သိပ္ပံပညာရှင်တွေ အမြဲပြောလေ့ပြောထရှိတဲ့ စကားတစ်ခွန်း ရှိပါတယ်။ အသက်ကြီးသူတွေ – “မိနစ်ဝက် (၃) မျိုး၊ နာရီဝက် (၃) မျိုးကို သတိပြုပါ” တဲ့။
မိနစ်ဝက် (၃) မျိုးဆိုတဲ့ စကားလုံးဟာ တစ်ပြားတစ်ချပ်မှ ကုန်ကျစရာမလိုဘဲ အသက်ပေါင်းများစွာကို ကယ်တင်နိုင်တယ်။ လူအတော်များများဟာ နေ့ခင်းနေ့လည်မှာ အကောင်း၊ နေ့ခင်းမှာ ဘာမှမဖြစ်ဘူး။ ညကျတော့ ဆုံးပြီတဲ့။ ဟင် မနေ့ကမှ သူ့ကို တွေ့ခဲ့သေးတယ်။ ဘယ်နှယ့်ဆုံးပြီလဲ။ ညဉ့်နက်မှာ အိမ်သာသွားဖို့ ရုတ်တရက် ထလိုက်ရာမှာ အမလေး ဦးနှောက်တွင်း သွေးလျော့သွားတယ်။ ခန္ဓာကိုယ်အနေအထားကြောင့် ဖြစ်ရတဲ့ သွေးတိုးနိမ့်ကျသွားမှုကြောင့် ဦးနှောက်တွင်း သွေးဝင်နည်းပြီး မူးလဲသွားတာ၊ တချို့လဲကျပြီး ခေါင်းခွံကွဲကြေသွားမယ်။ တချို့ နှလုံး ရုတ်တရက် ရပ်သွားမယ်။ ဒါဆိုရင် သိပ္ပံပညာရှင်တွေ ဘာဖြစ်လို့ မိနစ်ဝက် (၃)မျိုး ဆိုတာကို အကြံပြုကြတာလဲ။
ကျွန်တော်တို့က နှလုံးခုန်နှုန်းတိုင်းတာ မှတ်တမ်းပြုစက် (ECG) နဲ့ ဂရုတစိုက် လေ့လာလိုက်တော့ တွေ့ရှိရတာက နေ့ခင်းနေ့လည်တွေမှာ နှလုံးခုန်နှုန်းဟာ ပုံမှန်ပဲ၊ ညပိုင်းကျတော့ လူတော်တော်များများမှာ ရုတ်တရက် နှလုံးမှာ သွေးအားလျော့နည်းသွားတာ တွေ့ရတယ်။ နှလုံးကျုံ့မှု စောနေတယ်။ ဘယ်လိုအကြောင်းကြောင့် ဖြစ်ရတာလဲ။ အော်… သူ ရုတ်တရက် ကုတင်က ထလိုက်တော့ ချက်ချင်းပဲ သွေးဖိအား ကျဆင်းသွားတယ်။ ဦးနှောက်တွင်း သွေးလျော့နည်း ချို့တဲ့သွားမယ်။ နှလုံးခုန်ရပ်သွားမယ်။ ဒါကြောင့် သိပ္ပံပညာရှင်တွေက မိနစ်ဝက် (၃)မျိုးကို အကြံပြုတာ ဖြစ်ပါတယ်။
မိနစ်ဝက် (၃) မျိုး
နိုးနိုးချင်း ကုတင်ပေါ်က မထပါနဲ့။ မိနစ်ဝက် ဆက်လှဲနေပါ။
မိနစ်ဝက်ပြည့်ရင် ထထိုင်ပါ။ မိနစ်ဝက် ထိုင်ပါ။
ပြီးမှ ခြေထောက်တွဲလောင်းချပြီး မိနစ်ဝက် နေပါ။
မိနစ်ဝက် သုံးမျိုးပြီးမှ လိုရာထသွားပါ။
