ကမ္ဘာကျော် ဖောက်ကလန်စစ်ပွဲ ဆိုသည်မှာ

Falklands War, Malvinas War,တောင်ပစိဖိတ်ပဋိပက္ခလို့လည်း သိကြတဲ့ ဖောက်ကလန် စစ်ပွဲဟာ ၁၉၈၂ခုနှစ်ကာလက ဥရောပတိုက် ဗြိတိန်နိုင်ငံနဲ့ တောင်အမေရိကတိုက် အာဂျင်တီးနားနိုင်ငံ တို့အကြား ရက်သတတ္တပတ်(၁၀)ပတ်ကြာ ဖြစ်ပွားခဲ့တာပါ။ စစ်ဖြစ်ရတဲ့အကြောင်းရင်းကတော့ တောင်အတ္တလန္တိတ် သမုဒ္ဒရာအတွင်းမှာရှိတဲ့ ဖောက်ကလန်ကျွန်းပိုင်ဆိုင်မှုနဲ့ပတ်သတ်ပြီး ဖြစ်ပွားခဲ့တာပါ။ ဖောက်ကလန်ကျွန်းဟာ တောင်ဂျော်ဂျီယာနဲ့တောင်ဆင်း ဝစ်ကျွန်းများပေါင်းစည်းထားတဲ့ ကျွန်းစုတစ်ခုဖြစ်ကာ (၁၉)ရာစုကာလတည်း က ဗြိတိသျှအင်ပါယာရဲ့ လက်အောက်မှာတည်ရှိနေတဲ့ကျွန်းဖြစ်ပါတယ်။ အဲဒီအချိန်က အင်္ဂလန်ဝန်ကြီးချုပ်က နောက် Iron Lady လို့ နာမည်ကြီးလာမယ့် မာဂရက်သက်ချာဖြစ်ပါတယ်။

အာဂျင်တီးနားတို့ ကတော့ ဒီကျွန်းဟာ မိမိတို့နယ်မြေအတွင်းသာပါဝင်ပြီး မတရားသိမ်းပိုက်ခြင်းကို ခံထားရတာဖြစ်တယ်လို့ယူဆပြီး ယနေ့အချိန်ထိ အငြင်းပွားမှုတွေဖြစ်ပွားနေရဆဲပါ။ ၁၉၈၂ခုနှစ် မတ်လ ၁၉ရက်နေ့ကတည်းက သတ္တုကုန်သည်ဟန်ဆောင်ထားတဲ့ အာဂျင်တီးနားမရိန်းတပ်သားတွေဟာ ဂျော်ဂျီယာကျွန်းမှာ အင်ဂျင်တီးနားအလံလွှင့်တင်ပြီးတော့ စစ်ပွဲကိုစတင်ခဲ့ပါတယ်။ ၁၉၈၂ခုနှစ် ဧပြီလ(၂)ရက်၊သောကြာနေ့ မှာတော့ အာဂျင်တီးနားတပ်တွေဟာ ဖောက်ကလန်ကျွန်းများကိုရုတ်တရက်ဝင်ရောက်တိုက်ခိုက်သိမ်းပိုက်ခဲ့ပြီး အာဂျင်တီးနားနိုင်ငံရဲ့ အချုပ်အခြာအာဏာပိုင် ဒေသဖြစ်ကြောင်းကြေငြာခဲ့ပါတယ်။ ဖောက်ကလန်ကျွန်းမှာဗြိတိသျှတို့ခန့်အပ်ထားတဲ့ ဘုရင်ခံနဲ့ ကမ်းခြေစောင့်တပ်တွေကခုခံခဲ့ပေမယ့် နောက်ဆုံးမှာ အာဂျင်တီးနား တပ်တွေဆီမှာ လက်နက်ချအညံ့ခံခဲ့ရပါတယ်။

