နေရာတနေရာတည်းမှာပဲ နှစ်ပေါင်း ၄၀ နီးပါး ဓာတ်ပုံရိုက်ခဲ့ကြတဲ့သားအဖ

သင့်ကလေးကို ပြုစုပျိုးထောင်နေစဉ်မှာ သူတို့ကို ကိုယ့်မျက်စိရှေ့မှာ မြင်နေရတဲ့အတွက် သူတို့တဖြည်းဖြည်းပြောင်းလဲလာတာကို သတိထားမိဖို့ခက်ပါတယ်။ သင်သတိထားမိလိုက်တဲ့အချိန်မှာတော့ သူတို့ဟာ ဆယ်ကျော်သက်အရွယ်ရောက်လာပြီ ၊မကြာခင်မှာပဲ အထက်တန်းကျောင်းပြီး ၊ တက္ကသိုလ်တက်ပြီးတော့ သူတို့ရဲ့ကိုယ်ပိုင်မိသားစုကို ထူထောင်ကြပါတော့တယ်။

တရုတ်နိုင်ငံက ဓာတ်ပုံဆရာတယောက်ဖြစ်တဲ့ Hua Yunqing ကတော့ ဒါနဲ့ပတ်သက်လို့ သူ့သမီးဖြစ်သူ နဲ့ ပထမဆုံးဓာတ်ပုံရိုက်ခဲ့ပြီးတဲ့နောက် အိုင်ဒီယာတခု ရရှိခဲ့ပါတယ်။ သူ့အကြံကတော့ အမှတ်တရကို ထိန်းသိမ်းတဲ့အနေနဲ့ တူညီတဲ့နေရာမှာပဲ သမီးဖြစ်သူနဲ့ တနှစ်ကို တခါဓာတ်ပုံရိုက်ထားဖို့ ဖြစ်ပါတယ်။ သူဟာ သူ့ရဲ့အကြံကို တရုတ်အရှေ့ပိုင်း Jiangsu ပြည်နယ် Zhenjiang မြို့ရေကန်အနီးမှာ ၁၉၈၀ က စလို့ စတင်ခဲ့ပါတယ်။ ယခု ၂၀၁၉ ခုနှစ်ရောက်တဲ့အထိတိုင် အမြဲလိုလို ဓာတ်ပုံတွေရိုက်ကူးခဲ့တာဖြစ်ပါတယ်။

ပထမဆုံး ဓာတ်ပုံရိုက်ကူးခဲ့စဉ်က Yunqing ရဲ့အသက်ဟာ ၂၇နှစ်ဖြစ်ပြီး သမီးဖြစ်သူကတော့ ၁နှစ် အရွယ်ပဲ ရှိပါသေးတယ်။ ပထမတော့ ဘာအစီအစဉ်မှ မရှိသေးပဲ ဓာတ်ပုံကိုကြည့်ရင်းနဲ့ အလွန်နှစ်သက်ပြီး ဒီအကြံကို ရရှိခဲ့တာဖြစ်ပါတယ်။ သူတို့ သားအဖ ရိုက်ကူးထားတဲ့ ဓာတ်ပုံတွေကို ကြည့်တဲ့အခါ တနှစ် နဲ့ တနှစ် ဘာတွေ ဘယ်လိုပြောင်းလဲသွားသလဲဆိုတာ သိသာထင်ရှားစွာ မြင်ရမှာ ဖြစ်ပါတယ်။
“ဓာတ်ပုံရိုက်တုန်းက သာမန်ပါပဲ။ ဒီအတိုင်းပဲရိုက်ကူးဖြစ်ခဲ့တာပါ။ ရိုက်ထားတဲ့ ဓာတ်ပုံကို ပြန်ကြည့်ရင်းနဲ့မှ သဘောကျသွားခဲ့ပြီး နောက်နှစ်မှာလည်း ထပ်ရိုက်ဖြစ်ခဲ့တာပါ” လို့ Yunqing က ဆိုပါတယ်။

“အခုတော့ ဒီဓာတ်ပုံတွေဟာ မိသားစုအတွက် အမှတ်တရဖြစ်လာတာပေါ့။ နှစ်တိုင်းမပျက်မကွက် ရိုက်ခဲ့တယ်ဆိုပေမယ့် ဓာတ်ပုံတွေကိုကြည့်ရင် ၁နှစ်မပါ တာကိုတွေ့ရမှာပါ။ ဟုတ်ပါတယ်။ ၁၉၉၈ ခုနှစ်မှာ အားလပ်ရက်အနေနဲ့ ကျွန်တော့်သမီးက နိုင်ငံခြားကို ရောက်နေခဲ့လို့ ဓာတ်ပုံရိုက်ခွင့်မရခဲ့ပါဘူး။”

” အခုတော့ ကျွန်တော်က အဖိုးကြီးဖြစ်နေပြီ။ ဓာတ်ပုံရိုက်စက ၁နှစ်အရွယ် သမီးက အခုတော့ ကလေး နှစ်ယောက်ရဲ့ မိခင်ဖြစ်နေပြီလေ။ ကျွန်တော်က ၆၇နှစ် ၊ သမီးကတော့ ၄၁နှစ်ပေါ့” လို့ Yunqing က ပြောခဲ့ပါတယ်။ ကဲ…နှစ်ပေါင်း ၄၀ အတွင်း သူတို့သားအဖ ဘယ်လိုတွေပြောင်းလဲသွားကြသလဲဆိုတာ ဓာတ်ပုံတွေကြည့်ရင်း သိနိုင်မှာပါ။