တရုတ်မှာ ဖြစ်နေတဲ့ ဝူဟန်ဗိုင်းရပ်စ် ရဲ့ လက်ရှိအခြေအနေ

ဝူဟန်ဗိုင်းရပ်စ်ကို တရုတ်နိုင်ငံအလယ်ပိုင်း ဝူဟန်မြို့မှာ ၂၀၁၉ ခုနှစ် ဒီဇင်ဘာ ၃၁ ရက်နေ့က စတင်တွေ့ရှိခဲ့ရတာဖြစ်ပြီး အရင်မဖြစ်ဖူးသေးတဲ့ အသက်ရှူလမ်းကြောင်းနဲ့ဆိုင်တဲ့ ဗိုင်းရပ်စ်အသစ်တစ်မျိုးဖြစ်တယ်လို့ ကမ္ဘာ့ကျန်းမာရေးအဖွဲ့ WHO က ဆိုပါတယ်။ ဗိုင်းရပ်စ်ရဲ့အမည်ကိုတော့ Novel CoronaVirus (2019-nCoV) လို့ပေးထားပြီး တိရစ္ဆာန်တွေကနေ အဓိကကူးစက်ပျံ့နှံ့လာခဲ့တာလို့ သိရပါတယ်။

ဇန်နဝါရီလ ၂၀ ရက်နေ့မှာတော့ ဒီဗိုင်းရပ်စ်ဟာ လူတစ်ဦးကနေ အခြားတစ်ဦးကို ကူးစက်နိုင်ကြောင်း အစိုးရက တရားဝင်ကြေငြာခဲ့ပါတယ်။ အဲဒီနေ့အထိ 2019-nCoV ဗိုင်းရပ်စ်အသစ် ကူးစက်ခံရသူ ၂၁၈ ဦး စစ်ဆေးတွေ့ရှိခဲ့ပြီး ကူးစက်ခံရသူအများစုဟာ ဘေဂျင်း၊ ရှန်ဟိုင်းမြို့၊ ဝူဟန်မြို့နဲ့ ဂွမ်ဒေါင်းပြည်နယ်မှာ နေထိုင်သူတွေ ဖြစ်တယ်လို့ သိရပါတယ်။ အသက်ရှုလမ်းကြောင်းဆိုင်ရာ ကူးစက်ဗိုင်းရပ်စ်ဟာ ယခင်က ၆ မျိုးရှိခဲ့ပြီး ယခုဗိုင်းရပ်စ်အသစ် 2019-nCoV  နဲ့ ဆိုရင် ၇မျိုး ရှိသွားပြီလို့ သိရပါတယ်။

ဒီဗိုင်းရပ်စ် စတင်ဖြစ်ပေါ်တဲ့နေရာကတော့ ဝူဟန်မြို့မှာရှိတဲ့ သားငါးနှင့် ပင်လယ်စာ လက်ကားဈေးကြီးဖြစ်နိုင်တယ်လို့ခန့်မှန်းထားပြီး ကူးစက်ခံရသူအများစုဟာ အဲဒီဈေးနဲ့ ထိတွေ့ခဲ့သူတွေဖြစ်ပါတယ်။ ဒီဈေးမှာ တိရစ္ဆာန်အရှင်တွေကိုလည်း ရောင်းချကြောင်း သိရပါတယ်။ ဒါကြောင့် ဇန်နဝါရီလ ၁ရက်နေ့ကစလို့ ဈေးကိုပိတ်ကာ သန့်ရှင်းရေးတွေပြုလုပ်ခဲ့ပါတယ်။

ဒီရောဂါပိုး ကူးစက်ခံရသူတွေဟာ အအေးမိ ၊ ကိုယ်ပူခြင်း၊ ချောင်းဆိုးခြင်း ၊ ရင်ကြပ်ခြင်း ၊ အသက်ရှုကြပ်ခြင်း စတဲ့ လက္ခဏာတွေကို ခံစားရပါတယ်။ Corona virus အမျိုးအစား ပြင်းထန်စွာကူးစက်ခံရသူတွေဟာ အဆုတ်ရောင်ရောဂါ၊ ဆားစ်ရောဂါ၊ မားစ်ရောဂါ၊ ကျောက်ကပ်ပျက်စီးတာတွေဖြစ်တတ်ပြီး အသက်ဆုံးရှုံးနိုင်တဲ့ အထိ အန္တရာယ်ရှိပါတယ်။

ဝူဟန်မြို့တဆင့် အခြားနိုင်ငံတွေကို ခရီးသွားခဲ့တဲ့သူတွေကို အဲဒီနိုင်ငံတွေက စစ်ဆေးကြည့်ရမှာလည်း ဒီဗိုင်းရပ်စ်ကူးစက်ခံထားရတာကို တွေ့ရှိရပါတယ်။ ထိုင်း ၊ ဂျပန် ၊ ထိုင်ဝမ် ၊ ကိုရီးယား ၊ အင်္ဂလန် ၊ စကော့တလန် နဲ့ အမေရိကန် တို့မှာ ဒီလူနာတွေကို တွေ့ရှိခဲ့ကြောင်း အသီးသီးကြေငြာခဲ့ကြပါတယ်။ လက်ရှိအချိန်မှာတော့ တရုတ်နိုင်ငံ နဲ့ အီးယူနိုင်ငံတွေ ၊ ဝူဟန်မြို့နဲ့လေကြောင်းတိုက်ရိုက်ပျံသန်းတဲ့နိုင်ငံတွေမှာ အဝင်အထွက်ကို ကျန်းမာရေးတင်းကျပ်စွာ စစ်ဆေးလျှက်ရှိပါတယ်။