အင်္ဂလန်ကယင်းကိစ္စနှင့် ပတ်သတ်ပြီး ဧပြီလ(၃)ရက်နေ့မှာ ကမ္ဘာကုလသမဂ္ဂလုံခြုံရေးကောင်စီကို တင်ပြခဲ့ရာ လုံခြုံရေးကောင်စီရဲ့အစည်းဝေးဆုံးဖြတ်ချက်အရ ဖောက်ကလန်ကျွန်းမှ အာဂျင်တီးနားတပ်တွေပြန်လည်ဆုတ်ခွာရန် ဆုံးဖြတ်ခဲ့ပါတယ်။ အာဂျင်တီးနားတို့ဘက်မှ ယင်းဆုံးဖြတ်ချက်မှာ တရားမျှတမှုမရှိပဲ ဖောက်ကလန်ကျွန်းမှာ မိမိတို့ပိုင်သာဖြစ်ကြောင်း ပြန်ကြားခဲ့ပြီး စစ်ပွဲကိုစတင်ခဲ့ပါတယ်။

ဧပြီလ(၅) ရက်နေ့မှာတော့ အထူးလေ့ကျင့်ထားတဲ့ ဗြိတိန်ရေတပ်ဟာ အာဂျင်တီးနား ရေတပ်နဲ့လေတပ်ကို တစ်ချိန်တည်းစတင်တိုက်ခိုက်ခဲ့ပါတယ်။ ဒီလိုတိုက်ခိုက်ဖို့အတွက် နျူကလီးယားရေငုပ်သင်္ဘော HMS Conqueror အပါအဝင် လေယာဉ်တင်သင်္ဘောနှစ်စီး ၊ တပ်မဟာ ၄ခုအား တင်ဆောင်ခဲ့သော Canberra နဲ့ Queen Elizabeth II သင်္ဘောတွေကို ၃ရက်အတွင်း ဆက်တိုက်လွှတ်ခဲ့တာပါ။ ဒါအပြင် သင်္ဘောအစီး ၁၀၀ကျော်ပါဝင်တဲ့ရေတပ် ၊ တိုက်လေယာဉ် ၄၂စီးလည်း ပါဝင်ပါသေးတယ်။

ဆက်တိုက် ဆိုသလိုပဲ လေကြာင်းကိုအသုံးပြုကာ အပြင်းအထန်တိုက်ခိုက်ခဲ့ကြပါတယ်။ ဗြိတိသျှတွေဟာ ဖောက်ကလန်ကျွန်းနဲ့ ရေမိုင် ၃၈၀၀ ခန့်ဝေးတဲ့ အဆန်းရှင်းကျွန်းမှာ အခြေချပြီး စစ်ပွဲဆိုင်ရာ ထောက်ပံ့မှုများစွာပြုလုပ်ပြီး တိုက်ပွဲဝင်စေခဲ့ပါတယ်။ ဒါအပြင် အင်္ဂလန်ပြည်တွင်းမှာလည်း ဒီတိုက်ပွဲကို ပြည်သူတွေကတစ်ခဲနက် ဝိုင်းဝန်းထောက်ခံခဲ့ကြပါတယ်။ အင်္ဂလန်ရဲ့ အဓိကမဟာမိတ်ဖြစ်တဲ့ အမေရိကန်ပြည်ထောင်စုကလည်း လိုအပ်တဲ့လက် နက်သာမက စက်သုံးဆီဂါလန် သောင်းနဲ့ချီထောက်ပံံံ့မှုတွေ ပြုလုပ်ပေးခဲ့ပါ တယ်။

