ကမ္ဘာ့ပထမဆုံး စမတ်ဖုန်း

ယနေ့ လူတွေအသုံးအများဆုံး အချိန်တွေကို အကုန်ဆုံးစေဆုံး အရာဟာ စမတ်ဖုန်းတွေဖြစ်နေတယ် ဆိုတာကို သိကြပါလိမ့်မယ်။ စမတ်ဖုန်းဆိုတာ မိုဘိုင်းဖုန်းရဲ့ လုပ်ဆောင်ချက်အပြင် တွက်ချက်ခြင်း နဲ့ အခြားလုပ်ဆောင်ချက်များစွာကို လုပ်ဆောင်နိုင်တဲ့ဖုန်းကို ဆိုလိုပါတယ်။ ယနေ့ခေတ်စမတ်ဖုန်းတစ်လုံးဟာ လုပ်ဆောင်ချက်ပေါင်းမြောက်များစွာကို လုပ်ဆောင်နိုင်နေပါပြီ။ ဗီဒီယို ၊ ကင်မရာ ၊ နာရီ ၊ ရီကော်ဒါ ၊ အင်တာနက် အစရှိတဲ့ ယခင်က ပစ္စည်းတစ်ခုချင်းစီ မှာ သာသုံးနိုင်တဲ့အရာတွေကို စမတ်ဖုန်းတစ်လုံးတည်းကနေ လုပ်ဆောင်နိုင်နေပါပြီ။ ဒီအဆင့်အထိ ဖြစ်လာအောင် အဆင့်ဆင်တီထွင်ဖန်တီးခဲ့ကြခြင်းဖြစ်ပါတယ်။

ဒီနေ့ဆိုရင် စမတ်ဖုန်းတွေပေါ်ခဲ့တာဟာ နှစ်ပေါင်း ၂၆နှစ်ကျော်လို့ ၂၇နှစ်ထဲကို ရောက်ရှိလာခဲ့ပြီ ဖြစ်ပါတယ်။ ဒီတစ်ခါတော့ သုတဇုန် မိတ်ဆွေများအတွက် ကမ္ဘာ့ပထမဆုံး စမတ်ဖုန်း ရဲ့ အကြောင်းကို ဝေမျှလိုက်ပါတယ်။

ကမ္ဘာ့ပထမဆုံး စမတ်ဖုန်းအဖြစ် သတ်မှတ်ခံထားရတာကတော့ IBM Simon ဖုန်းပဲဖြစ်ပါတယ်။ အရှည်ကောက်အနေနဲ့ကတော့ The IBM Simon Personal Communicator လို့ခေါ်ပါတယ်။ ပထမဆုံး touch screen ဖုန်းဖြစ်ပြီး အဲဒီတုန်းကစမတ်ဖုန်း ဆိုတဲ့အသုံးအနှုန်းကိုတောင် မသုံးသေးပါဘူး။ ဒါကြောင့် IBM Simon ကို စမတ်ဖုန်းတွေရဲ့ဖခင်ကြီးလို့တောင် တင်စားခေါ်ဝေါ်လေ့ရှိကြပါတယ်။

ဒီ IBM Simon စမတ်ဖုန်းရဲ့ အစကိုပြောရရင် IBM အင်ဂျင်နီယာတွေ တီထွင်ခဲ့တဲ့  Angler အမည်ရ ကိရိယာလေးကနေ စရပါမယ်။ ဒီ Angler ကိရိယာနည်းပညာကို ပထမဆုံးအနေနဲ့ ၁၉၉၂ခုနှစ် လတ်ဗီးဂတ်စ် မှာ ပြသခဲ့တဲ့ COMDEX နည်းပညာပြပွဲမှာ ထုတ်ဖော်ပြသခဲ့တာဖြစ်ပါတယ်။

