စက်ဘီးပဲစီးတဲ့ အချမ်းသာဆုံးနိုင်ငံ တစ်နိုင်ငံက ဝန်ကြီးချုပ်

၀န်ကြီးချုပ်ဆိုတာ အစိုးရအဖွဲ့မှာ အရေးကြီးတဲ့ပုဂ္ဂိုလ်ဖြစ်တာနဲ့အညီ ဘော်ဒီဂတ်တွေ နဲ့ ကျည်ဆန်ကာ ကားတွေကို စီးလေ့ရှိကြပါတယ်။ ဒါပေမယ့် ဒီအထဲမှာ နယ်သာလန်ဝန်ကြီးချုပ် မပါပါဘူး။ ဟုတ်ပါတယ်။ နယ်သာလန်ဝန်ကြီးချုပ် Mark Rutte ဟာ သူရဲ့လမ်းကြောင်းအများစုကို စက်ဘီးပဲစီးသွားလေ့ရှိပါတယ်။ ပြီးခဲ့တဲ့နှစ်က သူဟာ နယ်သာလန် ဘုရင်နဲ့ သွားတွေ့စဉ်မှာ စက်ဘီးကို အိမ်တော်ရဲ့အပြင်ဘက်မှာရပ်နေတဲ့ပုံဟာ အင်တာနက်က တစ်ဆင့် ပြန်နှံ့ခဲ့တာကြောင့် နိုင်ငံတကာက ပြည်သူတွေအလွန်သဘောကျခဲ့ကြပါတယ်။

တကယ်တော့ Mark Rutte စက်ဘီးစီးခဲ့တာ သူဝန်ကြီးချုပ်စဖြစ်တဲ့ ၂၀၁၀ခုနှစ်လောက်ကတည်းကပါ။ အားလုံးသိကြတဲ့အတိုင်း နယ်သာလန်နိုင်ငံဆိုတာ ကမ္ဘာမှာ စီးပွားရေး ၊ ပညာရေး ၊ ရာဇဝတ်မှုကင်းစင်ရေးတွေမှာ ထိပ်တန်းကရပ်တဲ့ နိုင်ငံတစ်နိုင်ငံဖြစ်ပါတယ်။ အချမ်းသာဆုံးနိုင်ငံတွေထဲမှာ ပါဝင်နေပေမယ့် ဒီနိုင်ငံရဲ့ အရေးပါဆုံးလို့ဆိုရမယ့် ဝန်ကြီးချုပ်က အကောင်းဆုံးကားတွေ အမြဲစီးလို့ရနေပါလျက်နဲ့ ဘာကြောင့် စက်ဘီးစီးရပါသလဲ…။

၀န်ကြီးချုပ်ကတော့ စက်ဘီးစီးခြင်းဟာ ကျန်းမာရေးကိုကောင်းစေတယ် ၊ ပတ်ဝန်းကျင်ကိုထိမ်းသိမ်းပြီးသားဖြစ်တယ် ၊ နိုင်ငံ့ဝင်ငွေကို ချွေတာပြီးသားဖြစ်တယ် လို့ ဆိုပါတယ်။ ဒါကြောင့်လည်း သူဟာ ရုံးတက်တဲ့အခါမှာ ဘာအစောင့်အရှောက်မှမပါပဲ သာမန်လူတစ်ယောက်လို စက်ဘီးစီးကာ တက်လေ့ရှိပါတယ်။

အမှတ်တမဲ့ဆိုရင် ဝန်ကြီးချုပ်မှန်းတောင် ဘယ်သူမှ မသိကြပါဘူး။ အိန္ဒိယဝန်ကြီးချုပ် မိုဒီနဲ့ တွေ့တုန်းကတောင် Rutte ဟာ မိုဒီကို စက်ဘီးတစ်စီး လက်ဆောင်ပေးပြီး စက်ဘီးစီးခြင်းရဲ့ကောင်းကျိုးတွေကို ပြောပြခဲ့ပါသေးတယ်။ အဲဒီတုန်းက မိုဒီက စက်ဘီးစီးပြီး Rutte က ဘေးကရပ်နေတဲ့ ပုံတွေတက်လာတဲ့အတွက် အားလုံးသဘောကျခဲ့ကြပါသေးတယ်။

သူ့နိုင်ငံကို အလည်လာတဲ့ အခြားနိုင်ငံတွေက ခေါင်းဆောင်တွေနဲ့ တွေ့တဲ့အခါမှာ သူဟာ သာမန်လူတစ်ယောက်လို စက်ဘီးလေးစီးပြီးလာတွေ့တဲ့အတွက် အားလုံးရဲ့လေးစားခြင်းကို ခံရပါတယ်။ အီရန်နိုင်ငံ နဲ့ ဆွေးနွေးစာချုပ်ချုပ်ဆိုပွဲ တစ်ခုမှာလည်း ဒီလိုပဲလာတဲ့အတွက် အီရန်ခေါင်းဆောင်က
“လေးစားဖို့ကောင်းလိုက်တဲ့ ဝန်ကြီးချုပ်ပါ။ ကမ္ဘာပေါ်က အဆင်းရဲဆုံးနိုင်ငံတွေက ဝန်ကြီးတွေတောင် ကားအကောင်းစားကြီးတွေကို မစီးရမဖြစ် စီးပြီး ပြည်သူ့ငွေတွေ ဖြုန်းနေတဲ့အချိန်မှာ ဥရောပရဲ့အချမ်းသာဆုံး နိုင်ငံတစ်နိုင်ငံက ဝန်ကြီးချုပ်က စက်ဘီးလေးစီးနေတာမြင်ရတော့ ကျွန်တော်ရှက်မိပါတယ်” လို့ ချီးကျူးပြောဆိုခဲ့ဖူးပါတယ်။

အသက် ၅၁နှစ်ရှိပြီဖြစ်တဲ့ Mark Rutte ဟာ ဝန်ကြီးချုပ်မဖြစ်ခင်က ပညာရေး ၊ ယဉ်ကျေးမှု ၊ သိပ္ပံ နဲ့ အလုပ်သမားဝန်ကြီးဌာနတွေမှာ ထမ်းဆောင်ခဲ့ဖူးပါတယ်။ နိုင်ငံအတွက် အားကျိုးမာန်တက် ထမ်းဆောင်နေတဲ့ ဒတ်ချ်ပြည်သူတွေချစ်တဲ့ Mark Rutte ဟာ ဝန်ကြီးချုပ်တာဝန် ထမ်းဆောင်နေရင်းနဲ့ပဲ The Hague’s Johan de Witt ကောလိပ်မှာ အချိန်ပိုင်းကျောင်းဆရာအလုပ်ကို လုပ်နေဆဲပါ။