စင်ကာပူမှာ တားမြစ်ပိတ်ပင်ထားတဲ့ အရာ ၁၁ ခု

အရှေ့တောင်အာရှနိုင်ငံငယ်လေး ဖြစ်တဲ့ စင်ကာပူ ဟာ အာရှမှာတော့ ဒုတိယ ဧရိယာအသေးဆုံးနိုင်ငံဖြစ်ပါတယ်။ နယ်မြေကျဉ်းကျဉ်းလေးဖြစ်ပေမယ့် ဒီနေရာမှာ လူမျိုးပေါင်းစုံတဲ့ လူဦးရေ ၆သန်းနီးပါးနေထိုင်တာကြောင့် ကမ္ဘာပေါ်မှာ ဒုတိယလူဦးရေအထူထပ်ဆုံး နိုင်ငံအဖြစ် သတ်မှတ်ခံထားရပါတယ်။ လူမျိုးပေါင်းစုံပေမယ့် ငြိမ်းချမ်းစွာရှိနေရခြင်းအကြောင်းကတော့ ဥပဒေ စည်းကမ်းပေါင်းစုံနဲ့ တင်းကြပ်စွာ ပြဌာန်းထားလို့ဖြစ်ပါတယ်။ မည်သူမဆို စည်းကမ်းကို ချိုးဖောက်ရင် ထိုင်တန်တဲ့ ပြစ်ဒါဏ်ကို ခံစားရမှာ ဖြစ်ပါတယ်။ စင်ကာပူမှာ အခြားနိုင်ငံတွေနဲ့ မတူညီတဲ့ ဥပဒေအချို့ကိုလည်း ပြဌာန်းထားပါတယ်။ ဒီတခါတော့ ဒါတွေကို မသိသေးတဲ့ သုတဇုန် မိတ်ဆွေများအတွက် ဝေမျှသွားပါမယ်။

၁။ စင်ကာပူမှာ ပီကေစားတာ ၊ သယ်ဆောင်တာ ၊ လက်ဝယ်ထားရှိတာတွေပြုလုပ်လျှင် ငွေဒဏ် ၊ ကြိမ်ဒဏ် ၊ ထောင်ဒဏ်တွေကို ခံရနိုင်ပါတယ်။ ရောင်းချတဲ့သူဆိုရင်တော့ ဒေါ်လာ ၁သိန်း ဒါမှမဟုတ် ၂နှစ်အထိ ပြစ်ဒဏ်ခံရမှာပါ။ စင်ကာပူမှာ ပီကေကို ပိတ်ပင်လာခဲ့တာ ၁၉၉၂ ခုနှစ်ကတည်းက ဖြစ်ပါတယ်။ ချွင်းချက်အနေနဲ့ ဆေးအဖြစ်သုံးစွဲမယ်ဆိုရင်တော့ ဆရာဝန်ထောက်ခံချက်နဲ့အတူ တရားဝင်ခွင့်ပြုထားတဲ့ ဆေးဆိုင်တချို့ကနေ ဝယ်ယူနိုင်ပါတယ်။

၂။ တခြားသူကို နားမခံသာဖြစ်စေတဲ့ ဂီတာ စတဲ့ တူရိယာပစ္စည်းတွေ တီးတာ မှုတ်တာ သီဆိုတာတွေကိုလည်း ပိတ်ပင်ထားပါတယ်။ အများပြည်သူ နေရာတွေမှာ တီးနိုင် မှုတ်နိုင် ဆိုနိုင်ပေမယ့် အခြားသူတွေကို အနှောက်အယှက်ပေးတယ်လို့ သတ်မှတ်ရင် ဒေါ်လာ ၁၀၀၀ အထိ ဒဏ်ရိုက်ခံရမှာဖြစ်သလို ထောင် ၃လလည်း ကျချင်ကျသွားနိုင်ပါတယ်။

