တရုတ်ပြည်က တားမြစ်မြို့တော်

Posted on

ဒီနေရာ ဟာ ကျွန်တော်တို့ မြန်မာတွေနဲ့ မစိမ်းတဲ့နေရာတစ်ခုဖြစ်ပြီး အများစုမကြာခဏ မြင်ဖူးလေ့ရှိတဲ့နေရာဖြစ်ပါတယ်။ အကြောင်းကတော့ တရုတ်ဇာတ်လမ်း အများစုဟာ ဒီနေရာမှာ ရိုက်ကူးထားလို့ဖြစ်ပါတယ်။ တားမြစ်ထားသောမြို့တော် ဟာ တရုတ်နိုင်ငံ ဘေဂျင်းမြို့လယ်မှာ တည်ရှိပါတယ်။

တရုတ် Ming မင်းဆက်က စလို့ Qing မင်းဆက်အထိ အေဒီ ၁၄၂၀ ကနေ ၁၉၁၂ခုနှစ်ကြားမှာ ဧကရာဇ်နန်းတော်အဖြစ် အသုံးပြုခဲ့တဲ့နေရာဖြစ်ပါတယ်။ ဧကရာဇ်မင်းဆက် ၂၄ဆက် နန်းစံခဲ့ပြီး ကမ္ဘာ့အကြီးဆုံးယဉ်ကျေးမှုပြတိုက်လည်းဖြစ်သလို တရုတ်နိုင်ငံရဲ့ အခမ်းနားဆုံးနေရာဆိုရင်လည်း မမှားပါဘူး။

တရုတ်လို Zijin Cheng လို့ခေါ်ပြီး အဓိပ္ပါယ်ကတော့ ခရမ်းရောင်တားမြစ်မြို့တော် ( Purple Forbidden City ) ဖြစ်ပြီး တားမြစ်နန်းတော်(Forbidden Palace) လို့လည်းခေါ်ကြပါသေးတယ်။

တားမြစ်မြို့တော်ကို စတုရန်းမီတာ ၇၂၀၀၀၀ ရှိတဲ့ မြေပေါ်မှာ တည်ဆောက်ထားတာဖြစ်ပြီး နန်းတော်အပါအ၀င် အဆောက်အဦးပေါင်း ၉၈၀ ရှိပါတယ်။ အကျယ်အ၀န်းဟာ ဗာတီကန်နိုင်ငံရဲ့ ၂ဆ နီးပါးကျယ်ဝန်းပြီး ပြင်သစ်ရဲ့နာမည်ကျော် Louvre နန်းတော်ထက် ၃ဆကျော် ကျယ်ဝန်းပါတယ်။ အလုပ်သမား ၁သန်း နဲ့ နှစ်ပေါင်း ၁၄နှစ်ကြာ(၁၄၀၆-၁၄၂၀ ထိ) စနစ်တကျ အကွက်ချ တည်ဆောက်ခဲ့ရပါတယ်။

နန်းတော်ပတ်လည်မှာတော့ ၂၆ပေမြင့်တဲ့ တံတိုင်းတွေနဲ့ ကာရံထားပါတယ်။ တစ်မြို့လုံးရဲ့အရောင်ကတော့ တရုတ်လူမျိုးတွေရဲ့ ကံကောင်းစေတဲ့အရောင်ဖြစ်တဲ့ အနီရောင်ဖြစ်နေတာကို တွေ့ရမှာပါ။ အရှေ့အာရှရဲ့ ယဉ်ကျေးမှု အနုပညာတွေ နဲ့ ဗိသုကာပညာတွေကို ဒီမြို့မှာ တစ်စုတစ်စည်းတည်းမြင်နိုင်ပါတယ်။

ယခုအခါမှာ လူတိုင်းဝင်ကြည့်လို့ရတဲ့ နန်းတော်ပြတိုက် မြို့ဖြစ်နေပေမယ့် တစ်ချိန်တုန်းကတော့ ဒီမြို့ကို တော်ရုံလူဝင်ခွင့်မရခဲ့ပါဘူး။ သာမန် တရုတ်လူမျိုးတွေ နဲ့ နိုင်ငံခြားသားတွေကို လုံး၀၀င်ခွင့်မပြုပဲ အထက်တန်းကျတဲ့ တော်ဝင်သူများနဲ့ မင်းမှုထမ်းတွေကိုသာ ၀င်ခွင့်ပြုထားတဲ့နေရာ ဖြစ်ပါတယ်။

