ကမ္ဘာ့ အလှဆုံးနဲ့ အထူးဆန်းဆုံးသင်္ချိုင်း

Posted on

သေဆုံးသူတွေမြုပ်နှံရာ သင်္ချိုင်းဆိုတာနဲ့ လူအများစုက နှစ်မြို့ခြင်းမရှိကြပါဘူး။ မကောင်းတဲ့ အတိတ်နမိတ်လို့ ထင်တတ်ကြပါတယ်။ တချို့ကတော့ သံဝေဂရစရာ နေရာ ၊ ဖြစ်ပြီးရင်ပျက်ရမယ်ဆိုတာကို လက်တွေ့ပြတဲ့ နေရာတွေအဖြစ်မှတ်ယူကြပါတယ်။

သင်္ချိုင်းတွေထဲမှာမှ ဒီလိုလှပပြီး ထူးဆန်းတဲ့သင်္ချိုင်းတွေရှိနေသေးကြောင်း သုတဇုန်မိတ်ဆွေတွေကို ဗဟုသုတအနေနဲ့ ပြန်လည်မျှဝေချင်ပါတယ်။ အခုမျှဝေမယ့် သင်္ချိုင်းကတော့ ပြင်သစ်နိုင်ငံ Paris မြို့က ဖရစ်ဒလရှဲ ( Père Lachaise) သင်္ချိုင်းဖြစ်ပါတယ်။

Père Lachaise သင်္ချိုင်းဟာ ပါရီမြို့ရဲ့ အကြီးဆုံးသင်္ချိုင်းဖြစ်ပြီး ကမ္ဘာ့အလှပဆုံး နဲ့ အထူးဆန်းဆုံး သင်္ချိုင်းတွေထဲက တစ်ခုဖြစ်ပါတယ်။ ပါရီမြို့ရဲ့ အရှေ့ဘက် ၁၁၀ဧက ကျယ်ဝန်းတဲ့မြေပေါ်မှာတည်ရှိပါတယ်။ သင်္ချိုင်းရဲ့နာမည်ကတော့ ပြင်သစ် ၁၄ဆက်မြောက်လူဝီဘုရင်ရဲ့ ဘုန်းတော်ကြီး ဖရစ်ဒလရှဲ (Père de la Chaise) ရဲ့အမည်ကိုပေးထားခြင်းဖြစ်ပါတယ်။

၁၈၀၄ခုနှစ် မေလ ၂၁ရက်နေ့မှာ ပြင်သစ်ဘုရင်နပိုလီယံက သင်္ချိုင်းအဖြစ်စတင်ဖွင့်လှစ်သတ်မှတ်ခဲ့ပါတယ်။ သင်္ချိုင်းဖွင့်ပြီး ပထမဆုံး မြုပ်နှံခဲ့သူကတော့ အသက် ၅နှစ်အရွယ်ရှိတဲ့ အဒဲလက်ဒီ ဖ့ရား (Adélaïde Paillard) ဆိုတဲ့ကလေးမလေးဖြစ်ပါတယ်။ မဖွင့်မီ ၃ရက်အလိုတည်းက နိုင်ငံသားဖြစ်သူ လူမျိုးဘာသာမရွေး ဒီသင်္ချိုင်းမှာ မြုပ်နှံနိုင်ကြောင်း နပိုလီယံကကြေငြာခဲ့ပါတယ်။

သင်္ချိုင်းနဲ့နေရာဟာ မြို့နဲ့အလှမ်းဝေးတာက တကြောင်း၊ ရိုမန်ကတ်သလစ်ဘာသာဝင် အများစုက သူတို့ဘာသာဝင်တွေကို ဘုရားကျောင်းနဲ့ အလှမ်းဝေးတဲ့သင်္ချိုင်းမှာ မြုပ်နှံဖို့ငြင်းပယ်ခဲ့တာကတကြောင်း စသည်တို့ကြောင့် ၁၈၀၄ခုနှစ်အတွင်း သင်္ချိုင်းမှာ အုတ်ဂူ ၁၃လုံးသာ ရှိခဲ့ပါတယ်။

