ရှာမှရှားတဲ့ သံမဏိလူသား အမွှာညီအစ်ကို

ဒိန်းမတ်နိုင်ငံက စတီးန် နဲ့ ပီတာလို့ ခေါ်တဲ့ ညီအစ်ကိုနှစ်ယောက်ပါ။ ပီတာဟာ အောက်ဆီဂျင်မလုံလောက်ပဲမွေးဖွားလာတာကြောင့် မသန်စွမ်းဖြစ်ခဲ့ရပြီး သူ့ကိုထောက်ပံ့ပေးဖို့၂၄နာရီလုံးလုံး အကူအညီလိုအပ်ပါတယ်။ ဒါပေမယ့် သူ့ရဲ့အိပ်မက်က Ironman ဖြစ်ဖို့ပါတဲ့။

Ironman အပြေးပြိုင်ပွဲကို ပြီးဆုံးအောင်စွမ်းဆောင်နိုင်တဲ့သူဖြစ်ချင်တာပါ။ Ironman ပြိုင်ပွဲဟာ ၂.၄မိုင် ရေကူးတာ ၊ ၁၁၂မိုင် စက်ဘီးနင်းတာ နဲ့ ၂၆.၂၂မိုင် မာရသွန်ပြေးတာ စတဲ့ ကစားနည်းသုံးမျိုးကိုဆက်တိုက်ပြုလုပ်ရတဲ့ ပြိုင်ပွဲဖြစ်ပါတယ်။

အကွာအဝေးကိုကြည့်တာနဲ့ တင် ပုံမှန်လူတစ်ယောက်တောင် ခက်ခက်ခဲခဲကြိုးစားရတာကို ခန့်မှန်းမိကြမှာပါ။ ဒီကစားနည်းကို သူတို့ညီအစ်ကို နှစ်ယောက်ဝင်ပြိုင်ခဲ့ပါတယ်။ ဒီအတွက် လပေါင်းများစွာ လေ့ကျင့်ခဲ့ရပါတယ်။ အစ်ကိုဖြစ်သူရဲ့ ဆန္ဒကိုဖြည့်ပေးချင်တဲ့ ညီ စတီးန်ဟာ ပုံမှန်လူတွေထက် နှစ်ဆ ပိုပင်ပမ်းပြီး ပိုကြိုးစားရပါတယ်။ သူတို့နှစ်ယောက်ရဲ့ အဖွဲ့အမည်ကို Tvilling Danish လို့ပေးထားပြီး ပုံမှန်အားကစားသမားတွေနဲ့ဝင်ရောက် ယှဉ်ပြိုင်ခဲ့ပါတယ်။

ရေကူးတဲ့အခါ အစ်ကိုဖြစ်သူကိုတင်ပြီး ဆွဲကူးရပါတယ်။ စက်ဘီးစီးတဲ့အခါ အစ်ကိုဖြစ်သူကို ရှေ့မှာထားပြီး နင်းခဲ့ရပါတယ်။ အပြေးပြိုင်တဲ့အခါမှာလည်း အစ်ကိုဖြစ်သူကို ချီပိုးရင်းပြေးခဲ့ပါတယ်။ ညီဖြစ်သူရဲ့ ရှာမှရှားတဲ့စိတ်ဓာတ်ပါ။

သူတို့စတင်ပြိုင်ပွဲဝင်တော့ အားလုံးရဲ့ဟားတိုက်ခြင်းကို ခံရပါတယ်။ မဖြစ်နိုင်တဲ့ အနေအထားမို့လို့ပါ။ ဒါပေမယ့် သူတို့နှစ်ဦးဟာ ဝင်ပြိုင်ခဲ့ပါတယ်။ ရေကူးခြင်းကို ပြီးဆုံးခဲ့ပြီး စက်ဘီးစီးရာ ၂၂ကီလိုမီတာ အကွာအဝေးမှာ စက်ဘီးပျက်စီးပြီး အရှုံးပေးခဲ့ရပါတယ်။

နောက်တစ်ကြိမ်ပြိုင်တဲ့အခါမှာတော့ သူတို့ဟာ ပြိုင်ပွဲသုံးရပ်လုံးကို ပြီးဆုံးအောင်ပြေးနိုင်ခဲ့ကြပါတယ်။ အစ်ကိုဖြစ်သူဖြစ်ချင်တဲ့ Ironman ဖြစ်ခဲ့ပါပြီ။ ပုံမှန်လူတွေအတွက် ၁၇နာရီဝန်းကျင် ပန်းတိုင်ကိုရောက်ပေမယ့် သူတို့ညီအစ်ကိုကတော့ ၂၃နာရီကြာမှ ပန်းဝင်ခဲ့ပါတယ်။ ခက်ခဲတဲ့ ခရီးရှည်ကြီးမှာ ညီဖြစ်သူ ပင်ပန်းခဲ့သလို မသန်စွမ်းအစ်ကို ဖြစ်သူဘယ်လောက် နာကျင်ပင်ပန်းနေမလဲ ဆိုတာ ခန့်မှန်းမိကြမှာပါ။

နောက်ဆုံးမှာတော့ အစ်ကိုဖြစ်သူရဲ့အရှုံးမပေးတဲ့စိတ် ၊ ညီဖြစ်သူရဲ့ အစ်ကို့အပေါ်မှာ ထားတဲ့မေတ္တာတွေကြောင့် သူတို့ဟာအောင်မြင်မှုကို ရယူနိုင်ခဲ့ကြပါတယ်။ နောက်ဆုံးမှ ပန်းဝင်ခဲ့ပေမယ့် ချန်ပီယံထက်တောင် တစ်နိုင်ငံလုံးရဲ့ချီးကျူးခြင်းကို ခံခဲ့ရပါတယ်။ သူတို့အတွက် သေမတတ်ပင်ပန်း နာကျင်ခဲ့ပေမယ့် အောင်မြင်ခဲ့တဲ့အတွက် ညီအစ်ကိုနှစ်ယောက်ဟာ ပြောမပြတတ်အောင်ဝမ်းသာနေကြပါတယ်။ ဒါကြောင့်ရှာမှရှားတဲ့ ညီအစ်ကိုလို့ ဆိုရခြင်းဖြစ်ပါတယ်။