ပထမဆုံးဂြိုဟ်တုကို အောင်မြင်စွာ လွှတ်တင်နိုင်ခဲ့တဲ့ သီရိလင်္ကာနိုင်ငံ

သီရိလင်္ကာနိုင်ငံဟာ ပထမဆုံးအကြိမ်အနေနဲ့ ကျောင်းသားနှစ်ယောက်တည်ဆောက်ထားတဲ့ ဂြိုဟ်တုကို ကမ္ဘာပတ်လမ်းကြောင်းထဲကို အောင်မြင်စွာ လွှတ်တင်နိုင်ခဲ့ပါတယ်။ လွှတ်တင်လိုက်တဲ့ ဂြိုဟ်တုရဲ့အမည်ကို ရာဝဏ-၁ (Ravana-1) လို့ အမည်ပေးထားပြီး အဲဒီဂြိုဟ်တုကို နိုင်ငံတကာ အာကာသစခန်း ( (International Space Station – ISS)က တဆင့် ကမ္ဘာပတ်လမ်းကြောင်းထဲကို လွှတ်တင်နိုင်ခဲ့တာဖြစ်ပါတယ်။

ဒီလိုလွှတ်တင်မှုမှာ သီရိလင်္ကာနိုင်ငံအပြင် ဂျပန် နဲ့ နီပေါနိုင်ငံနိုင်ငံမှ အခြားဂြိုဟ်တု ၂လုံးလည်း ပါဝင်နေပြီး  ၃ခုလုံးကိုပေါင်းကာ BIRDS-3 လို့အမည်ပေးထားပါတယ်။ ရာဝဏ-၁ ဂြိုဟ်တုကို တည်ဆောက်သူနှစ်ဦးကတော့ ဂျပန်နိုင်ငံ ကျူရှုးနည်းပညာတက္ကသိုလ်(Kyushu Institute of Technology)မှာ အာကာသပညာရပ်ကို လေ့လာသင်ကြားနေတဲ့ သီရိလင်္ကာနိုင်ငံသား Tharindu Dayaratne နဲ့ Dulani Chamika တို့နှစ်ဦးဖြစ်ပါတယ်။

ရာဝဏ-၁ ဂြိုဟ်တုရဲ့ပုံသဏ္ဍာန်ကတော့ ကုဗပုံဖြစ်ပြီး အရွယ်အစားကတော့ အလျား ၁၁.၃စင်တီမီတာ ၊ အနံ ၁၀စင်တီမီတာ နဲ့ အမြင့် ၁၀စင်တီမီတာ သာ ရှိပါတယ်။ အလေးချိန် ၂.၃ပေါင်ခန့်သာရှိတဲ့ ဒီဂြိုဟ်တုကို လွန်ခဲ့တဲ့ ၃ရက် ဇွန်လ ၁၇ရက်နေ့ သီရိလင်္ကာစံတော်ချိန် မွန်းလွဲ ၃နာရီ ၄၅မိနစ်မှာ အောင်မြင်စွာ လွှတ်တင်နိုင်ခဲ့တာဖြစ်ပါတယ်။

ဒီဂြိုဟ်တုကို ဂျပန်အာကာသစူးစမ်းလေ့လာရေး အေဂျင်စီ(Japan Aerospace Exploration Agency) ထံ ဖေဖော်ဝါရီလ ၁၈ ရက်နေ့က တရားဝင်လွှဲပြောင်းပေးခဲ့ပြီး အဲဒီကတဆင့် ဧပြီ ၁၇ ရက်နေ့မှာ နိုင်ငံတကာအာကာသစခန်းသို့ အမေရိကန်အာကာသယာဉ် Cygnus-1 နဲ့ ပို့ဆောင်ပေးခဲ့တာ ဖြစ်ပါတယ်။

ဒီဂြိုဟ်တုဟာ တစ်စက္ကန့်လျှင် ၇.၆ကီလိုမီတာနှုန်းနဲ့ တစ်နေ့လျှင် ၁၅ကြိမ်ခန့် ကမ္ဘာကိုလှည့်ပတ်လိမ့်မယ်လို့ ခန့်မှန်းထားကြပါတယ်။ရာဝဏ-၁ ဂြိုဟ်တုဟာ ကမ္ဘာ့မြေပြင် အမြင့် ကီလိုမီတာ ၄၀၀ လောက်ကနေ သိရိလင်္ကာနိုင်ငံ နဲ့ အနီးတဝိုက်နိုင်ငံတွေရဲ့ ပုံရိပ်တွေရိုက်ကူးခြင်း နဲ့ အခြားသုတေသနဆိုင်ရာ လုပ်ငန်းစဉ် ၄ခုကို လုပ်ဆောင်သွားမှာဖြစ်ပါတယ်။

ဒီဂြိုဟ်တုရဲ့ အနိမ့်ဆုံး သက်တမ်းကို တစ်နှစ်ခွဲလို့ခန့်မှန်းပေမယ့် ငါးနှစ်လောက်အထိလည်း လုပ်ငန်းတွေကို လုပ်ဆောင်နိုင်ကောင်း လုပ်ဆောင်နိုင်လိမ့်မယ်လို့ ဆိုပါတယ်။ ဒီဂြိုဟ်တုဟာ သီရိလင်္ကာနိုင်ငံအတွက် ကမ္ဘာ့အာကာသနည်းပညာ ရပ်ဝန်းထဲကို ပထမဆုံး ဝင်ရောက်လာခဲ့တဲ့ ခြေလှမ်းလည်းဖြစ်ပါတယ်။

VIDEO

Ref :
India Time News