(မှတ်ချက်။ တစ်ညလုံး ညသိပ်ထားသော မော်တော်ကားလို မနက်ချက်ချင်းစက်နှိုးပြီး မောင်းသွား၍ မရပါ။ စက်ကို ပူအောင် raise လုပ်ရပါတယ်။ ထို့အတူ လူကြီးများသည် နိုးနိုးချင်းချင်း ရုတ်တရက် ချက်ချင်းထသွားက မသင့်လျော်ဟူသော အဓိပ္ပါယ်ဖြစ်ပါသည်။ မိနစ်ဝက်ဆိုသည်မှာ တစ်မှ သုံးဆယ်ထိ ရေတွက်လျှင် မိနစ်ဝက်ဖြစ်ပါသည်။ – – – – – ဘာသာပြန်သူ)
မိနစ်ဝက် (၃) မျိုးကို လိုက်နာကျင့်သုံးတာ တစ်ပြားတစ်ချပ်မှ မကုန်ဘူး။ ဦးနှောက်တွင်း သွေးယုတ်လျော့ ကျဆင်းတာလည်း မဖြစ်တော့ဘူး။ နှလုံးလည်း ဘာမှမဖြစ်ဘူး။ မလိုလားအပ်တဲ့ လဲကျကွဲကြေ သေဆုံးရမှုတွေ အများကြီး လျော့နည်းသွားမယ်။ မလိုလားအပ်တဲ့ နှလုံးသွေးကြောပိတ်ရောဂါတို့၊ လေဖြတ်တာတို့ မဖြစ်တော့ဘူး။
နာရီဝက် (၃) မျိုး
(၁) မနက်အိပ်ရာထပြီးတဲ့နောက် နာရီဝက် ကိုယ်လက်လှုပ်ရှား အားကစားလုပ်ပါ။ အနှေးပြေးတာမျိုး လုပ်ပေးပါ။ အနည်းဆုံး သုံးကီလိုမီတာ (၂ မိုင်နီးပါး) အောက် မလျော့ပါစေနဲ့။ ဒါမှမဟုတ် တခြား ကိုယ်လက်လှုပ်ရှားမှု တစ်ခုခုလုပ်ပါ။
(၂) နေ့လည်ပိုင်းမှာ နာရီဝက် အိပ်ပါ။ ဒါကတော့ လူ့ခန္ဓာကိုယ်ရဲ့ ဇီဝအချိန်ဇယားအရ လိုအပ်ချက် ဖြစ်ပါတယ်။ နေ့လည် နာရီဝက် အိပ်ခြင်းဖြင့် တစ်ညနေလုံး လန်းဆန်းနေပါလိမ့်မယ်။ သက်ကြီးရွယ်အိုတွေ ပိုလို့တောင် လိုအပ်ပါသေးတယ်။ ဘာဖြစ်လို့လဲဆိုတော့ သက်ကြီးရွယ်အိုတွေက ည-ညတွေမှာ စောစာအိပ် စောစာထတော့ အအိပ်အနေ နည်းတယ်။ ဒါကြောင့် နေ့လည်ပိုင်းမှာ ဖြည့်စွက်အိပ်စက် အနားယူသင့်တယ်။
(၃) ညနေဘက် ၆ နာရီ ၇ နာရီလောက်မှာ နာရီဝက် ဖြည်းဖြည်းလမ်းလျှောက်ပေးခြင်းအားဖြင့် ညည အိပ်လို့ ပိုကောင်းမယ်။ နှလုံးသွေးကြောပိတ်ရောဂါနဲ့ သွေးတိုးရောဂါ ဖြစ်ပွားနှုန်း လျော့နည်းစေတယ်။
ဆရာ မောင်မောင်လှိုင် (အပ်စိုက်ကု) ရဲ့ ကျန်းကျန်းမာမာ အသက် (၁၀၀) စာအုပ်မှ
Discussion about this post