လူသိနည်းတဲ့ မျောက်အမျိုးစား တမျိုး

ဒီမျောက်ကိုတော့ မြင်ဖူးတဲ့သူ နည်းမယ်ထင်ပါတယ်။ ဒါပေမယ့် ဒီမျောက်တွေဟာ ဘရာဇီးနိုင်ငံမှာတော့ ပေါများစွာ တွေ့ရတဲ့မျောက်ငယ်တမျိုးဖြစ်ပါတယ်။ ဦးခေါင်းဖြူ မာမိုစက်မျောက် White-headed marmoset လို့ခေါ်ပါတယ်။ tufted-ear marmoset ၊ Geoffroy’s marmoset နဲ့ Geoffrey’s marmoset စတာတွေကလည်း သူ့ကိုခေါ်တဲ့ အခြားအမည်တွေပဲ ဖြစ်ပါတယ်။ ဒီမျောက်တွေရဲ့ သိပ္ပံအမည်ကတော့ Callithrix geoffroyi ဖြစ်ပါတယ်။

ပုံမှာ မြင်ရတဲ့အတိုင်းပဲ သူ့ရဲ့ပုံသဏ္ဍာန်က ကျွန်တော်တို့ပုံမှန်တွေ့နေကြ မျောက်တွေနဲ့ အလွန်ကွဲပြားပါတယ်။ ဦခေါင်းနဲ့ မျက်နှာက အဖြူရောင်ဖြစ်ပြီး ၊ ရှည်လျားထူးထဲတဲ့ အနက်ရောင် နားစွန်းမွှေးတွေ ရှိနေကာ ကျောဘက်ကတော့ အညိုရောင် နဲ့ အနက်ရောင် ရောယှက်နေပါတယ်။ ကျန်တဲ့ ခန္ဓာကိုယ်အပိုင်းတွေကတော့ အညိုရောင်ဖြစ်ပြီး အမြီးမှာတော့ အဖြူရောင်ကွင်းတွေ ရစ်ပတ်ထားသလို ရှိနေပါတယ်။ ဒီမျောက်တွေဟာ အထီးနဲ့ အမ သိပ်ကွဲပြားခြင်း မရှိပါဘူး။

ဒီမျောက်တွေဟာ ပျမ်းမျှအရွယ်အစားအားဖြင့်တော့ ခန္ဓာကိုယ်အလျား ၈လက်မခန့်သာ ရှိပေမယ့် ၁ပေ ဝန်းကျင်ခန့် ရှည်တဲ့ အမြီးတွေကို ပိုင်ဆိုင်ထားကြပါတယ်။ ခန္ဓာကိုယ်အလေးချိန်ကတော့ ၉အောင်စ ကနေ ၁၃ အောင်စ အထိသာ ရှိတတ်ပါတယ်။ သိပ္ပံပညာတွေကတော့ ဒီမျောက်တွေ အခုလို ပုံသဏ္ဍာန်ကွဲပြားလာရတာဟာ အင်းဆက်တွေကို အဓိကစားသုံးလေ့ရှိတာကြောင့်လို့ ယူဆကြပါတယ်။

ဦးခေါင်းဖြူ မာမိုစက်မျောက် တွေကို တောင်အမေရိကတိုက်က ဘရာဇီးနိုင်ငံမှာ အများဆုံးတွေ့ရလေ့ရှိပါတယ်။ ဘရာဇီးနိုင်ငံ အရှေ့ပိုင်းနဲ့ တောင်ပိုင်းမှာ ရှိတဲ့ Bahia ၊ Espírito Santo ၊ Minas Gerais နဲ့ Santa Catarina စတဲ့ပြည်နယ်တွေက သစ်တောတွေထဲမှာ အများဆုံးတွေ့ရလေ့ရှိပါတယ်။ ဘရာဇီးဒေသခံတွေကတော့ ဒီမျောက်တွေကို sagüi (သို့) sauim လို့ပဲ ခေါ်လေ့ရှိကြပါတယ်။

ဒီမျောက်တွေဟာ အစုံစားပါတယ်။ ပန်းပွင့် ၊ ပန်းဝတ်ရည် ၊ သစ်သီး ၊ သစ်ဖုများသာမက ဖား ၊ ခရု ၊ ပုတ်သင် ၊ ပင့်ကူ စတဲ့အကောင်ငယ်လေးတွေအပြင် အင်းဆက်တွေကိုလည်း စားလေ့ရှိကြပါတယ်။ ဒါတင်မကသေးပဲ သစ်ပင်တွေမှာ ထွက်ရှိတတတ်တဲ့ သစ်စေးတွေကိုလည်း စားသုံးကြပါတယ်။ သစ်ပင်ကို အပေါက်တွေဖြစ်စေပြီး အစေးတွေကို ကော်ထုတ်စားတဲ့ မျောက်ဆိုလို့ ဒီမျောက်တမျိုးသာ ရှိပါသတဲ့။ ဒီလိုခြစ်ပြီး သစ်စေးတွေကို စားတဲ့အခါမှာတော့ သူတို့ရဲ့ ကြီးမားတဲ့ရှေ့သွားတွေကို အသုံးပြုလေ့ရှိပါတယ်။

ဦးခေါင်းဖြူ မာမိုစက်မျောက်တွေဟာ အုပ်စုလိုက်ဖွဲ့နေရတာကို နှစ်သက်ပြီး ၈ကောင်ကနေ အကောင် ၂၀ ခန့်အထိ အုပ်စုတွေ ဖွဲ့နေလေ့ရှိကြပါတယ်။ အဖွဲ့ဝင်မျောက်တွေဟာ သူတို့အဖွဲ့က ငယ်ရွယ်တဲ့မျောက်ကလေးတွေကို စောင့်ရှောက်ပေးလေ့ရှိပါတယ်။ စိတ်ဝင်စားစရာတခုကတော့ ဒီမျောက်တွေဟာ တလင်တမယားစနစ် monogamous ကို ကျင့်သုံးပါသတဲ့။ ဒီမျောက်တွေရဲ့ ကိုယ်ဝန်ဆောင်ချိန်ကတော့ ၄လခွဲခန့် ကြာတတ်ပါတယ်။ မျောက်ငယ်လေးတွေကို မျောက်မတွေသာမက မျောက်ထီးတွေကလည်း ကူညီစောင့်ရှောက်ပေးကြပါတယ်။

ဦးခေါင်းဖြူ မာမိုစက်မျောက်တွေဟာ ရှားပါးစာရင်းမဝင်ပေမယ့် သူတို့ရဲ့ကောင်ရေဟာ တနေ့တခြား လျှော့ကျလာတာကြောင့် ဒေသအများစုမှာ သစ်တောဥပဒေတွေနဲ့ ဒီမျောက်တွေကို စောင့်ရှောက်ကာကွယ် ထိမ်းသိမ်းလျက်ရှိပါတယ်။ ဒီမျောက်တွေရဲ့ပျမ်းမျှသက်တမ်းကတော့ ၁၀ နှစ် ဝန်းကျင် ဖြစ်ပါတယ်။