အာဂျင်တီးနား နိုင်ငံအနေနဲ့ကတော့ ယင်းကာလက နိုင်ငံရေးအခြေနေရှုပ်ထွေးနေပြီး နိုင်ငံတော်အာဏာကို စစ်တပ်ကရယူထားတဲ့အချိန်ဖြစ်ပါတယ်။ နိုင်ငံတွင်းကြုံတွေ့နေရတဲ့ လူမူရေး၊စီးပွားရေးအခြေနေတွေကို အာရုံ ပြောင်းပြီး အာဂျင်တီးနားတွေရဲ့ အမျိုးသားရေးစိတ်ဓာက်ကို လှုံဆော်တဲ့ ပုံစံ မျိုးနဲ့ စစ်ပွဲဝင်ဖို့ဆုံးဖြတ်ခဲ့တဲ့ ဗိုလ်ချုပ်ကြီး လီယိုပိုလ်ဒိုဂယ်တီရီဟာ သူတို့ထက်လက်နက်အင်အား သာလွန်တဲ့အပြင် နိုင်ငံတကာက ထောက်ခံမှုတွေရရှိနေတဲ့ ဗြိတိသျှတွေကိုတော့ အရှုံးပေးခဲ့ရတာပါ။ ဖောက်ကလန်ကျွန်းတိုက်ပွဲဟာ ဒုတိယကမ္ဘာစစ်ပြီးဆုံးပြီးတဲ့နောက် အခြားမဟာမိတ်တွေမပါပဲ အင်္ဂလန် နိုင်ငံတစ်နိုင်ငံတည်းက အခြားနိုင်ငံတစ်ခုကိုတိုက်ခိုက်တဲ့ ပထမဆုံးတိုက်ခိုက်ခဲ့တဲ့ စစ်ပွဲဖြစ်ပါတယ်။

အာဂျင်တီးနားဘက်ကတော့ တိုက်လေယာဉ် ၁၂၂စီးအသင့်ရှိနေပြီး အာဂျင်ဘိုးရင်း 707 Recon လေယာဉ်ကလည်း ဗြိတိန်ရေတပ်ကို တောက်လျှောက်နောက်ယောင်ခံလိုက်နိုင်ခဲ့ပါတယ်။ ဗြိတိသျှတို့က ဧပြီ ၂၁ရက်တွင် စတင်တိုက်ခိုက်ရန်စီစဉ်ထားခဲ့သော်လည်း ရာသီဥတုဆိုးရွားကာ ရဟတ်ယာဉ်နှစ်စင်းပျက်ကျမှုကြောင့် ၂၅ရက်နေ့မှ စစ်ဆင်ရေးကို ပြန်စနိုင်ခဲ့ပါတယ်။

အဲဒီနေ့မှာတော့ ဗြိတိန်တို့ရဲ့ ရဟတ်ယာဉ်များမှ တော်ပီဒိုများ ၊ ရေငုပ်သင်္ဘောဖျက်ဒုံးများဖြင့်တိုက်ခိုက်မှုကြောင့် အာဂျင်ရေငုပ်သင်္ဘော ARA Santa Fe ဟာ ဆိုးရွားစွာပျက်စီးခဲ့ရပါတယ်။ အဲဒီနောက်မှာတော့ ဖရီးဂိတ်စစ်သင်္ဘောတွေဖြစ်တဲ့ Antrim နဲ့ Plymount တို့ကနေ တောင်ဂျော်ဂျီယာကျွန်းမှ အာဂျင်အစောင့်တပ်များကို စတင်တိုက်ခိုက်ကာ ကမ်းတက်တိုက်ပွဲကိုစတင်ပါတယ်။ ကွန်မန်ဒို ၇၆ဦး ရဲ့အားနဲ့ ၁နာရီအတွင်းမှာ အဲဒီကျွန်းကို သိမ်းပိုက်နိုင်ခဲ့ပါတယ်။

မေလ ၁ရက်နေ့မှာတော့ အဆန်းရှင်းကျွန်းမှာတပ်စွဲထားတဲ့ ဗြိတိသျ ဗုံးကြဲလေယာဉ် ၈စီးဟာ ဖောက်ကလန်ကျွန်း  Stanley မှာရှိတဲ့ အာဂျင်လေတပ်ကို ဗုံးကြဲတိုက်ခိုက်ခဲ့ပြန်ပါတယ်။ အာဂျင်တီးနားမှလည်း တိုက်လေယာဉ် ၃၆စီးကို ဖောက်ကလန်ကျွန်းကို ချက်ချင်းစေလွှတ်ခဲ့ပြီး ဗြိတိသျှတို့ရဲ့စစ်ရေယာဉ်တစ်စင်းကို စတင်ပစ်ခတ်ခဲ့တဲ့အတွက် အဲဒီသင်္ဘောဟာ ဆိုးရွားစွာပျက်စီးသွားခဲ့ရပါတယ်။ ဗြိတိသျှ BAE Sea Harrier လေယာဉ်တွေက အာဂျင်ဘက်ကိုကြားဖြတ်တိုက်ခိုက်ခဲ့တဲ့အတွက် အာဂျင်လေယာဉ် ၂စီးပျက်ကျခဲ့ရပါတယ်။ အဲဒီနောက် လေယာဉ်တိုက်ပွဲများဆက်လက်ဖြစ်ပွားခဲ့ပြီး အာဂျင်လေယာဉ်နောက်ထပ် ၂စီး ပျက်ကျခဲ့ရပြန်ပါတယ်။