နောက်နှစ်တွေမှာတော့ တဖြည်းဖြည်း မြုပ်နှံသူများပြားလာပြီး ၁၈၁၂ ခုနှစ်မှာတော့ ၈၃၃လုံးအထိရှိလာခဲ့ပါတယ်။ ၁၈၃၀ ခုနှစ်မှာတော့ အုတ်ဂူပေါင်း ၃၃၀၀၀ ကျော်ရှိခဲ့ပြီး အလွန်ကြီးမားတဲ့သင်္ချိုင်းဖြစ်လာခဲ့ပါတယ်။ ၂၀ရာစုမှာတော့ သင်္ချိုင်းထဲမှာ သစ်ပင်ပန်းမန်တွေကို စိုက်ပျိုးလာခဲ့ပြီးတဲ့နောက် ပထမဆုံး ဥယျာဉ်သင်္ချိုင်းဖြစ်လာခဲ့ပါတယ်။

နောက်ပိုင်းမှာတော့ ဒီသင်္ချိုင်းမှာ မြုပ်နှံခွင့်ကို ကန့်သတ်လိုက်ပါတယ်။ ပါရီမြို့ထဲမှာ နေထိုင်ပြီးသေဆုံးသူမှသာ မြုပ်နှံခွင့်ရှိမယ် ဆိုတဲ့စည်းမျဉ်းနဲ့ လက်ခံခဲ့ပါတယ်။ သင်္ချိုင်းမှာရှိတဲ့ အုတ်ဂူအရေအတွက်စုစုပေါင်း ၁သန်းခန့် ရှိပါတယ်။ ယခုအချိန်မှာတော့ မြုပ်နှံမယ့်သင်္ချိုင်းမြေကွက်တန်ဖိုး ဈေးအလွန်ကြီးတာအပြင် မြေကွက်လွတ်တွေလည်းရှားပါးလာတာကြောင့် အသစ်မြုပ်နှံသူ ရှားပါးလာပါတယ်။

အခြားသင်္ချိုင်းတွေနဲ့ မတူတဲ့အချက်ကတော့ သေဆုံးသူတွေရဲ့အုတ်ဂူတွေကို တခမ်းတနားဒီဇိုင်းတွေ ၊ ရုပ်တုတွေနဲ့ ပုံဖော်ထားတာဖြစ်ပါတယ်။ သင်္ချိုင်းဖြစ်ပေမယ့် အလွန်ထူးခြားဆန်းပြားတဲ့ ဂူတွေ နဲ့ မြင်ကွင်းတွေကြောင့် နှစ်စဉ် လာရောက်ကြည့်ရှုလည်ပတ်သူပေါင်း ၃.၅သန်း အထက်မှာ ရှိနေပြီး လူအများဆုံးလာရောက်ကြည့်ရှုတဲ့ ကမ္ဘာ့နံပတ် ၁ သင်္ချိုင်းလည်းဖြစ်ပါတယ်။

ဒီသင်္ချိုင်းရဲ့ အကျော်ကြားဆုံး အုတ်ဂူကတော့ ကမ္ဘာကျော် အိုင်းရစ်ကဗျာ နဲ့ ပြဇာတ်ဆရာ အော်စကာဝိုင်း(Oscar Wilde) ရဲ့ အုတ်ဂူပဲဖြစ်ပါတယ်။ ဒါကတော့ ထူးဆန်းပြီး စိတ်ဝင်စားဖို့ကောင်းတဲ့ ကမ္ဘာ့အလှဆုံး ဖရစ်ဒလရှဲသင်္ချိုင်း ရဲ့ အကြောင်းအရာအချို့ဖြစ်ပါတယ်။

VIDEO နဲ့ သွားလည်မယ်

Leave a Reply