗင်းနစ်မြို့မှကောင်းစွာစုစည်းတည်ထောင်ပြုလုပ်ထားသည့် ဘုရားဖူးလုပ်ငန်းခရီးသွားဝန်ဆောင်မှုများကို ခက်ခက်ခဲခဲယှဉ်ပြိုင်ခဲ့ရ၏။ ၁၇ရာစုနှစ်တွင် အားလုံးမှာပြောင်းလဲကုန်ပြီး ဗင်းနစ်မြို့၏ကုန်စည်ကူးသန်းရောင်းဝယ်ရေးဆိုင်ရာအင်ပါယာကြီးမှာ အခြားတိုင်းပြည်များလက်ထဲသို့လွှဲပြောင်းပေးခဲ့ရပြီးနောက် ရေကြောင်းသွားလာရေး၏အရေးပါမှုမှာလည်းလျော့ကျ ဆုတ်ယုတ်လာခဲ့သည်။

ထို့နောက် ၁၈ရာစုနှစ်တွင် ဗင်းနစ်မြို့သည်စိုက်ပျိုးရေးနှင့်စက်မှုလုပ်ငန်းများမှထွက်ကုန်များ ကိုအဓိကတင်ပို့ရောင်းချသူဖြစ်လာခဲ့၏။ ယနေ့အချိန်တွင် ဗင်းနစ်မြို့၏စီးပါွးရေးသည် ကမ္ဘာလှည့်ခရီးသွားလုပ်ငန်း၊ သင်္ဘောဆောက်လုပ်ရေးလုပ်ငန်း၊ ဝန်ဆောင်မှုလုပ်ငန်းများ၊ ကုန်သွယ်မှုလုပ်ငန်းများနှင့် စက်မှုထွက်ကုန်ပ့ိုသည်လု ပ်ငန်းများပေါ်တွင်မှီခိုလျက်ရှိသည်။ ဖန်ထည်လုပ်ငန်းနှင့် ပိုးထည်လုပ်ငန်းများမှာလည်း ဗင်းနစ်မြို့စီးပွားရေး၏ အရေး ပါမှုမြင့်မားလှသည့်နေရာမှပါဝင်လျက်ရှိသည်။

ခရီးသွားလာရေးလုပ်ငန်း

ဗင်းနစ်မြို့သည် ယင်း၏ခမ်းနားကျော်ကြားလှသည့် အနုပညာနှင့်ဗိသုကာလက်ရာများတို့ကြောင့် ကမ္ဘာလှည့်ခရီးသွားများသွားရောက်လည်ပတ်ကြသည့် ကမ္ဘာပေါ်ရှိအရေးပါသည့်နေရာများထဲမှတစ်ခုပင်ဖြစ်သည်။ ၂၀၀၇ခုနှစ်ခန့်မှန်း ချက်အရ ပျှမ်းမျှအားဖြင့် တစ်ရက်လျှင် ကမ္ဘာလှည့်ခရီးသည်စုစုပေါင်းငါးသောင်းခန့် ဗင်းနစ်မြို့သို့လာရောက်လည်ပတ် ကြသည်။ ဗင်းနစ်မြို့ကိုကမ္ဘာပေါ်ရှိအလှအပဆုံးသောမြို့များထဲမှတစ်ခုအဖြစ်သတ်မှတ်ကြသည်။ ခရီးသွားလုပ်ငန်း သည် ၁၈ရာစုကတည်းက အဓိကအရေးပါသောအခန်းကဏ္ဍမှပါဝင်ခဲ့ပြီး လှပသည့်မြို့တော်တည်ဆောက်ပုံ၊ ပြိုင်စံ ရှားသည့်ဟန်နှင့် ကြွယ်ဝလှသည့်ဂီတနှင့်ပန်းချီယဉ်ကျေးမှုအမွေအနှစ်များတို့ကြောင့် အချက်အချာကြသည့်လည်ပ တ်ရန်နေရာတစ်ခုဖြစ်ခဲ့သည်။

၁၉ရာစုတွင် ဗင်းနစ်မြို့သည် ချမ်းသာကြွယ်ဝသူများ၊ကျော်ကြားသူများနှင့်အထက်တ န်းအလွှာမှကြိုက်နှစ်သက်သည့် ဇိမ်ခံသည့်နေရာတစ်ခုဖြစ်လာခဲ့ပြီး မကြာခဏဆိုသလို ခေတ္တနေထိုင်ခြင်းနှင့်စားသေ ာက်ပွဲများကျင်းပခြင်းများပြုလုပ်လာခဲ့ကြ၏။ ၂၀ရာစုအစောပိုင်းကာလများအထိ ဗင်းနစ်မြို့သည်ဖက်ရှင်ကျလှသည့် မြို့ကြီးတစ်မြို့အဖြစ်ဆက်လက်ရပ်တည်ခဲ့သည်။ ဗင်းနစ်မြို့ကြီးသည် ၎င်း၏ ပြဇာတ်၊ ယဉ်ကျေးမှု၊ ရုပ်ရှင်၊ အနုပ ညာနှင့် ဂီတလုပ်ငန်းများကိုစိတ်ပါဝင်စားကြသည့် ကမ္ဘာတဝှမ်းမှခရီးသွားများကိုအစဉ်သဖြင့်ဆွဲဆောင်လျက်ရှိသည်။

