မကြာခင်နစ်မြုပ်သွားတော့မယ့် ရုရှားနိုင်ငံက မြို့ကြီး

ရုရှားနိုင်ငံ Perm Krai ဒေသအတွင်းက Ural တောင်တန်းဒေသမှာတည်ရှိတဲ့ Berezniki မြို့ဟာ လူဦးရေ ၁သိန်းခွဲခန့် နေထိုင်တဲ့ မြို့ကြီးတစ်မြို့ဖြစ်ပါတယ်။ ၁၈၇၃ ခုနှစ်ခန့်ကတည်းက တည်ဆောက်ခဲ့တဲ့ဒီမြို့ဟာ Kama မြစ်ရဲ့နဖူးပေါ်မှာတည်ရှိနေတဲ့အပြင်ယင်းမြိုရဲ့အောက်ခြေမှာတော့ ဆားထုတ်လုပ်တဲ့ Potash(ဓာတ်ပြာ) ထွက်ရှိတဲ့မှိုင်းတွင်းကြီး တစ်ခုတည်ရှိလို့နေပါတယ်။

အဲဒီ Potash mine တွင်းကြီးကို ရာစုနှစ်တစ်စုနီးပါး ဓာတ်ပြာတူးဖော်ရေးလုပ်ငန်းတွေ ပြုလုပ်ပြီးချိန်မှာတော့၊မှားယွင်းတဲ့တူးဖော်မှုတွေနဲ့ရေတိုက်စားမှုတွေကြောင့် အောက်ခံ မြေသား ပြုန်းတီးသွားခြင်းနဲ့အတူ ကြီးမားတဲ့ တွင်းနက်ကြီးများစွာဟာ မြို့တော်ရဲ့နေရာအနှံ့အပြားမှာဖြစ်ပေါ်လာခဲ့ပြီး မြို့တော်ကြီးကိုတစ်စတစ်စဝါးမြိုပစ်ဖို့ အခြေအနေဖြစ်လာခဲ့ပါတယ်။အဲဒီကြီးမားတဲ့ တွင်းနက်ကြီးများစွာ ကိုတော့ ထုထည်ကြီးမားတဲ့ဆားနံရံကြီးတွေ၊ ဆားတိုင်ကြီးတွေက ထောက်ကန် ပေးထားပါတယ်။

(၂၀၀၆)ခုနှစ်ရောက်ချိန်မှာတော့ မိုးရွာသွန်းမှု၊မြေအောက်ရေအပါအဝင်အခြား အကြောင်းတွေကြောင့် ဒီတွင်းနက်တွေ အတွင်းကို ရေတွေဝင်ရောက်လာခဲ့ပါတယ်။ တွင်းအောက်ကြမ်းပြင်ကနေ ရေချိုတွေဝင်ရောက်လာချိန်မှာတော့ ထောက်ကန် ထားတဲ့ ဆားနံရံတွေ၊ဆားတိုင်ကြီးတွေဟာအရည်ပျော်သွားခဲ့ပြီး အပေါ်မြေသားကို ထိန်းသိမ်းထားနိုင်စွမ်းလျော့ကျလာခဲ့ပါပြန်ပါတယ်။ ဒါကြောင့် Berezniki မြို့ဟာလည်း ရေအောက်ကို တစ်ဖြည်းဖြည်း နစ်မြုပ်လာဖို့ဖြစ်လာပါတယ်။

ယခု Bereznikiမြို့ရဲ့အရေးပါတဲ့ လူနေရပ်ကွက်တွေနဲ့ စီမံကိန်းလုပ်ငန်းအများအပြားဟာ တွင်းနက်ကြီးတွေကတစ်ဆင့် မြေပြင်အောက်ကိုနစ်မြုပ်သွားခဲ့ပြီးဖြစ်ပါတယ်။ မြို့ကြီး တစ်မြို့လုံးကို ဝါးမြိုနေတဲ့တွင်းနက်ကြီးတွေကိုတော့ ဒေသခံတွေက Grandfather လို့ ခေါ်ဆိုကြပြီး တွင်းကြီးတွေရဲ့ အနက်ဟာမီတာ(၂၀၀)ကနေ (၄၀၀)အထိနက်ကြပါတယ်။

ဒါအပြင် ရေနစ်မြုပ်မှုကြောင့် Potash မိုင်းတွင်းတစ်နေရာကနေတစ်နေရာကို ဆက်သွယ်ထားရှိတဲ့ တစ်ခုတည်းသောမီးရထားလမ်းလည်း နစ်မြုပ်သွားခဲ့ရပြီး မြို့ရဲ့ အဓိက ကုန်သွယ်ရေးလုပ်ငန်းတွေကို ထိခိုက်စေခဲ့ပါတယ်။ Bereznikiမြို့ရဲ့မိုင်းတွင်း ကနေ ကမ္ဘာပေါ်မှာရှိတဲ့ Potash ဒြပ်စင်(၁၀)ရာခိုင်နှုန်းလောက်ကို ထုတ်လုပ်ပေးနေတာဖြစ်ပြီး မြို့သူ/သားအားလုံးရဲ့ ဝင်ငွေဟာလည်း ဒီ Potas ထုတ်ဖော်ရေးလုပ်ငန်းတွေ အပေါ်မှီတည်နေပါတယ်။

