သမိုင်းတလျှောက် ဈေးအကြီးဆုံး ပန်းချီကားများ

ပန်းချီ ဆိုတာ အနုပညာရပ်တွေထဲမှာ တမူထူးတဲ့ အနုပညာ ဖြစ်ပါတယ်။ တချို့ပန်းချီကားတွေဟာ သာမန်လူတွေအတွက် သိပ်မထူးခြားပေမယ့် သူတို့ရဲ့ တန်ဖိုးက ထင်မှတ်မထားလောက်အောင် ကြီးမြင့်နေပါတယ်။ ဒီတခါတော့ သမိုင်းတလျှောက် ရောင်ချခဲ့ကြသမျှ ထဲက ဈေးအကြီးဆုံး ပန်းချီ ၅ ခု ကို ဖော်ပြလိုက်ပါတယ်။

၅။ Number 17A

ပဉ္စမ ဈေးအကြီးဆုံး နေရာမှာ ရှိနေတာကတော့ Number 17A ဆိုတဲ့ ပန်းချီကား ဖြစ်ပါတယ်။ ဒီပန်းချီကို အမေရိကန် ပန်းချီဆရာ Jackson Pollock က ၁၉၄၈ ခုနှစ်မှာ ရေးဆွဲခဲ့တာဖြစ်ပြီး သူဟာ ဒြပ်မဲ့ပန်းချီ Abstract လောကမှာ ထင်ရှားတဲ့ ပုဂ္ဂိုလ်တဦးဖြစ်ပါတယ်။ ပန်းချီဆရာက စိတ်ကူးစိတ်သန်းများ ခံစားချက်များကို လွတ်လပ်စွာ ရေးဆွဲထားတာကြောင့် သာမန်ကြည့်ရှု့သူတို့အတွက်တော့ အလွန်ရှုပ်ထွေးတဲ့ အရာတခုလို့ပဲ မြင်မိကြမှာပါ။ ဒီပန်းချီကားကို ၂၀၁၅ ခုနှစ်မှာ အမေရိကန် David Geffen ဖောင်ဒေးရှင်းက ပြန်လည်ရောင်းချခဲ့ပြီး ဘီလျံနာ Kenneth C. Griffin က ဝယ်ယူသွားခဲ့ပါတယ်။ ဝယ်ယူသွားတဲ့ဈေးနှုန်းကတော့ အမေရိကန်ဒေါ်လာ သန်း ၂၀၀ ဖြစ်ပါတယ်။

၄။ Nafea Faa Ipoipo

နာမည်က ပြင်သစ်လိုပေးထားတာဖြစ်ပြီး အဓိပ္ပါယ်က When Will You Marry? ဘယ်တော့လက်ထပ်မှာလဲ ဆိုပြီးဖြစ်ပါတယ်။ တဟီတီကျွန်းသူနှစ်ယောက် ထိုင်နေတဲ့ပုံဖြစ်ပါတယ်။ ဒီပန်းချီကားကို ပြင်သစ်ရဲ့ နာမည်ကျော် ပန်းချီဆရာကြီး Paul Gauguin က ၁၈၉၂ ခုနှစ်က ရေးဆွဲထားတဲ့ ဆီဆေးပန်းချီကားဖြစ်ပါတယ်။ သူ့ကို မြန်မာမှာတော့ ဂေါ်ဂင် ဆိုပြီး သိကြပါတယ်။ ဒီပန်းချီကားကို ၂၀၁၄ ခုနှစ်မှာ ဆွစ်ဇာလန်လူမျိုး အနုပညာပစ္စည်းစုဆောင်းသူ Rudolf Staechelin မိသားစု ထံကနေ ကာတာအစိုးရက ဒေါ်လာ သန်း ၂၁၀ နဲ့ ဝယ်ယူသွားခဲ့တာဖြစ်ပါတယ်။

