စင်ကာပူ ရဲ့ ကမ္ဘာကျော် Marina Bay Sands ဆိုတာ

စင်ကာပူ ရဲ့ ဓာတ်ပုံတွေမှာ မကြာခဏပါလေ့ရှိတဲ့အရာကတော့ မြင့်မားတဲ့အမိုးထိပ်ဖျားမှာ သင်္ဘောပုံဏ္ဍာန်တည်ဆောက်ထားတဲ့ အဆောက်အဦးဖြစ်ပါတယ်။ စင်ကာပူ နဲ့ ရင်းနှီးတဲ့ မိတ်ဆွေတွေကတော့ Marina Bay Sands က ဒီအဆောက်အဦးကြီးကို ရင်းနှီးပြီးဖြစ်မှာပါ။ မသိသေးတဲ့ မိတ်ဆွေများအတွက် ဗဟုသုတအဖြစ် ဒီအဆောက်အဦးကြီးရဲ့ အကြောင်းကို ဝေမျှလိုက်ပါတယ်။

ကမ္ဘာ့ထိပ်တန်း အပန်းဖြေ Resort ဖြစ်တဲ့ ဒီအဆောက်အဦးကြီးကို စင်ကာပူ မရီနာပင်လယ်အော် ဘေးမှာတည်ဆောက်ထားလို့ မရီနာပင်လယ်အော်သဲသောင်ပြင် Marina Bay Sand လို့နာမည်ပေးထားခြင်း ဖြစ်ပါတယ်။ တာဝါအဆောက်အဦးအပြင် အနီးတဝိုက်က အခြားအဆောက်အဦးတွေကို စုပေါင်းပြီး Marina Bay Sand လို့ ခေါ်ခြင်းဖြစ်ပါတယ်။

၂၀၁၀ မှာ စတင်ဖွင့်လှစ်ခဲ့တဲ့ ဒီအဆောက်အဦးကြီးဟာ အဆောက်အဦးတစ်ခုချင်း ကုန်ကျစရိတ်မှာ ကမ္ဘာ့ဈေးအကြီးဆုံးဖြစ်ပြီး စုစုပေါင်းကုန်ကျစရိတ်အနေနဲ့ စင်ကာပူဒေါ်လာ ၈ဘီလျံ ကုန်ကျခဲ့ပါတယ်။

Marina Bay Sands အဆောက်အအုံကို ပိုင်ဆိုင်တဲ့ မိခင်ကုမ္ပဏီကတော့ The Venetian Las Vegas , The Venetian Macao စတဲ့ Resort တွေကိုပိုင်ဆိုင်ထားတဲ့ အမေရိကန်က Las Vegas Sands အဖွဲ့အစည်း ဖြစ်ပါတယ်။

အဆောက်အဦးကြီးရဲ့ ဒီဇိုင်းကို ရေးဆွဲသူကတော့ အစ္စရေး-ကနေဒါ နွယ်ဖွား ဗိသုကာပညာရှင် Moshe Safdie ဖြစ်ပြီး အဓိကတည်ဆောက်သူကတော့ တောင်ကိုရီးယားက Ssangyong Engineering and Construction ကုမ္ပဏီဖြစ်ပါတယ်။

တာဝါသုံးခုကို ထိပ်ဖျားမှာ သင်္ဘောပုံစံနဲ့ ဆက်ပြီးဒီဇိုင်းထုတ် တည်ဆောက်ထားတဲ့ အထပ် ၅၅ထပ်မြင့် ဒီအဆောက်အဦးကြီးမှာ ဟိုတယ်ခန်းပေါင်း ၂၅၆၁ခန်း ၊ စတုရန်းပေ ၁.၃သန်းခန့်ကျယ်တဲ့ convention-exhibition centre (လူပေါင်း ၄၅၀၀၀ ဆန့်) ၊ စတုရန်းပေ ၈သိန်းခန့်ကျယ်တဲ့နေရာမှာရှိတဲ့ ဈေးဆိုင်ခန်းများ ၊ ပြတိုက်တစ်ခု ၊ ကဇာတ်ရုံကြီးနှစ်ခု ၊ ကမ္ဘာကျော်စားဖိုမှူးများရှိရာ စားသောက်ဆိုင်များ ၊ အနုပညာ နဲ့ သိပ္ပံပြခန်း ၊ ရေပေါ် Crystal Pavilions နှစ်ခု အပြင် စားပွဲခုံပေါင်း ၅၀၀ နဲ့  Slot စက်ပေါင်း ၁၆၀၀ ရှိရာ ကမ္ဘာ့အကြီးဆုံး atrium ကာစီနို တွေပါဝင်ပါတယ်။