ဗင်းနစ်မြို့ကြီးသည် အပျော်စီးသင်္ဘောကြီးများလာရောက်လည်ပတ်မှုကိုလည်း များစွာမှီခိုအားထားမှုပြုနေရသည်။ သို့သော်လည်း ဗင်းနစ်သို့ကမ္ဘာ့အနှံ့အပြားမှခရီးသွားများ လာရောက်မှုများပြားခြင်းမှဖြစ်ပါွးလာခဲ့သည့်အချို့သော ပြဿနာများထဲတွင် နှစ်တနှစ်၏အချို့သောအချိန်များ၌လူအရမ်းစည်ကားရှုပ်ထွေးခြင်းလည်း အပါအဝင်ဖြစ်သည်။ ထိုကဲ့သို့ဖြစ်ခြင်းကို အချို့လူများအနေဖြင့် ခရီးသွားဧည့်သည်များအတွက်ထောင်ချောက်အဖြစ်သတ်မှတ်ကြပြီး အချို့ ကမူ လူသားပြတိုက်ကြီးသဖွယ်ရှုမြင်ကြပြန်သည်။

ဥရောပအနောက်ဘက်ခြမ်းနှင့်ကမ္ဘာ့အခြားနေရာအများစုတွင် တည်ရှိနေသည့်မြို့ကြီးများနှင့်မတူဘဲ ဗင်းနစ်မြို့ကြီး၏ခမ်းနားထည်ဝါလှပကျော့ရှင်းမှုများမှာ တစတစဖြင့်လျော့နည်း ကျဆင်းသွားလျက်ရှိသည်။ နိုင်ငံခြားသားများမှ ဗင်းနစ်တွင်အိမ်များကိုအပြိုင်အဆိုင်ဈေးကြီးပေးဝယ်ယူကြသဖြင့် န ဂိုနေထိုင်ခဲ့ကြသည့်ရိုးရာလူမျိုးများမှာအခြေအနေပျက်သွားပြီး မိမိအခြေအနေဖြင့်တတ်နိုင်သည့်အခြားနေရာများသို့ ပြောင်းရွေ့နေထိုင်အောင် တွန်းအားပေးနေသကဲ့သို့ရှိလာ၏။

သယ်ယူပို့ဆောင်ရေးလုပ်ငန်း

ဗင်းနစ်မြို့သည် ရေငံအိုင်အတိမ်အတွင်း၌ တူးမြောင်း(၁၇၇)ခုဖြင့်ပိုင်းခြားထားသည့် ကျွန်းငယ်စုစုပေါင်း(၁၁၈)ခု ပေါ်တွင်တည်ဆောက်ထားခြင်းဖြစ်ပြီး တံတားအစင်းပေါင်း(၄၁၇)ခုဖြင့် ဆက်သွယ်မှုပြုလုပ်ထားခြင်းပင်ဖြစ်သည်။ မြို့ဟောင်းတွင် တူးမြောင်းများကိုလမ်းများသဖွယ်အသုံးပြုကြပြီး အားလုံးနီးပါးသောသယ်ယူပို့ဆောင်ရေးမှာ ရေလမ် းခရီးဖြင့်သွားခြင်း သို့တည်းမဟုတ် ကုန်းကြောင်းလျှောက်ခြင်းပင်ဖြစ်သည်။ ၁၉ရာစုတွင် ကုန်းမကြီးပိုင်းမှဆက်သွယ် ထားသည့်တာရိုးလမ်းတလျှောက်၌ မီးရထားလမ်းနှင့်ကားလမ်းများကိုဖောက်လုပ်ခဲ့ကြ၏။ ဗင်းနစ်မြို့စွန်၏မြောက်ဘက်အစွန်အဖျားပိုင်းရှိ ကားလမ်းနှင့်မီးရထားလမ်းဝင်ပေါက်များမှလွဲ၍ ကျန်နေရာများအားလုံးတွင်ရေလမ်းခရီး(သို့)ခြေ လျင်လျှောက်ခြင်းကိုသာပြုလုပ်နိုင်ပေသည်။ ဗင်းနစ်မြို့သည်ဥရောပတိုက်၏အကြီးမားဆုံးသောကားအသုံးမပြုသည့် မြို့ပြဒေသတစ်ခုပင်ဖြစ်သည်။