တားမြစ်မြို့တော်မှာ အပြင်နန်းတော်ဝန်း နဲ့ အတွင်းနန်းတော်ဝန်းဆိုပြီး နှစ်ခုထပ်ခွဲထားပါသေးတယ်။ အပြင်နန်းတော်ဝန်းမှာတော့ အဓိကနန်းဆောင် ၃ခုရှိပြီး အတွင်းနန်းတော်ဝန်းမှာတော့ မင်းမိဖုရားတွေစံတဲ့ နန်းဆောင်နှစ်ခု နဲ့ တိုင်းရေးပြည်ရေးဆောက်ရွက်တဲ့ ညီလာခံကျင်းပတဲ့နန်းဆောင်တွေ ရှိပါတယ်။ အပြင်နန်းတော်ဝန်း နဲ့ အတွင်းနန်းတော်ဝန်း ကွာခြားချက်ကတော့ အတွင်းဘက်မှာ သစ်ပင်တွေပေါများသလောက် အပြင်ဘက်မှာတော့ သစ်ပင်တွေကို မတွေ့ရတာပါ။ ဒါ့အပြင် ကြီးမားကျယ်ဝန်းပြီး လှပတဲ့ ဥယျာဉ်တော်ကြီးတစ်ခုလည်းရှိပါတယ်။

ဒီမြို့ဟာ တရုတ်မှာ ရှေးဟောင်းနန်းတော် ၃ခုရှိတဲ့ထဲက တစ်ခုဖြစ်သလို မပျက်စီးပဲ ပကတိအတိုင်းကျန်တဲ့ တစ်ခုတည်းသောနန်းတော်လည်းဖြစ်ပါတယ်။ ဒီလိုနှစ်ပေါင်း ၅၀၀ ကျော်တည်ရှိနေရခြင်းအကြောင်းကတော့ ခေတ်အဆက်ဆက် တာဝန်ရှိသူတွေဟာ ဂရုတစိုက်ထိမ်းသိမ်းခဲ့ကြလို့ဖြစ်ပါတယ်။ ဒီနန်းတော်ကို တရုတ်လူမျိုးတွေဟာ သူတို့ရဲ့နိုင်ငံရတနာလို့ သတ်မှတ်ထားခဲ့ပါတယ်။

၁၉၈၇ခုနှစ်မှာတော့ UNESCO ရဲ့ ရှေးဟောင်း ကမ္ဘာ့အမွေအနှစ်နေရာတစ်ခုအဖြစ် သတ်မှတ်ခြင်းခံရပါတယ်။

နန်းတော် အဆောက်အဦးပေါင်း ၉၈၀ စလုံးကို သစ်သားတွေနဲ့ အဓိကတည်ဆောက်ထားတာဖြစ်ပြီး အခန်းပေါင်း ၈၈၈၆ ခန်းပါဝင်ပါတယ်။ အခန်းတွေထဲမှာ ရှားပါးပြီးတန်ဖိုးရှိလှတဲ့ ပန်းချီ၊ ကြွေထည်၊ ပန်းပု၊ ကြေးထည် စတဲ့ပစ္စည်းများ နဲ့အတူ ခေတ်အဆက်ဆက် နေထိုင်ပုံ နဲ့ ယဉ်ကျေးမှုအနုပညာ တွေကို ပြသထားပါတယ်။

နှစ်စဉ် ကမ္ဘာလှည့်ခရီးသွားပေါင်း ၁၄သန်းခန့် လာရောက်လည်ပတ်လေ့ရှိတဲ့နေရာလည်းဖြစ်ပါတယ်။ တားမြစ်မြို့တော်ဆိုတဲ့ နာမည်အတိုင်း စုစုပေါင်း ဧရိယာရဲ့ ၄၀% ကို ခရီးသွားတွေဝင်ရောက်ဖို့ ၀င်ရောက်ဖို့ တားမြစ်ခံထားရဆဲပါ။ ပြင်ဆင်ထိန်းသိမ်းနေတာကြောင့်ဖြစ်ပြီး ၂၀၁၉ အစောပိုင်းမှာတော့ စုစုပေါင်း ဧရိယာရဲ့ ၈၀% အထိ ၀င်ရောက်လည်ပတ်ခွင့် ရတော့မယ်လို့ သိရပါတယ်။

VIDEO ကြည့်ရှု့ရန်

 

Leave a Reply