ဒါ့အပြင် အမိုးထိပ်ဆုံးမှာတော့ လူပေါင်း ၄၀၀၀ နီးပါး အနားယူနိုင်တဲ့ အရှည် ၁၁၂၀ပေ ရှိ ပန်းခြံကြီးအပြင် အရှည် ၄၉၀ပေ ရှိတဲ့ ဧရာမ ရေကူးကန်ကြီးတစ်ခုလည်း ပါဝင်ပါတယ်။ အမိုးပေါ်မှာရှိတဲ့ ကမ္ဘာ့အရှည်ဆုံးဒီရေကူးကန်ဟာ မြေပြင်ကနေ မီတာ ၂၀၀ အမြင့်မှာ ရှိနေတာ ဖြစ်ပါတယ်။

ဒီအဆောက်အဦးကြီးဟာ စင်ကာပူရဲ့ ပထမဆုံး ကမ္ဘာ့အဆင့်မီ Resort ကြီးနှစ်ခု ထဲက တစ်ခုဖြစ်ပါတယ်။ နောက်တစ်ခုကတော့ Resorts World Sentosa ဖြစ်ပါတယ်။ ဒီ Resort ကြီးနှစ်ခုဟာ စင်ကာပူရဲ့ စီးပွားရေး နဲ့ ခရီးသွားလာရေးကဏ္ဍတွေကို အထူးမြှင့်တင်ပေးခဲ့ပါတယ်။

တည်ဆောက်စဉ်က အဆောက်အဦးကုန်ကျစရိတ်ကို စင်ကာပူဒေါ်လာ ၅ ဘီလျံလောက်သာ ကုန်မယ်လို့ ခန့်မှန်းထားပေမယ့် တည်ဆောက်ရေးလိုအပ်တဲ့ပစ္စည်းများ ဈေးကြီးမြင့်မှု နဲ့ လုပ်သားပြတ်လပ်မှုတို့ကြောင့် တည်ဆောက်ပြီးတဲ့အခါမှာတော့ ၈ဘီလျံ အထိ ကုန်ကျခဲ့ရတာဖြစ်ပါတယ်။

ဒါပေမယ့် အဆောက်အဦးကို ဖွင့်ပြီး နှစ်လအတွင်းမှာပဲ ကာစီနိုမှာ လူပေါင်း ၂၅၀၀၀ ခန့် နေ့စဉ်ကစားလာတဲ့အပြင် စင်ကာပူနိုင်ငံသားအားလုံးရဲ့ ၃ပုံ ၁ပုံဟာ ဒီ Resort ကို လာရောက်ပြီဖြစ်ပါတယ်။ အလကားတော့ မဟုတ်ပဲ တစ်နေ့ကို ဒေါ်လာ ၁၀၀ နဲ့ တစ်နှစ်စာ ဒေါ်လာ ၂၀၀၀ နဲ့ ဖြစ်ပါတယ်။ တစ်နှစ်အကုန်မှာတော့ အမြတ်ငွေ ဒေါ်လာ ၁ဘီလျံ ဝန်းကျင် ပြန်ရခဲ့ပါတယ်။

စီးပွားရေး အနေနဲ့ကြည့်ရင်တော့ ဒီအဆောက်အဦးကြီးဟာ စင်ကာပူနိုင်ငံရဲ့ GDP ဝ.၈% အထိ တိုးလာခဲ့စေပါတယ်။ ဒါ့အပြင် လူပေါင်း ၁၀၀၀၀ ခန့်ကို လစာကောင်းကောင်း နဲ့ အလုပ်ရလာစေခဲ့သလို စင်ကာပူရဲ့အခြားစက်မှုလုပ်ငန်းငယ်ပေါင်း ၂၀၀၀၀ ခန့်အတွက် အလုပ်များ ဖြစ်ပေါ်လာစေခဲ့ပါတယ်။

အဆောက်အဦးကို အစပထမတုန်းက ၂၀၀၉ခုနှစ်မှာ ဖွင့်မယ်လို့ ရည်ရွယ်ထားပေမယ့် ကမ္ဘာလုံးဆိုင်ရာ စီးပွားပျက်ကပ်နဲ့ ကြုံပြီးတဲ့နောက် အစီအစဉ်များကြန့်ကြာခဲ့ပြီး ၂၀၁၀ ခုနှစ် ဇွန်လမှ တရားဝင်ဖွင့်လှစ်နိုင်ခဲ့ပါတယ်။