ဗင်းနစ်မြို့ရဲ့ စိတ်ဝင်စားဖွယ် အချက်အလက်များ

– ဗင်းနစ်ရဲ့တူးမြောင်းတွေအတွင်းမှာ gondola ပေါင်း ၃၅၀စင်းခန့်ရှိပါတယ်။ gondola ဆိုတာကတော့ အရှည် ၃၅ပေ အနံ ၄.၅ပေ ရှိတဲ့ ဗင်းနစ်ရဲ့ ဦးပိုင်း ၊ ပဲ့ပိုင်း နှစ်ခုလုံးကော့နေတဲ့ လှေလေးတွေကိုခေါ်ဆိုခြင်းဖြစ်ပါတယ်။

– ရေမျက်နှာပြင်အထက် ၃ပေ အမြင့်ပဲရှိတာကြောင့် လာမယ့် နှစ်ပေါင်း ၁သန်း နဲ့ ၂သန်းကြားမှာ ရေအောက်ရောက်သွားမယ့် မြို့ဖြစ်တယ်လို့ ပညာရှင်တွေက ဆိုကြပါတယ်။

– ကမ္ဘာ့အကျဉ်းဆုံးလမ်းတစ်ခုဖြစ်တဲ့ Calletta ဆိုတဲ့လမ်းဟာ ဗင်းနစ်မှာတည်ရှိနေပြီး အကျယ် ၅၃ စင်တီမီတာသာ ရှိပါတယ်။

– ဗင်းနစ်ရဲ့အမှတ်အသားကတော့ အတောင်ပံပါတဲ့ ခြင်္သေ့ဖြစ်ပါတယ်။

– ဗင်းနစ်မှာရှိတဲ့ တံတားပေါင်း ၄၁၇ စင်းမှာ ၇၂ခုကတော့ ကိုယ်ပိုင်တံတား(private) တွေဖြစ်ပါတယ်။ တံတားအများစုမှာ လှေကားတွေမရှိတဲ့အကြောင်းကတော့ အရင်ကမြင်းတွေကို သယ်ယူပို့ဆောင်ရေးအတွက် သုံးခဲ့ပြီး ဒီတံတားတွေပေါ်ကနေ ဖြတ်သန်းစေခဲ့ကြလို့ ဖြစ်ပါတယ်။

– ဗင်းနစ်ရဲ့ အထင်ကရ တံတား ၄ခုကတော့ Grand တူးမြောင်းထဲမှာတည်ရှိနေပါတယ်။ ဒီတံတားတွေကတော့ Ponte della Costituzione ၊ Ponte dell’Accademia ၊ Ponte degli Scalzi နဲ့ Ponte di Rialto တံတားတွေပဲဖြစ်ပါတယ်။

– Grand တူးမြောင်းဟာ ဗင်းနစ်ရဲ့အကြီးဆုံးတူးမြောင်းဖြစ်ပြီး ဗင်းနစ်မြို့ကိုနှစ်ပိုင်းပိုင်းခြားထားတဲ့ နေရာလည်းဖြစ်ပါတယ်။ Grand တူးမြောင်းတလျှောက်မှာတော့ အဆောက်အအုံပေါင်း ၁၇၀ခန့် ရှိနေပါတယ်။

– ဗင်းနစ်မှာ နန်းတော်ပေါင်း ၂၀၀ကျော်ရှိပါတယ်။

– ဗင်းနစ်ရဲ့ အကျော်ကြားဆုံး အဆောက်အအုံကတော့ San Marco ခေါင်းလောင်းတာဝါဖြစ်ပါတယ်။ ဒီတာဝါအဆောက်အအုံကို အေဒီ ၁၁၀၀ ခုနှစ်လောက်ကတည်းက ဆောက်လုပ်ခဲ့တာဖြစ်ပြီး ၁၉၀၀ခုနှစ်မှာ တဖန်ပြန်လည်ဆောက်လုပ်ခဲ့ပါတယ်။

– ဗင်းနစ်မှာနေထိုင်တဲ့ လူဦးရေဟာ တစ်နှစ်ထက်တစ်နှစ် လျှော့နည်းလာနေပါတယ်။ အကြောင်းကတော့ အိမ်တွေရဲ့ထိန်းသိမ်းစရိတ်ဟာ အလွန်ဈေးကြီးမြင့်လို့ဖြစ်ပြီး ၂၀၃၀ခုနှစ်ခန့်မှာတော့ သီးသန့်လည်ပတ်တဲ့နေရာဖြစ်သွားလိမ့်မယ်လို့ ခန့်မှန်းထားကြပါတယ်။

VIDEO

ပြည့်ဖြိုးဟိန်း