၂၀ ရာစုရဲ့ အကျော်ကြားဆုံး အနုပညာရှင်ကြီး ပီကာဆို

ရေးသားသူ – Academy Page

ပီကာဆိုသည် ၂၀ -ရာစုခေတ်၏ အထင်ရှားဆုံး အနုပညာရှင်တဦး ဖြစ်သည် ။ သူသည် အသက် ၉၀ – ကျော်အထိ နေထိုင်သွားခဲ့သူတဦးဖြစ်ပြီး သူ့ဘဝတလျောက်လုံး ပန်းချီအနုပညာစတိုင် အများအပြား ရေးဆွဲခဲ့သူဖြစ်သည် ။ မျဉ်းများ ၊ ထောင့်များ ကိုအခြေခံပြီး ရေးဆွဲသည့် cubism ဟု ခေါ်သော ပန်းချီစတိုင်သစ်ကို ချပြခဲ့သည် ။

ငယ်ဘဝ

နာမည်အရင်းမှာ Pablo Ruiz Picasso ဖြစ်ပြီး သူ့အား ၁၈၈၁ – ခုနှစ် အချိန်က စပိန်နိုင်ငံ မာလာကာဒေသတွင် မွေးဖွား ခဲ့သည် ။ သူ၏ ဖခင်မှာလည်း ပန်းချီဆရာတဦး ဖြစ်ကာ ဖခင်ထံမှပန်းချီပညာကို စတင်သင်ယူခဲ့သည် ။ ငယ်စဉ်က စပိန်အနုပညာ အကယ်ဒမီ ကျောင်းတွင် ပန်းချီပညာကို သင်ယူခဲ့ကာ ၁၄ – နှစ်အရွယ်တွင် အဆင့်မြင့် Level ကို လေ့လာနိုင်သည်အထိ ထူးချွန်နေပြီ ဖြစ်သဖြင့် ပါရမီရှင်အဖြစ် လူအများ၏ ချီးကျူးဂုဏ်ပြုခြင်းကို ခံခဲ့ရသည်။

၁၉၀၀ ခုနှစ်တွင် ပြင်သစ်သို့ အလည်ထွက်သွားပြီး လမ်းဘေးတွင်ရှု့ခင်းပုံများ ၊ လူပုံတူများ ရေးဆွဲခြင်းဖြင့် အသက်မွေးဝမ်းကြောင်းကို စတင်ခဲ့သည် ။ ပီကာဆိုသည် သူ၏အနုပညာဈာန်ကို လိုက်ပြီး ပန်းချီစတိုင် အမျိုးမျိုး ပြောင်းလဲရေးဆွဲခဲ့ရာ သူ၏ပန်းချီကားများကို ခေတ်နှင့်ခိုင်းနှိုင်းလေ့ရှိသည် ။

ပီကာဆို၏ပန်းချီခေတ်စတိုင်များ

၁၉၀၁ မှ ၁၉၀၃ ခုနှစ်အချိန်ကို ပီကာဆို၏ Blue Period ဟုဆိုကြသည် ။ ထိုအချိန်က သူ၏ပန်းချီကားများမှာ ဝမ်းနည်းကြေကွဲမှုကို ဖေါ်ညွှန်းသည့် ပန်းချီကားများဖြစ်သည် ။ ၁၉၀၄ မှ ၁၉၀၅ ခုနှစ်အချိန်များကို Rose period ဟုခေါ်ကြသည် ။ ထိုအချိန်က ပန်းချီကားများမှာ ဆပ်ကပ်ထဲမှ လူများ၏ သက်ဝင်လှုပ်ရှားဟန်များကို အနီရောင် ၊ ပန်းရောင်များ ကို အသုံးပြုကာ ရေးဆွဲခဲ့သည် ။

ပီကာဆိုသည် ပြင်သစ်တွင် ဆင်းရဲနွမ်းပါးစွာနေထိုင်ရင်း Fernande Olivier အမည်ရ အမျိုးသမီး နှင့် စတင်တွေ့ရှိခဲ့သည် ။ သူမသည် ပီကာဆို၏ ပန်းချီ အနုပညာ ဈာန်ဝင်စားသည့် အမျိုးသမီးအများအပြားထဲမှ ပထမဆုံး အမျိုးသမီးဖြစ်သည် ။ သူမ နှင့် တွေ့ဆုံပြီးနောက် နှစ်ပေါင်းများစွာ ပီကာဆိုရေးဆွဲခဲ့သည့် အမျိုးသမီးပုံများမှာ Olivier ၏ ရုပ်သွင်ကို အခြေခံကာ ဈာန်ဝင် ရေးဆွဲခဲ့သည် ။