Mall မှာတော့ ဆိုင်ခန်းပေါင်း ၃၀၀ ရှိပြီး အလယ်မှာတော့ Las Vegas ရဲ့ အခြားနာမည်ကျော် အဆောက်အဦးတွေလိုပဲ တူးမြောင်းငယ်လေးတစ်ခုကို ထည့်သွင်းထားပါတယ်။ ကဇာတ်ရုံနှစ်ရုံကတော့ စုစုပေါင်း ထိုင်ခုံ ၄၀၀၀ ခန့်ရှိပါတယ်။ အနုပညာပြတိုက် Art Science Museum ကိုတော့ ကြာပန်းပုံသဏ္ဍာန် ဒီဇိုင်းနဲ့ တည်ဆောက်ထားပါတယ်။

လူသိနည်းတဲ့အချက်ကတော့ ဒီအဆောက်အဦးကြီးရဲ့အောက်ဘက်မှာ နေရာတစ်ခုဟာ မြို့ငယ်လေးတစ်ခု ပမာတည်ရှိနေတာပါ။ အဲဒီနေရာကိုတော့ Marina bay sands ဝန်ထမ်းတွေပဲ ဝင်ရောက်ခွင့်ရှိပါတယ်။ ဒီနေရာမှာ ဝန်ထမ်းတွေ ယူနီဖောင်း ၁သိန်းကျော်ကို အလိုလျှောက်လှည့်စက်ပေါင်း ၁၈ခုမှာ ထားရှိပါတယ်။ အမြဲစားဖို့ အဆင်သင့်ဖြစ်နေတဲ့ ဟင်းလျာတွေရှိရာ စားသောက်ခန်းတွေကိုလည်း ၂၄နာရီ ဖွင့်ပေးထားပါတယ်။

ဒါ့အပြင်ဆေးခန်းတစ်ခု ၊ စတိုးဆိုင်တစ်ခု ၊ ATM စက်များ ၊ အလှည့်လဲတဲ့ ဝန်ထမ်းများအနားယူဖို့အတွက် အိပ်ယာများ ၊ ရေချိုးခန်းများ အပြင် အပင်ငယ် အမျိုးပေါင်း ၅၀ခန့်ကို စိုက်ပျိုးထာ ပန်းခြံတွေကိုလည်း ဝန်ထမ်းတွေအတွက် ဖန်တီးပေးထားပါသေးတယ်။

အဲဒီနေရာလေးရဲ့ ဗီဒီယိုကြည့်ရန်

MBS မှာ ရှိတဲ့စားသောက်ဆိုင်တွေဟာ ကမ္ဘာ့ဈေးအကြီးဆုံး စားသောက်ဆိုင်စာရင်းမှာလည်း ပါဝင်ပါတယ်။ ဝိုင် တစ်ခွက်ကို အနိမ့်ဆုံး ဒေါ်လာ ၅၀ ၊ တစ်ယောက်စာ ဟင်းလျာ အတွက် ဒေါ်လာ ၄၀၀ ၊ နှစ်ယောက်စာ အထူးဟင်းလျာအတွက် ဒေါ်လာ ၂၀၀၀ တန်တွေအပြင် အခြားဈေးနှုန်းမြင့်မားလွန်းတဲ့ အစားအစာတွေလည်း ရှိနေပါတယ်။ DANIEL BOULUD , DAVID MYERS, DAVID THOMPSON ,GORDON RAMSAY ,JUSTIN QUEK TETSUYA WAKUDA နဲ့ WOLFGANG PUCK တို့လို ကမ္ဘာကျော် စာဖိုမှူးတွေရဲ့လက်ရာကို ရရှိနိုင်ပါတယ်။

The Wonder Full Show ဟာ အရှေ့တောင်အာရှရဲ့ အကြီးဆုံး ရေပန်းရုပ်ရှင်ဖြစ်ပါတယ်။

ဒီလောက်ဆိုရင် Marina Bay Sands ရဲ့ အကြောင်းကို နည်နည်းတော့သိသွားလောက်ပြီလို့ မျှော်လင့်ပါတယ် 🙂

VIDEO

သုတဇုန်