ရောဂါပိုးမပျံ့ပွားစေဖို့ ဝူဟန်မြို့အပါအဝင် အနီးပတ်ဝန်းကျင်မှ မြို့ကြီး ၁၀ မြို့ကို အစိုးရက ပိတ်ထားလိုက်ပြီဖြစ်တာကြောင့် ဒီနေရာတွေမှာ လူအသွားအလာမရှိလောက်အောင် ရှင်းလင်းနေပြီဖြစ်ပါတယ်။။ ဒီလိုအပိတ်ခံထားရတဲ့ ဝူဟန်မြို့မှာ မြန်မာကျောင်းသား တစ်ရာကျော် ရှိနေတယ်လို့လည်း သိရပါတယ်။ ကျန်းမာရေးစစ်ဆေးတာတွေ ၊ မြို့ပေါ်က နေရာအနှံ့ကို လေယာဉ်နဲ့ ဆေးဖြန်းတာတွေလုပ်ပြီး စိတ်ချရမယ့် အခြေအနေရောက်မှ ပြန်ဖွင့်ပေးမယ့် သဘောပါ။

Novel CoronaVirus ကို လက်ရှိအချိန်မှာတော့ ကာကွယ်နိုင်တဲ့ဆေးမရှိသေးတဲ့အပြင် တိကျတဲ့ကုထုံးတွေလည်း မရှိသေးပါဘူး။ ဒီပြဿနာကိုဖြေရှင်းနိုင်ဖို့ တရုတ်နဲ့ အမေရိကန်အပါအဝင် ကမ္ဘာ့ဆေးပညာရှင်တွေက အမြန်ဆုံးကြိုးပမ်းလျှက်ရှိပါတယ်။ ဒီရောဂါပိုး မကူးစက်စေဖို့အတွက် အောက်ပါအချက်တွေကို လိုက်နာရမယ်လို့ အကြံပြုထားပါတယ်။
– တိရစ္ဆာန်တွေကို အကာအကွယ်မလုပ်ထားပဲ ထိတွေ့ခြင်းမပြုရန်
– အသား ငါး နဲ့ ဥတွေကို ကျက်သည်အထိ သေချာစွာ ချက်ပြုတ်ကြရန်
– မကြာခဏလက်ဆေးရန်

– ဖျားနာတာ ၊ အအေးမိတာ ၊ နှာခြေ အသက်ရှုလမ်းကြောင်းဆိုင်ရာ ရောဂါလက္ခဏာရှိသူတွေနဲ့ အနီးကပ် ထိတွေ့နေထိုင်ခြင်း မပြုရန်
-တတ်နိုင်သမျှ လူထူတဲ့နေရာတွေကို မသွားရန်
– နှာခေါင်းစည်း (သို့) အဝတ်ကိုသုံးကာ နှာချေချောင်းဆိုးတဲ့အခါ လုံအောင်ပြုလုပ်ရန်

လက်ရှိအချိန်မှာတော့ တရုတ်နိုင်ငံမှာ ဒီရောဂါကူးစက်ခံထားရသူပေါင်း ၈၃၀ ဦးရှိနေပြီး သေဆုံးသူကတော့ ၂၆ဦး ရှိသွားပါပြီ။ ဝူဟန် နဲ့ မြို့ကြီး ၁၀မြို့ကို ပိတ်ပစ်လိုက်တာကြောင့် အဲဒီမှာနေထိုင်တဲ့ လူပေါင်း သန်း ၂၀ ခန့်ဟာ စိုးရိမ်စိတ်တွေနဲ့ နေထိုင်နေကြရပါတယ်။

(မနေ့(ဇန် ၂၃) က နံနက် ၁နာရီ ၅၈ မိနစ် က ဝူဟန်မြို့က တိုက်ရိုက်ပျံသန်းလာတဲ့ China Eastern လေကြောင်းလိုင်း ခရီးစဉ်အမှတ် MU2659 ဟာ ရန်ကုန်အပြည်ပြည်ဆိုင်ရာ လေဆိပ်ကို ဆိုက်ကပ်လာခဲ့ပါတယ်။ ဒီလေယာဉ်ပေါ်မှာ လေယာဉ်အမှုထမ်း ၉ ဦး နဲ့ ခရီးသည် ၈၅ ဦးပါတယ်လို့ သိရပါတယ်။ လိုက်ပါလာသူများကို စစ်ဆေးကြည့်တဲ့အခါမှာတော့ ဗိုင်းရပ်စ် ကူးစက်ခံရမှု သံသယရှိလူနာ မတွေ့ရကြောင်း လေဆိပ် ကူးစက် ရောဂါ ထိန်းချုပ် ကာကွယ်ရေးဌာနမှ ဒေါက်တာဉာဏ်ထက်လွင်က ၎င်းရဲ့လူမှုကွန်ယက်စာမျက်နှာကနေ အသိပေးပြောကြားခဲ့ပါတယ်။ ရောဂါပျံ့နှံ့မှုကို ထိန်းချုပ်နိုင်ရန် Wuhan မြို့မှ Public transport ကို ယနေ့ယာယီပိတ်လိုက်ပြီးဖြစ်ကြောင်း သိရပါတယ်။)