၃။ The Card Players

ပြင်သစ်လို Les Joueurs de Cartes လို့သိကြတဲ့ ဖဲကစားသူများ ဆိုတဲ့ ဒီပန်းချီကားကိုတော့ ပြင်သစ်နာမည်ကျော် ပန်းချီဆရာ Paul Cézanne ပေါလ်စေဇန်း က ၁၈၉၂-၉၃ ခုနှစ်ကြားမှာ ရေးဆွဲခဲ့တာဖြစ်ပါတယ်။ စိတ်ဝင်တစား ဖဲကစားနေသူ နှစ်ယောက်ပုံပါတဲ့ ဒီဆီဆေးပန်းချီကားကို ၂၀၁၁ ခုနှစ်မှာ ဂရိလူမျိုး အနုပညာပစ္စည်း စုဆောင်းသူ နဲ့ လုပ်ငန်းရှင်တဦးဖြစ်သူ George Embiricos က ပြန်လည်ရောင်းချခဲ့ပါတယ်။ ဝယ်ယူသွားသူကတော့ ကာတာ တော်ဝင်မိသားစုဖြစ်ပြီး ဈေးကတော့ ဒေါ်လာ သန်း ၂၅၀ နဲ့ ဖြစ်ပါတယ်။

၂။ Interchange

ကမ္ဘာပေါ်မှာ ဒုတိယ ဈေးအကြီးဆုံး ပန်းချီကားကတော့ Interchange အမည်ရတဲ့ ပန်းချီကားဖြစ်ပါတယ်။ ဒီပန်းချီကားကိုတော့ ဒတ်ချ် – အမေရိကန် ပန်းချီဆရာ တယောက်ဖြစ်ပြီး ဒြပ်မဲ့ပန်းချီလောကမှာ ကျော်ကြားသူ Willem de Kooning က ၁၉၅၅ ခုနှစ်မှာ ရေးဆွဲခဲ့ပါတယ်။ ဒီပန်းချီကားကို ၂၀၁၅ ခုနှစ်မှာ အမေရိကန် David Geffen ဖောင်ဒေးရှင်းက ပြန်လည်ရောင်းချခဲ့ပြီး ဘီလျံနာ Kenneth C. Griffin က ဝယ်ယူသွားခဲ့ပါတယ်။ ဝယ်ယူသွားတဲ့ဈေးနှုန်းကတော့ အမေရိကန်ဒေါ်လာ သန်း ၃၀၀ ဖြစ်ပါတယ်။

၁။ Salvator Mundi

လက်ရှိ အချိန်ထိ ကမ္ဘာပေါ်မှာ ဈေးအကြီးဆုံး ပန်းချီကားအဖြစ် မှတ်တမ်းတင်ထားရတာကတော့ ခရစ်တော်ရဲ့ပုံကိုရေးဆွဲထားတဲ့ Salvator Mundi ဆိုတဲ့ပန်းချီကားပါ။ ကမ္ဘာလောကရဲ့ကယ်တင်ရှင် လို့ အဓိပ္ပါယ်ရပြီး ရေးဆွဲသူကတော့ အီတလီလူမျိုး စွယ်စုံပညာရှင်ကြီး လီယိုနာဒို ဒါဗင်ချီဖြစ်ပါတယ်။ လီယိုနာဒိုဟာ ဒီပန်းချီကားကို အေဒီ ၁၅၀၀ ပြည့်နှစ်ဝန်းကျင်မှာ ရေးဆွဲခဲ့တာဖြစ်ပြီး သက်တမ်းအားဖြင့် နှစ်ပေါင်း ၅၀၀ ဝန်းကျင် ရှိနေပြီဖြစ်ပါတယ်။

၂၀၁၇ ခုနှစ် နယူးယောက် အနုပညာပွဲတော်မှာတော့ ဒီပန်းချီကားကို ဒေါ်လာ သန်း၄၅၀ ($450,312,500) နဲ့ ဝယ်ယူသွားခဲ့သူကတော့ ဆော်ဒီမင်းသား Badr bin Abdullah (လက်ရှိဆော်ဒီ ယဉ်ကျေးမှုဝန်ကြီး) ဖြစ်ပါတယ်။ တကယ်တော့ ဒီပန်းချီကားကို Badr bin Abdullah က ကြားခံဝယ်ယူခဲ့သူသာ ဖြစ်ပြီး တကယ့်ဝယ်ယူသူ အစစ်အမှန်က ဆော်ဒီအိမ်ရှေ့မင်းသား Salman ဖြစ်တယ်လို့ သိရပါတယ်။

Ref: List of most expensive paintings : Wikipedia