မေလ ၂ရက်နေ့မှာတော့ ပထမဆုံးရေတပ်ချင်းတိုက်တဲ့တိုက်ပွဲ ဖြစ်ခဲ့ပါတယ်။ ဗြိတိန် နျူးကလီးယားရေငုပ်သင်္ဘော HMS Conqurer နဲ့ အာဂျင်ကရူဇာစစ်သင်္ဘော ARA General Belgrano တို့တွေ့ဆုံတိုက်ခိုက်ခဲ့ရာမှာ ဗြိတိန်ရေငုပ်သင်္ဘောဘက်မှ ပစ်လိုက်တဲ့ တော်ပီဒို ၃လုံးဟာ အာဂျင်သင်္ဘောကို ထိမှန်ခဲ့တဲ့အတွက် Belgrano သင်္ဘောနစ်မြုပ်သွားတဲ့အပြင် စစ်သည် ၃၂၃ဦးလည်း ကျဆုံးခဲ့ရပါတယ်။ ဒီအကျအဆုံးကြောင့် အာဂျင်လေယာဉ်တင်သင်္ဘော ARA Veinticinco de Mayo ဦးဆောင်တဲ့ရေတပ်ဟာ နောက်ဆုတ်သွားခဲ့ရပါတယ်။ Belgrano သင်္ဘောဖြစ်ရပ်ဟာ အာဂျင်တီးနားစစ်တပ်အတွက် အလွန်အထိနာခဲ့ရပြီး အာဂျင်တီးနားရေတပ် တစ်ခုလုံး တိုက်ပွဲဆက်လက်မဝင်နိုင်လောက်တဲ့အထိ ဖြစ်ခဲ့ရပါတယ်။

ဖောက်ကလန် စစ်ပွဲတစ်လျောက်ကျဆုံးခဲ့ရတဲ့ အာဂျင်တီးနားစစ်သည် တစ်ဝက်လောက် ဟာအဲဒီ ခရူဇာသင်္ဘောနစ်မြုပ်ရာမှာ ကျဆုံးခဲ့ရတာပါ။ မေလ ၄ရက်နေ့မှာတော့ အာဂျင်တိုက်လေယာဉ်တွေက တိုက်ခိုက်ခဲ့တဲ့အတွက် တော်ဝင်ရေတပ်သင်္ဘော  HMS Sheffield ပျက်စီးနစ်မြုပ်ခဲ့ပြီး ရေတပ်သား ၂၀ခန့်ကျဆုံးခဲ့ပါတယ်။ Sheffield သင်္ဘောဟာ ချက်ချင်းမနစ်မြုပ်သေးပဲ ၆ရက်တိုင် မီးတောက်လောင်ပြီးမှ နစ်မြုပ်သွားခဲ့တာပဲဖြစ်ပါတယ်။

