ဖားကန့်ဒေသမှ ပျောက်ဆုံးသွားသော ဆင်စွယ်နက်အကြောင်း

Posted on

ရေးသားသူ – အောင်ဟိန်းမင်း

ဆင်စွယ်နက် ပေါ်ထွက်ခဲ့တဲ့အချိန်က လွန်ခဲ့တဲ့ နှစ်ပေါင်း ၁၀၀ လောက်ကပါ။ ယခု ဖားကန့်မြို့နယ်ထဲက ကံဆီးဒေသမှာ ပေါ်ထွက်ခဲ့တာ ဖြစ်ပါတယ်။

မြန်မာသက္ကရာဇ် ၁၂၈၅ ခုနှစ်မှာ အလျား ၆ ပေ၊ အနံ ၇ လက်မ ရှိတဲ့ ဆင်စွယ်နက်အစုံကို မုဆိုးတွေက ကံဆီးစော်ဘွားကို ဆက်သခဲ့ပါတယ်။ (ကံဆီးစော်ဘွား ၆ ဆက်အထိ ပဒေသရာဇ်စနစ်ဖြင့် အုပ်ချုပ်ခဲ့သော်လည်း အင်္ဂလိပ်လက်ထက်မှာတော့ ဒူဝါများအဖြစ် ပြောင်းလဲခေါ်ဆိုခဲ့ကြပါတယ်)

ဆင်စွယ်နက်ဟာ အံ့ဩဖွယ်ရာများစွာ ရှိတဲ့အနက် ဆင်စွယ်နှစ်ချောင်းကို လေးလက်မလောက်ခွာထားရင် အချင်းချင်းနီးကပ်သွားပြီး အဖျားချင်းအပ်သွားတယ်လို့ သိရတယ်။ ဒါကလည်း တစ်ချက်ပါ။

ဒီလို ရှားပါးတဲ့ ဆင်စွယ်နက်မျိုး အင်္ဂလန်မှာလည်း ရှိတယ်လို့ သိရတယ်။ မြန်မာသက္ကရာဇ် ၁၂၉၈ ခုနှစ် ကျောက်စိမ်းတွင်းကို စစ်ကိုင်းမင်းကြီး လာရောက်တဲ့အချိန်မှာ ဆင်စွယ်နက်ကို ဓာတ်ပုံရိုက်ကူးခဲ့ပါတယ်။ ဒါ့အပြင် အင်္ဂလန်မှာ ရှိတဲ့ ဆင်စွယ်နက်ထက် ဒီက ဆင်စွယ်နက်က ပိုပြီး ကြီးမားတဲ့အကြောင်း ပြောဆိုသွားပါတယ်။

ခေတ်ပြောင်းသွားတဲ့အခါ ဝန်ကြီးချုပ်ဦးနုက ယင်းဆင်စွယ်နက်ကို ကံဆီးဒူဝါ ဆင်ဝါးနောင်ထံမှာ သုံးနှစ်ငှားရမ်းခဲ့ပြီး ရန်ကုန်မှာ အများပြည်သူ ကြည့်ရှုဖို့ ထားခဲ့ပါတယ်။ မြန်မာသက္ကရာဇ် ၁၃၁၇ မှာတော့ ဆင်ဝါးနောင်က ပြန်လည် သိမ်းယူခဲ့ပါတယ်။

ယခုအချိန်မှာတော့ အဆိုပါ ဆင်စွယ်နက်ဟာ အစအန ပျောက်နေပါပြီ။ ဒေသခံတစ်ချို့ကလည်း ဆင်စွယ်ဟာ KIA/KIO ရဲ့လက်ထဲမှာ ရှိနေဦးမယ်လို့ ယုံကြည်နေပါတယ်။ မည်သူ့လက်ထဲမှာပဲ ရောက်ရှိနေစေဦးတော့၊ ဒီလိုအဖိုးတန်ရတနာကို တိုင်းတစ်ပါးလက်ထဲတော့ မရောက်စေချင်တာ နိုင်ငံသားတစ်ဦးရဲ့ ဆန္ဒပါ။

သို့သော် ယခုအချိန်မှာတော့ ဖားကန့်မှာ ပေါ်ထွက်ခဲ့တဲ့ ဆင်စွယ်နက်အကြောင်းဟာ ပုံပြင်တစ်ပုဒ်လို ဖြစ်သွားခဲ့ပြီ။

ဒီလိုပါပဲ၊ တစ်ချိန်ကျရင် ကမ္ဘာမှာ ရှားပါးအဖိုးတန်တဲ့ ကျောက်စိမ်းရတနာတွေ ဖားကန့်မှာ ပေါ်ထွက်ခဲ့တယ်ဆိုတဲ့ အကြောင်းဟာ နောင်တစ်ချိန်မှာ တသသ ပြောနေကြမယ့် ပုံပြင် တစ်ပုဒ်ဖြစ်သွားမှာကို စိုးမိပါတော့တယ်။

( ဆင်စွယ်နက် အကြောင်း သိထားတာ ရှိရင်လည်း မိတ်ဆွေသိသလောက် ကွန်မန့်မှာ ပြန်လည်ဝေမျှခဲ့ပါဦး 🙂

Leave a Reply