ထို့နောက် ပီကာဆိုသည် အာဖရိကအနုပညာကို စိတ်ဝင်စားလာပြီး ကောက်ကြောင်း ပန်းချီဆွဲဟန်သို့ ပြောင်းလဲသွားခဲ့သည် ။ ၁၉၀၇ – ခုနှစ်တွင် ရေးဆွဲခဲ့သည့် Les Demoiselles d’Avignon အမည်ရ ပန်းချီကားကို ရေးဆွဲပြီး ကမ္ဘာ့ပန်းချီလောကကို အံ့သြသင့်စေခဲ့သည် ။ ထိုပန်းချီကားကို Cubist စတိုင်ဟုခေါ်ပြီး Cubist period တွင်ရေးဆွဲ ဟန်အမျိုးကို ချပြခဲ့သည် ။

လူအများအပြားမှ ပီကာဆို၏ အကောင်းဆုံးပန်းချီကားမှာ ၁၉၃၇ – ခုနှစ်တွင် ရေးဆွဲခဲ့သော စပိန်ပြည်တွင်း စစ်အကြောင်းကို ဖေါ်ညွှန်းသည့် Guernica အမည်ရ ပန်းချီကားဟု မှတ်ချက်ပေးကြသည် ။ နိုင်ငံရေးအငွေ့အသက်မကင်းသည့် အဆိုပါပန်းချီကားမှာ စပိန်နိုင်ငံ ပြည်တွင်းစစ်ကာလအတွင်း မြို့တစ်မြို့ပျက်စီးသွားရပုံကို သရုပ်ဖော်ထားသည်။

ပီကာဆိုသည် ပန်းချီများသာမက ဆိုင်းပုဒ်များ ၊ ပိုစတာများ ၊ ရုပ်တုများ နှင့် ကြွေထည် မြေထည်များ ကိုလည်းဖန်တီးခဲ့သူဖြစ်သလို ကဗျာစပ်လည်း ကျွမ်းကျင်သူဖြစ်သည် ။ သူသည် အသက်ရှည်သလို ဆွဲခဲ့သည့် ပန်းချီကားပေါင်းကလည်း ၂၀၀၀၀ခန့်ရှိသည်။ ပီကာဆိုသည် ၁၉၇၃ – ခုနှစ်တွင် ကွယ်လွန်သွားခဲ့သည် ။

ပီကာဆို၏ အရှိန်အဝါ

ပီကာဆိုသည် ဟန်အမျိုးမျိုးဖြင့် ပုံများရေးဆွဲတတ်သည်။ အခြားပန်းချီပညာရှင်များအပေါ် ကြီးမားစွာ ဩဇာလွှမ်းမိုးနိုင်ခဲ့သူလည်းဖြစ်သည်။ ကမ္ဘာတလွှားရှိ စတိုင်အမျိုးမျိုးရှိသည့် ပန်းချီပညာရှင်များမှ ပီကာဆို၏ အနုပညာအား ၂၀ -ရာစု ၏ အကောင်းဆုံး ပန်းချီကားများဟု မှတ်ချက်ပေးကြသည် ။ ပီကာဆို၏ ပန်းချီကားများမှာ ရိုးရှင်းမှု ရှိသည် ။ ကမ္ဘာ့ဈေးအကြီးဆုံး ပန်းချီကားများစာရင်းတွင်လည်း ပီကာဆို၏ ပန်းချီကားများ ပါဝင်ခဲ့ပြီး Les Femmes d’Alger ပန်းချီကား၏တန်ဖိုးသည် ဒေါ်လာ ၁၈၉ သန်း ဖြစ်သည်။

ပီကာဆိုသည် ပန်းချီပညာသာမက ပန်းပုအတတ်ကိုပါ ကောင်းစွာ တတ်ကျွမ်းသည်။ သူဖန်တီးထုလုပ်ခဲ့သော ရုပ်တုများမှာလည်း ရိုးရာလက်မှုပညာကို အခြေခံပြီး ဒေသထွက် သစ်များ ၊ သတ္တုပစ္စည်းများ နှင့် ပြုလုပ်ခဲ့သည် ။ ယနေ့အချိန်တွင် ကမ္ဘာတလွှားရှိ အနုပညာပြတိုက်များတွင် ပီကာဆို၏ အနုပညာလက်ရာများ ကို မြင်တွေ့နိုင်သည် ။ ပီကာဆို ထုလုပ်ခဲ့သည့် ရုပ်တု တခုသည် ချီကာဂိုမြို့လယ်တွင် မြို့၏ landmark တခု အနေဖြင့် တည်ရှိသည် ။

Academy Page