မေလ ၁၇ ရက်နေ့မှာတော့ ဗြိတိန်အထူးတပ်ဖွဲ့ SAS ကွန်မန်ဒိုများဟာ အာဂျင်တို့ရဲ့အရေးပါတဲ့ ပြင်သစ်ထုတ် Super Etendard လေယာဉ် ၅စီးထားရှိရာ စခန်းကို စစ်ဆင်ရေးတစ်ခုနဲ့ ဝင်ရောက်တိုက်ခိုက်ဖို့ ကြိုးစားခဲ့ပါတယ်။ ဒါပေမယ့် ဆိုးရွားတဲ့ရာသီဥတုကြောင့် စစ်ဆင်ရေးစတင်တဲ့ရဟတ်ယာဉ်ဟာ အာဂျင်တီးနားကိုမရောက်ပဲ ချီလီနိုင်ငံအတွင်းကိုရောက်ရှိခဲ့တဲ့အပြင် အာဂျင်ဘက်ကလည်း သတင်းကြိုရခဲ့တာကြောင့် မီကာဒိုစစ်ဆင်ရေးမအောင်မြင်ခဲ့ပါဘူး။

ဒီစစ်ဆင်ရေးမအောင်မြင်ခဲ့ပေမယ့် Pebble ကျွန်းက အာဂျင်လေယာဉ်ကွင်းကို လျှပ်တပြက်တိုက်ခိုက်ခဲ့မှုမှာတော့ အာဂျင်လေယာဉ် ၂၂စီးကို ဖျက်စီးပစ်နိုင်ခဲ့ပါတယ်။ ဗိုလ်မှူးကြီး Michael Clapp ဦးဆောင်တဲ့ စစ်သည် ၄၀၀၀ ကလည်း ပထမဆုံးမြေပြင်စစ်ဆင်ရေး Sutton ကိုအောင်မြင်စွာ စတင်နိုင်ခဲ့ပါတယ်။ ဒါပေမယ့် ဗြိတိန်ရေတပ်ရဲ့ ဖရီးဂိတ်စစ်သင်္ဘော HMS Ardent ကတော့ အာဂျင်တို့ရဲ့တိုက်ခိုက်နစ်မြုပ်ခြင်းကိုခံလိုက်ရကာ ရဟတ်ယာဉ်တစ်စီးပျက်စီးပြီး စစ်သည် ၂၂ဦးကျဆုံးသွားခဲ့ရပါတယ်။

အာဂျင်တို့ရဲ့လေကြောင်းတိုးမြှင့်တိုက်ခိုက်မှုကြောင့် ဗြိတိန်သင်္ဘောများဖြစ်သော HMS Antelope ,MV Atlantic Conveyor, HMS Brilliant, HMS Argonaut နှင့် HMS Conventry တို့မှာ မြုပ်သည့်သင်္ဘောကမြုပ် ပျက်စီးသည့်သင်္ဘောများမှာလည်း ဆိုးရွားစွာပျက်စီးခဲ့ရပါတယ်။ နောက်ထပ်အာဂျင်တို့ရဲ့ လေကြောင်းတိုက်ခိုက်မှုတွေဟာ ဗြိတိန်ရေတပ်ကို သိသာစွာမတိုက်ခိုက်နိုင်တော့ပါဘူး။ ဒီလေကြောင်းစစ်ဆင်ရေးတွေမှာ အာဂျင်တို့ဘက်က လေယာဉ်နှစ်စီးပြတ်ကျခဲ့ပါတယ်။

မေလ ၂၇ ရက်နေ့မှာဖြစ်ခဲ့တဲ့ Goose Green တိုက်ပွဲမှာတော့ ဗြိတိန်လေထီးတပ်မှ တပ်သား ၅၀၀ ခန့်ဟာ အာဂျင်တပ်တွေရယူထားတဲ့ Goose Green နဲ့ Darwin နယ်မြေတွေကို ဝင်ရောက်တိုက်ခိုက်ခဲ့ပါတယ်။ ဗြိတိန်တို့ဘက်မှ အမြောက်တပ်ရင်းကလည်း တောက်လျှောက်ပစ်ပေးနေခဲ့တာကြောင့် ၂၈ရက်နေ့မှာတော့ အာဂျင်တပ်တွေလက်နက်ချခဲ့ပါတယ်။ ဒီတိုက်ပွဲမှာ ဗြိတိန်ဒုဗိုလ်မှူးကြီး Herbert Jones အပါအဝင် ဗြိတိသျှတို့ဘက်မှ ၁၇ဦးကျဆုံးပြီး အာဂျင်တို့ဘက်မှ စစ်သည် ၄၇ဦးကျဆုံးကာ ၉၆၁ဦး သုံ့ပန်းအဖြစ် ဖမ်းဆီးခြင်းခံခဲ့ရပါတယ်။