ယခုလို မိုင်းတွင်းအားလုံးရေနစ်မြုပ်ပျက်စီးသွားတာကြောင့် ဒေသခံတွေရဲ့ စီးပွားရေးလုပ်ငန်းတွေအပေါ်ဆိုးဆိုးရွားရွားထိခိုက်ခဲ့ရပါတယ်။ ဒါကြောင့်လည်း ၁၉၈၉ မှာ ဒီမြို့ရဲ့လူဦးရေဟာ ၂၀၁၂၁၃ဦး ရှိခဲ့ရာမှ ၂၀၀၂ခုနှစ်မှာ ၁၇၃၀၇၇ဦး ၊ ၂၀၁၀ခုနှစ်မှာ ၁၅၆၄၆၆ ဦး စသည်ဖြင့်ကျဆင်းခဲ့ပြီး ယခုဆိုရင်တော့ ၁သိန်းခွဲအောက်သာ ကျန်တော့ပါတယ်။

၂၀၁၈ခုနှစ်မှာတော့ ဒီမြို့မှာတွင်းနက်ကြီးစုစုပေါင်း ၁၀ ခုခန့်ရှိလာခဲ့ပါတယ်။ ရုရှားအစိုးရကတော့ Berezniki ရဲ့နစ်မြုပ်နေတဲ့လမ်း၊ အဆောက်အအုံတွေရဲ့ အခြေအနေကို video surveillance system(စောင့်ကြည့် ရေးစနစ်)၊ Seismuc sensors(ငလျင်ဒဏ်တိုင်းတာရေးကိရိယာ)၊နည်းပညာဂြိုလ်တုတွေကနေ အချိန်ပြည့်စောင့်ကြည့်ခြင်း၊ အနီးစပ်ဆုံးပင်လယ်ရေမျက်နှာပြင်ရဲ့ အနေ အထားအပေါ်စောင့်ကြည့်လေ့လာမှုစတာစတဲ့ နောက်ဆုံးနည်းပညာတွေကိုသုံးပြီး စောင့်ကြည့်မှုတွေကိုပြုလုပ်လျက်ရှိပါတယ်။

ဒါအပြင် Bereznikiရဲ့အောက်ခြေတွင်းနက်ကြီးတွေဟာ အခြားဆက်စပ် ဧရိယာတွေ အတွက် ဘေးကင်းမှုရှိမရှိကိုလည်း အထက်ဖော်ပြပါ နောက်ဆုံးပေါ်နည်းပညာတွေက အဖြေထုတ်ပေးနိုင်မှာလည်းဖြစ်ပါတယ်။

အစိုးရရုံးတာဝန်ရှိသူတွေနဲ့ ပုဂ္ဂိုလိကကုမ္ပဏီအချို့ကတော့ Berezniki မြို့ရဲ့တည်နေရာ ကို မာကျောတဲ့မြေသားသွင်ပြင်ရှိတဲ့ Kamaမြစ်ရဲ့ အခြားတစ်ဖက်ကမ်းကို ရွေ့ပြောင်း လိုပါတယ်။ အစိုးရအင်ဂျင်နီယာနဲ့ဘူမိဗေဒပညာရှင်တွေကလည်း Berezniki မှာဖြစ် ပေါ်နေတဲ့ တွင်းနက်ကြီးတွေရဲ့ဖွဲ့စည်းတည်ဆောက်မှုမျိုးဟာ အခြားနေရာတွေမှာဖြစ် ပေါ်ဖို့မလွယ်ကူကြောင်းနဲ့ Berezniki မှာကဲ့သို့သော တွင်းနက်ကြီးတွေကနေ ရေကြီး၊ ရေလျှံမှုတွေဟာလည်း ရုရှားနိုင်ငံအတွင်းက အခြားသော potash မိုင်းတွင်းတွေမှာ ဖြစ်လာဖို့ မရှိကြောင်းအခိုင်အမာဆိုထားကြပါတယ်။

Berezniki မြို့ရဲ့ နစ်မြုပ်မှုဖြစ်စဉ်အတောအတွင်းမှာတော့ မြို့နေပြည်သူတွေသေဆုံး၊ ပျောက်ဆုံးခြင်းတော့မရှိခဲ့ပါဘူး။ ယနေ့အချိန်ထိ ရေဘေးဒုက္ခသည်(၁၂၀၀၀)လောက် ကိုသာ ဘေးလွတ်ရာနေရာကို ရွေ့ပြောင်းပေးနိုင်ခဲ့ပြီး ကျန်ရှိတဲ့ Berezniki မြို့သူ/ သားအများစုကတော့ သူတို့ရဲ့နေအိမ်ကိုနောက်ဆုံးရေနစ်မြုပ်ချိန်အထိ စောင့်ကြည့်ကြမယ့် အနေအထားမှာရှိနေပါတယ်။

VIDEO