၃။ အများပြည်သူ သွားလမ်း ၊ ယာဉ်သွားလမ်းတွေဟာ စွန်လွှတ်တာ ဒါမှမဟုတ် ကစားနည်းတခုခု ကစားနေတာဆိုရင်လည်း ဥပဒေကို ချိုးဖောက်ရာ ရောက်ပါတယ်။ သတ်မှတ် ခွင့်ပြု ထားတဲ့နေရာတွေမဟုတ်ပဲ ဒီလိုလုပ်ခဲ့မယ်ဆိုရင်တော့ ဒဏ်ငွေ ဒေါ်လာ ၅၀၀၀ အထိပေး ဆောင်ရမှာ ဖြစ်ပါတယ်။

၄။ လမ်းပေါ်မှာ ကိုယ့်ပါးစပ်နဲ့ ကိုယ်တံတွေးထွေးတာ ဘာဖြစ်လဲ မထင်ပါနဲ့။ စင်ကာပူမှာ ဆိုရင်တော့ ဒါဟာ ဥပဒေကို ချိုးဖောက်တာပါပဲ။ ကော်ဖီဆိုင် ၊ ဈေး ၊ မုန့်ဆိုင် ၊ ကျောင်း ၊ ဇာတ်ရုံ ၊ ဘတ်စ်ကား ၊ အများပြည်သူသွားလမ်းတွေပေါ်မှာ တံတွေးထွေးတာကို မိခဲ့မယ်ဆိုရင်တော့ သင့်အိတ်ထဲက ဒေါ်လာ ၁၀၀၀ ခုန်ထွက်သွားပါလိမ့်မယ်။

၅။ ညစ်ညမ်းဓာတ်ပုံတွေ ၊ ဗီဒီယိုတွေ ၊ စာအုပ်တွေ ဖြန့်ဝေခြင်းကိုလည်း စင်ကာပူမှာ တားမြစ်ထားပါတယ်။ အွန်လိုင်းစကားပြောဂရုတွေမှာ ဒီလိုပုံတွေ ဗီဒီယိုတွေ ပို့မိတဲ့ စင်ကာပူနိုင်ငံသား အချို့ဟာ ဒဏ်ငွေ ဒေါ်လာ ၂၀၀၀၀ ၊ ထောင် ၃လ ၊ ၆လ ကျခံရတဲ့ ဖြစ်စဉ်တွေ ရှိခဲ့ဖူးပါတယ်။

၆။ အခြားသူရဲ့ ဝိုင်ဖိုင်ကို ခိုးယူသုံးစွဲခြင်းဟာလည်း ကြီးလေးတဲ့ အပြစ်ဒဏ်ပါပဲ။ စင်ကာပူ ဆိုက်ဘာဥပဒေအရ အခြားသူရဲ့ဝိုင်ဖိုင်ကို တရားမဝင် ဟက်တာ ခိုးယူသုံးစွဲတာကို မိခဲ့လျှင် ဒဏ်ငွေ ဒေါ်လာ ၁၀၀၀၀ ကနေ ထောင်ဒဏ် ၃နှစ်အထိ ကျခံသွားရနိုင်ပါတယ်။

၇။ စင်ကာပူက အများပြည်သူသုံးအိမ်သာတွေဟာ အမြဲသန့်ရှင်းနေလေ့ရှိပါတယ်။ ဒီနေရာမှာလည်း စည်းကမ်းတချက်ရှိနေပါတယ်။ ဒါကတော့ အိမ်သာတက်ပြီး ရေဆွဲမချပဲ ထွက်သွားခဲ့ရင် စည်းကမ်းချိုးဖောက်တာပါပဲ။ အမြန်လိုနေလို့ မေ့သွားလို့ ဆိုပြီး မရပါဘူး။ ဒဏ်ငွေ ဒေါ်လာ ၁၅၀ ပါတဲ့။