ဗြိတိန်တို့ဘက်မှ ကျွန်းတစ်ခုလုံးကို သိမ်းပိုက်ရန် အစီအစဉ်တွေ တစ်ခုပြီး တစ်ခုလုပ်နေသည့်အချိန်မှာပဲ အာဂျင်လေတပ်ဟာလည်း ဗြိတိန်ရေတပ်ကို အရှိန်တိုးမြှင့်တိုက်ခိုက်နေခဲ့ပါတယ်။ ဒီတိုက်ခိုက်မှုကြောင့် ဗြိတိသျှသင်္ဘောများဖြစ်တဲ့  RFA Sir Tristram နဲ့ RFA Sir Galahad  ပေါ်မှ စစ်သည် ၅၆ဦးသေဆုံးခဲ့ရပါတယ်။ ဇွန်လ ၇ရက်နေ့  Port Pleasant ကမ်းခြေကို ဗြိတိန်တပ်ဟာ ကမ်းတက်နေစဉ်မှာ အာဂျင်လေယာဉ်များရဲ့တိုက်ခိုက်မှုကိုခံရကာ စစ်သည် ၅၀ခန့်ကျဆုံးပြီး ရာနဲ့ချီဒါဏ်ရာရရှိခဲ့ပြန်ပါတယ်။

နောက်ဆုံးတိုက်ပွဲတွေကတော့ ဇွန်လ ၁၁ရက်နေ့ကနေ စတန်လေဒေသမှာ စတိုက်ခဲ့တဲ့တိုက်ပွဲတွေဖြစ်ပါတယ်။ အာဂျင်တွေဟာ စတန်လေကုန်းမြင့်များမှာ အခိုင်အမာတပ်စွဲပြီး ဗြိတိန်တို့ရဲ့ထိုးစစ်ကို ခုခံခဲ့ပါတယ်။ နှစ်ဘက်စလုံး အမြှောက် ၊ စနိုက်ဘာများကို သုံးစွဲခဲ့ကြပါတယ်။

ဒါပေမယ့် အင်အားကြီးမားတဲ့ ဗြိတိန်တပ်တွေရဲ့ထိုးစစ်ကို အာဂျင်တို့ မခုခံနိုင်ပဲ တောင်ကုန်းတစ်ခုပြီးတစ်ခု ဗြိတိန်တို့လက်အောက်သို့ ကျခဲ့ရပါတယ်။ တညလုံးအပြန်အလှန်တိုက်ခိုက်ခဲ့ကြပြီး အကျအဆုံးလည်းများခဲ့ပါတယ်။ ၁၃ရက်နေ့မှာတော့ ဗြိတိန်တပ်တွေဟာ Wireless Ridge နဲ့ Tumbledown တောင်ကုန်းဒေသတွေကို ဆက်လက်သိမ်းပိုက်နိုင်ခဲ့ပါတယ်။

Tumbledown တောင်ကုန်းတိုက်ပွဲပြီးဆုံးပြီးတဲ့နောက်မှာတော့ အာဂျင်တီးနားတပ်မတော်အနေနဲ့ ဆက်လက်တိုက်ပွဲဝင်ခြင်းငှာ မစွမ်းဆောင်နိုင်တော့ပါဘူး။ ဒါကြောင့် ၁၉၈၂ဇွန်လ (၁၄) ရက်နေ့ မနက်ပိုင်းတော့ အာဂျင်တီးနားတပ်မှူး ဗိုလ်ချုပ်ကြီး မာရီယိုမန်ဒက်က ဗြိတိသျှ ဗိုလ်မှူးချုပ် ဂျယ်ရီမိုးထံ လက်နက်ချခဲ့ကာ တိုက်ပွဲကိုအဆုံးသတ်ခဲ့ရပါတယ်။ ဖောက်ကလန်ကျွန်းဟာလည်း ဗြိတိန်နိုင်ငံရဲ့ထိန်းချုပ်မှုအောက်ကို  ပြန်လည်ရောက်ရှိခဲ့ပါတယ်။