အဲဒီ Angler နဲ့ မိုဘိုင်းဖုန်းတစ်လုံးနဲ့ ပေါင်းစပ်ရာလိုက်တဲ့အခါမှာ ဖုန်းတစ်လုံးဟာ ဖုန်းပြောရုံသာမက PDA(Personal digital assistant) လို့ခေါ်တဲ့ လက်ကိုင်ကွန်ပျူတာ တစ်လုံးလို လုပ်ဆောင်လာနိုင်ခဲ့ပါတယ်။ ဒါကြောင့်လည်း ဒီ Angler ကိရိယာရဲ့ ဒီဇိုင်နာဖြစ်တဲ့ Frank Canova နဲ့ IBM အင်ဂျင်နီယာတွေကို ပထမဆုံးစမတ်ဖုန်းတီထွင်သူတွေအဖြစ် USA Today သတင်းစာက ဖော်ပြခဲ့တာပါ။

IBM Simon စမတ်ဖုန်းအဖြစ် လူတွေရဲ့ လက်ထဲကို စတင်ရောင်းချခဲ့တာကတော့ ၁၉၉၄ခုနှစ်မှ ဖြစ်ပါတယ်။ မစ်ဆူဘီရှိလျှပ်စစ်ကော်ပိုရေးရှင်းကနေ ထုတ်လုပ်ပြီး အမေရိကန် ဆက်သွယ်ရေးကုမ္ပဏီကြီး BellSouth က ဖြန့်ချိရောင်းချခဲ့ပါတယ်။ ၁၉၉၄ခုနှစ်ကနေ ၁၉၉၅ခုနှစ်အထိ အလုံးပေါင်း ၅၀၀၀၀ ရောင်းချခဲ့ပြီး ဈေးနှုန်းကတော့ ၈၉၉ဒေါ်လာ နဲ့ စတင်ရောင်းချခဲ့ခြင်းဖြစ်ပါတယ်။ (လက်ရှိတန်ဖိုးနဲ့တွက်ရင် ဒေါ်လာ ၁၅၀၀ နီးပါးကျသင့်မှာဖြစ်ပါတယ်)

ဒီ Simon ဖုန်းရဲ့အရွယ်အစားကတော့ အရှည် ၈လက်မ ၊ အကျယ် ၂.၅လက်မ နဲ့ အထူ ၁.၅လက်မ ရှိကာ အလေးချိန်ကတော့ 510g လေးပါတယ်။ ဖုန်းမျက်နှာပြင်အကျယ်ကတော့ အရှည် ၄.၅လက်မ၊ အကျယ် ၁.၄လက်မ ရှိတဲ့ lCD Screen ကိုအသုံးပြုထားပြီး ကာလာကတော့ အဖြူအမဲသာ သုံးနိုင်ပါတယ်။ Touch Screen အသုံးပြုဖို့အတွက် Stylus Pen ကိုထည့်ပေးထားပါတယ်။ လုပ်ဆောင်ချက်အနေနဲ့ကတော့ Fax နဲ့ Email တွေလက်ခံ ပို့ဆောင်နိုင်ခြင်း ၊ မှတ်စုမှတ်နိုင်ခြင်း ၊ လိပ်စာစာအုပ် ၊ နိုင်ငံတကာအချိန်နာရီတွေကို ကြည့်နိုင်ခြင်း ၊ ပြက္ခဒိန် ၊ Schedule ဆွဲနိုင်ခြင်း တို့ကိုလုပ်ဆောင်နိုင်ပြီး Screen ကီးဘုတ်လည်းပါရှိပါတယ်။

OS အနေနဲ့ကတော့ Datalight ROM-DOS စနစ်ကိုသုံးထားပြီး မန်မိုရီက 1MB ၊ သိုလှောင်နိုင်မှုပမာဏက 1MB (2MB အထိထပ်တိုးနိုင်) ရှိပါတယ်။ ဘက်ထရီကတော့ ၇.၅ဗို့ ရှိတဲ့ NiCad ဘက်ထရီကိုသုံးထားပြီး ဖုန်းဆက်တိုက်ပြောမယ်ဆိုရင် ဘက်ထရီရဲ့အသုံးပြုနိုင်မှု သက်တမ်းက ၁နာရီပဲ ခံမှာဖြစ်ပါတယ်.

သုတဇုန်