၈။ အများပြည်သူ သွားလာတဲ့နေရာတွေမှာ အဝတ်အဝတ်ပဲသွားလာနေတာဟာလည်း ဥပဒေချိုးဖောက်တာပါပဲ။ ကိုယ့်အိမ်မှာဆိုရင်တော့ အဝတ်မဝတ်ပဲ နေလို့ရပါတယ်။ ဒါပေမယ့် လိုက်ကာတွေ ချမထားလို့ အခြားသူတွေမြင်သွားခဲ့ရင်တော့ လူမြင်ကွင်းမှာ အဝတ်မဝတ်ခြင်း ဥပဒေနဲ့ ငြိသွားပါပြီ။ ဒါဆိုရင်တော့ ဒဏ်ငွေ ဒေါ်လာ ၂၀၀၀ ကနေ ထောင်ဒဏ် ၃လအထိ ကျခံရနိုင်ပါတယ်။

၉။ စင်ကာပူမှာ လမ်းပေါ်သွားနေလာနေရင်း ကိုယ့်ဆီက ပေါင်မုန့်အပိုင်းအစလေးဖြစ်ဖြစ် လမ်းပေါ်က ခိုတွေ ကို အစာကျွေးမယ်ဆိုရင်လည်း ဥပဒေချိုးဖောက်တာပါပဲ။ စင်ကာပူမှာ ခိုတွေကို အစာကျွေးတာကို တားမြစ်ထားပြီး ချိုးဖောက်ရင်တော့ ဒဏ်ငွေ ဒေါ်လာ ၅၀၀ ဆောင်ရမှာဖြစ်ပါတယ်။

၁၀။ သတ်မှတ်တဲ့နေရာမှာ စည်းကမ်းတကျမဟုတ်ပဲ စည်းမဲ့ကမ်းမဲ့ အမှိုက်စွန့်ပစ်ခြင်း ဟာလည်း စင်ကာပူ ဥပဒေကို ချိုးဖောက်နေပါတယ်။ ဒါကို ချိုးဖောက်ခဲ့ရင်တော့ ဒဏ်ငွေအဖြစ် ဒေါ်လာ ၁၀၀၀ ဆောင်ရမှာဖြစ်ပါတယ်။ ကျွန်တော်တို့ ဆီမှာတော့ အမှိုက်မပစ်ရ ဆိုတဲ့ ဆိုင်းဘုတ်ဟာ အမှိုက်တွေအောက် ရောက်နေလေ့ရှိပါတယ်။

၁၁။ သတ်မှတ်ထားတဲ့ လူကူးကုန်းကျော်တံတား ၊ လူကူးမျဉ်းကြားတွေကနေ စည်းကမ်းတကျမဟုတ်ပဲ စည်းမဲ့ကမ်းမဲ့ လမ်းကူးတာဟာလည်း စင်ကာပူ ဥပဒေကို ချိုးဖောက်တာပါပဲ။ ဒါကို မိခဲ့ရင်တော့ ဒေါ်လာ ၅၀ ဆောင်ရမှာပါ။ ဒါပေမယ့် ပထမဆုံး အကြိမ်ပဲ ဒေါ်လာ ၅၀ ဖြစ်ပြီး ထပ်ကာ ထပ်ကာ ချိုးဖောက်မိမယ်ဆိုရင်တော့ ဒဏ်ငွေ ဒေါ်လာ ၁၀၀၀ ကနေ ထောင် ၃လအထိ အချုပ်ကျသွားနိုင်ပါတယ်။ စင်ကာပူမှာ နှစ်စဉ် လူပေါင်းထောင်နဲ့ချီပြီး ဒဏ်ရိုက်ခံရလေ့ရှိပါတယ်။

အပေါ်မှာ ဖော်ပြခဲ့တဲ့ အချက် ၁၁ ချက်အပြင် တခြားနိုင်ငံတွေနဲ့ မတူတဲ့ စင်ကာပူတားမြစ်ထားတဲ့ ဥပဒေတွေ အများကြီး ရှိနေပါသေးတယ်။

Ref: Things that are illegal in Singapore – BusinessInsider