ဖောက်ကလန်ကျွန်းတိုက်ပွၤဲဟာ ရက်ပေါင်း (၇၃)ရက်ကြာခဲ့ပြီး တိုက်ပွဲအတွင်း ဗြိတိန်စစ်သည် ၂၅၅ ဦး၊ အာဂျင်တီးနားစစ်သည် ၆၄၉ဦး၊ ဖော်ကလန်ကျွန်းဒေသခံ(၃)ဦး အသီးသီး ကျဆုံးခဲ့ရပါတယ်။ပျက်စီးမှုများအနေနှင့်မှု အာဂျင်ဘက်မှ စစ်သင်္ဘော ၉စီး ၊ လေယာဉ် ၇၅စီး နဲ့ ရဟတ်ယာဉ် ၂၅စီး ပျက်စီးခဲ့ကာ ဗြိတိန်တို့ဘက်မှ စစ်သင်္ဘော ၈စီး ၊ လေယာဉ် ၁၁စီး နှင့် ရဟတ်ယာဉ် ၂၄စီး ပျက်စီးဆုံးရှုံးခဲ့ရပါတယ်။

ဖောက်ကလန်စစ်ပွဲက ဒီမှာတင်ပြီးခဲ့ပေမယ့် အင်္ဂလန်တို့အပေါ် အာဂျင်တို့ရဲ့အငြိုးကမပြီးခဲ့ပါဘူး။ စစ်ပွဲဖြစ်ပွားပြီး နောက် ၄နှစ်အကြာ ၁၉၈၆ ကမ္ဘာ့ဖလားပွဲမှာတော့ အင်္ဂလန်အသင်း နဲ့ အာဂျင်တီးနားအသင်းတို့ ပြန်လည်တွေ့ဆုံခဲ့ပါတယ်။ ဒီကမ္ဘာ့ဖလား ကွာတားဖိုင်နယ်ပွဲစဉ်မှာတော့ အာဂျင်တီးနားက အင်္ဂလန်ကို (၂-၁)ဂိုး နဲ့ အနိုင်ရသွားခဲ့ပါတယ်။ ဒုတိယဖောက်ကလန်တိုက်ပွဲလို့ ကမ္ဘာမီဒီယာတွေရည်ညွှန်းခဲ့တဲ့ ဒီပွဲမှာ အင်္ဂလန်အသင်းဘက်ကို အာဂျင်တီးနားတိုက်စစ်မှူး မာရာဒိုနာက အနိုင်ဂိုးတစ်ဂိုး ကိုလက်နဲ့ပုတ်သွင်းခဲ့တာပဲဖြစ်ပါတယ်။

လူမျိုးရေးအမုန်းတရားတွေ မပျယ်သေးတဲ့ ကာလမှာ ဘုရားပေးတဲ့လက်လို့ ကမ္ဘာကျော်ခဲ့တဲ့ မာရာဒိုနာရဲ့ ဒီဂိုးဟာ အင်္ဂလန်နဲ့ အာဂျင်တီးနားတို့ကြား အမုန်းတရားတွေကို ဆက်လက်ရှင်သန်စေခဲ့သလိုပါပဲ။ အာဂျင်တီးနားဟာ အဲဒီကမ္ဘာ့ဖလားဗိုလ်လုပွဲမှာ အနောက်ဂျာမဏီကိုနိုင်ပြီး ဗိုလ်စွဲခဲ့ပါတယ်။ အင်္ဂလန်ကို စစ်ရှုံးခဲ့ပေမယ့် ဘောလုံးပွဲမှာပြန်လည်အနိုင်ယူနိုင်ခဲ့တဲ့အတွက် မာရာဒိုနာဟာ အာဂျင်တီးနားရဲ့ ဂန္တဝင်သူရဲကောင်းဖြစ်ခဲ့ပါတော့တယ်။